Read lugbara E'yo O'beza 25 Bible Online

E'yo O'beza 25 - lugbara bible

E'yo O'beza 25

¹E’yo o’beza Sulemanini ’ba Hezekia opi Yudaari vile ’diyini sile dika ’diyi yi ’di.

²Eri diza Munguniri e’yo azini zizu, te diza opiniri eri e’yo ma eti ndruzu.

³Ekile ’buni ovule re uru turile, azini nyakuni ovule aliru va turile, ’dinile ’ba econi opi ma asisile ma eti vazaru ku.

⁴Mi nze ayaze dahabu ma driarisi raka, ’ba oka dipiri nga ani afa onyiruri ede ndo;

⁵mi nze ’ba onzi opi ma miliasi oguna erini nga di pa so okporu onyi ma alia ani.

⁶Mi ’ba mi drile mi drisi opi ma milia ku, te mi so pa ’ba amboru ’diyi ma paria ku;

⁷a’disiku ’bani ’yozu mi tia, Mi etu ’ dole-ri eri onyiru aga ’bani mi ’bazu ele opimva ma miliari ra. E’yo mini ndrele mi milesiri

⁸mi ofu eri agataru mbele ku; a’disiku vilerisi mi nga a’di ’ye, agyi mini ka nga drinza fe mi dri ’boria ya?

⁹Mi nze e’yo mini agataruri ma eti ’ba mi jo ejeliari ma ngulupi ma tia, te mi ece e’yo ’ba azinini ndrule mi tiari ’ba azini dri ku;

¹⁰’ba e’yo mini eripiri kazu mi o’dazu ku, ru onzi mini kazu awuzu ’dani ku.

¹¹E’yo ’bani ’yole ’yekeri ovu ekile patiefi meleru ovupi afazu dahaburu ma aliarile.

¹²Asi omiza ’ba egapi ’ba ma dria onduasirini si i ekile nziabia edele melesiri azini onyiafa edele mele alarusirile, ’ba e’yo nde eripiri ma bilia.

¹³Ekile egbe si emveruni ewu anyani kazurisirile, ojiou adaruri ovu ’ba e’ri ti pepi ’diyi dri ’dinile; erini opi ini ma orindi engale dikarisi.

¹⁴’Ba i ipipi afa feza ini fele kurisi si ekile iriti oli be ozoo kokorurile.

¹⁵’Ba ka te e’yere etu izuru, eri nga opi ma asi oja i vu ra, andre e’yereri fala nyo ra.

¹⁶Mi isu anyuoso ra ya? Mi mbe lu dri fupi ecopi misiri, mi kazu trazu erisi huruhuru ogbezu ani ku.

¹⁷Mi pa ma fi mi agyi vile joa pale kakau ku, eri kazu andezu misi, mi nguzu onzi ku.

¹⁸’Ba e’yo eti nzepi inzoru ’ba i ma jo eseliari ma ruaari si ekile oyi amborurile, seile, ’ye si ndrindririle.

¹⁹Mi ka mi asi ’ba ’ba e’yo ada kokoruri ma dria o’du candinisi, eri ekile si nyozaru, kani pa acozarurile.

²⁰’Ba ongo ngopi ’ba asi nziza beri driri si ekile ’ba bongo trupi o’du egbenisirile, ekile patiefi su drazaru osuzu a’i ma driarile.

²¹Ari’bo mini ka ovu abirisi, mi: ma fe enya eri dri; avijo ka eri fu ra, mi ma fe eri dri yi mvuzani;

²²a’disiku mi nga aciolu oku eri ma dria, azini Yehovani nga orodri fe mi drini.

²³Oli engapi kala andraleruari ozoo ejini; azini andre asururi mile aokoru ejini.

²⁴Eri onyiru ’bani adrizu jo dri senderu ma kala aluria aga ’bani adrizu jo walaru ma alia oku e’yo o’yopi kurukuru zuri beri ra.

²⁵Ekile yi anzuru ’ba yi avijo beri dririle, e’yo kuza baru engapi angu ziriari ovu ’ dinile.

²⁶Ekile yi a’di ’bani pa otuzu alenia saarurile, ekile yi egapi ega ’bani ezalerile, ’ba onyiru e’depi va ’ba onzi ma e’yosiri ovu ’dinile.

²⁷Anyuoso mbezu turi ovuni onyiru ku; ’bani inzita ndruzu yi driri ovuni inzitaru ku.

²⁸’Ba i ma orindi ta mbapi kuri ovu ekile aku amboru asurupi va kali kokorurile.