Read lugbara E'yo O'beza 24 Bible Online

E'yo O'beza 24 - lugbara bible

E'yo O'beza 24

¹Ma nga oru a’dungare ya? Ma nga mu nda dika. Mi ’ba ma’yala ’ba e’yo onzi ’yepi ’diyi ma e’yosi ku, mi ma le ovuzu yi be tualu ku;

²yi ma asini e’yo ’ba inzazuri otulerisi, yi ma tileni e’yo onzi ’yole ’ba azini ma ruaarisi.

³Onduasi ’ba yi jo si, e’yo vazasi ’ba yi fe joni pa sozu okporu;

⁴nitasi jo alizani ga afa aje amboru ’diyi tre lonyi onyiru ’diyi be.

⁵’Ba onduaruri ovu okpo be, ada, ’ba nita beri fe okponi i ereni;

⁶a’disiku mi nga omba ’ba dri ceza onduanirisi, azini ’ba e’yo amaza fepi ’diyi ka ovu o’biru, ’ba yi nga aga ra.

⁷Onduari uru tu, nde ’ba ondua kokoruri ra; ’ba nde zini i ma tile kalitilia ku.

⁸’Ba e’yo otupi onzi ’yezuri, yi nga runi ’da Aparaka’i.

⁹’Ba ondua kokoruri ma asisileri ezatani, azini ’ba ’ ngu ’ba ’ba edepi edematarasiri onzi.

¹⁰Icimakoru ka mi ’be o’du candinirisi, isu de mi okpo were.

¹¹Mi ari ’ba yini jile dra vu ’diyi; azini mi opa ’ba opele ofule ra’diyi.

¹²Mi ka ’yo ra, Mi ndre, ama nini e’yo ’diri ku; ’ba ’ba ma asi o’bipiri egani, e’yo nde ku ya? ’Ba mi orindi ta mbapiri nini e’yo ’diri ku ya? Azini eri ngani ofe ’ba alu alu dri ’yeta yini vusi ku ya?

¹³Ma mvi, mi mbe anyuoso, erini ovule onyirurisi; anyuoso otipi anyusoro ma ruaari, erini ovule aluzaru mi tiliarisi.

¹⁴Mi ma ni onduari aluzaru mi dri ’dinile; mi ka eri isu ra, orodrini nga ovu indi, azini e’yo mini teleri ngani avi oye ku.

¹⁵Mi ’ba onzini, mi zi mi ’ba onyiruri ma aku mbazu ku; mi eza pari erini adrizuri ku;

¹⁶a’disiku ’ba onyi beri e’de paleko aziri, te ti, eri enga dika; te ocokoni ’ba onzi ’diyi o’be va.

¹⁷Mi ma ovu ayikosi mi ari’boni e’dele varisi ku, te mi asi ma ovu ayikosi erini i ogule varisi ku;

¹⁸adra kazu engazu Yehova ma asia erini e’yo nderi ndreria ku, eri kazu ani i ma aoko kuzu ari’bo nderi ma ruaarisi ja ku.

¹⁹Mi asi ma oti ’ba e’yo onzi ’yepi ’diyisi ku, mi ’ba ma’yala ’ba onzi ’diyi ma e’yosi ku;

²⁰a’disiku ’ba onzini ngale orodri isule kurisi; yi nga ’ba onzi ’diyi ma tala inyu ra.

²¹Mva mani, mi ru Yehova pi opi be; mi eci ti ’ba lepi yi ojapi oja ’diyi be ku;

²²candi yinirini ngale engale mbelerurisi, te a’di ni dri jata yi ma iritrorinini ya?

²³E’yo ’diyi yi vini e’yo ’yoza ’ba onduaru ’diyini. ’Ba opezu e’yo liza ma aliari ovuni onyiru ku.

²⁴’Ba ’yopi ’ba onziri ma tiari, Mi ’ba onyiruri; suru yi nga eri ’ da, suru ndu ndu ’diyi nga eri ngu onzi;

²⁵te ’ba egapi ’ba onziri ma dria ’diyi dri ayikoni nga ovu indi, asi ndriza onyiruri nga eca yi I ma dria,

²⁶’Bani e’yo omvizu kililiruri si ekile ’bani o’bolo ndruzurile.

²⁷Mi ede azi mini ngonde amve raka, mi ’ya amvu mini oko; te vutinia mi si jo mini ndo.

²⁸Mi nze e’yo eti mi agyi ma ruaa e’yo kokoru ku; mi ici ’ba mi tilesi ku.

²⁹Mi ’yo, Ma nga eri ’ye ekile emi ’yele ma vurile; ma nga aroti ofe agu nde dri ’yeta erini vusi ma’idinini ku.

³⁰Ma aga ovuou ma amvu tia, azini ’ba e’yo vaza kokoruri ma amvu zabibuniri ma tia indi;

³¹te mi ndre, eri du dria ociru; mileni a’bu i dria avaefi dupi risi ci, kali oniru eri ma ageiari asu iva indi.

³²Te di ma lu ra, ma ega e’yere; ma ndre ra, ma isu ani imbata ra:

³³O’du kozu were, o’du kozu kaukau were, dri ekilazu tualu o’du kozu were;

³⁴te alio minini nga emu mi dria oguoule, afaako miniri ekile ’ba sei berile.