Read lugbara E'yo O'beza 28 Bible Online

E'yo O'beza 28 - lugbara bible

E'yo O'beza 28

¹’Ba onzi ’diyi apa ra de vini i ’ba yi ma vuti dropini yo, te ’ba onyi be ’diyi ovu uri kokoru ekile kamile.

²Ezata anguni ma e’yosi opi yi nga ovu kakau; te ’ba e’yo vaza be e’yo nipi ’diyi nga fe angu ma e’yo ma adri indi’dani.

³Aliou ka i agyi aliou azi ’diyi inza, eri ovu ekile ozoo etataru nyaka kupi aluni kurile.

⁴’Ba azita kupi ’diyi inzi ’ba onzi ma ru, te ’ba azita ma ta mbapi ’diyi ga agata yi be.

⁵’Ba onzi ’diyi vani ’yeta kililiruri ku, te ’ba Yehovani ndrupi ’diyi yi e’yo dria va ra,

⁶’Ba alioru acipi asi kililirusiri eri onyiru aga ’ba acipi saaru i ma geriari ra, ka tro ovu ’ba afa e’iru ti,

⁷’Ba azita ma ta mbapiri ovu mva onduaruni, te ’ba ovupi ’ba anyamgboloru ’diyi be agyiruri adri drinza fe i ati dri.

⁸’Ba fepi lonyi inini i erezu ini orodri a’ile afa ereniru berisiri eri afa nde oku ’ba yiki ’bapi ’ba aliorusiri dri.

⁹’Ba i ma bile japi kalaa i ma eri azita ku aniri, adani zita erini zileri ovu afa Munguni ngule onziri’i.

¹⁰’Ba fepi ’ba kililirurini abazu geri onziri aliari nga e’de va awi ini galeri ma alia; te ’ba e’yo kokoru ’diyi nga onyi a’i awurusoru.

¹¹’Ba afa e’iru ovu onduaru i ma ngulupi ma milia, te ’ba alioru e’yo vaza beri ni eri ma e’yo ra.

¹²’Ba onyiru ’diyi ka aga ra, ’ba yi ovu ayikosi inzita amboru be; te ’ba azi onzi ’yepi ’diyi ka enga ra, ’ba nga yi ma ngulupi zi ra.

¹³Ba i ma ezata zipi ciri ngani drileba isu ku, te ’ba i ezata e’dapi kupi rari nga asi ndriza isu ra,

¹⁴’Ba Yehovani rupi o’du driari eri drilebaru; te ’ba asi mbapiri nga e’de e’yo onzi ma alia.

¹⁵Opi oci suru alioru ma dri cepiri si ekile kami wuta wupirile, kani nguru za ndapirile.

¹⁶’Ba dri cepi ovupi e’yo vaza kokoruri eri nga ’ inza tu; te ’ba lepi li ’bapi ’ba azini ma afasi kuri nga fe o’du ini ma ere yi izuru.

¹⁷Agu azini ka ovu avuari be i ma ruaa, agu nde aga apa ’bilia; ’ba azini ma oga eri ku.

¹⁸Yi nga ’ba acipi kililiruri ari ra, te ’ba e’yo ’yepi aka geri ini ma aliari nga e’de coti.

¹⁹’Ba angu ini ’yapiri nga ovu enya be fudri ci, te ’ba e’yo badaka ’dini ’diyi ma vuti bipi’iri nga ini alio isu fudri ci.

²⁰’Ba adaruri nga ga asi ndrizasi tre, te ’ba ’yepi ngiri ngirisi o’bizu lonyi isuzuri ngani ece panga isuzu ku.

²¹’Ba opezu ovuni onyiru ku; kani ’bani e’yo ezazu enya were ma e’yosiri ovuni vini onyiru ku indi.

²²’Ba endraruri adri lonyi eto mbele, te eri nini kini alioni nga eca i ma ruaa rari ku.

²³’Ba egapi ’ba ma driari eri de ’di nga asi ndriza isu vilerisi aga ’ba ’ba inzipi lokirisi i ma andresiri ra.

²⁴’Ba i atipi ma afaogupi i andri be, ’yopi kini, ’Di ezatani yori, agu nderi pi ’ba ’ba dri japiri be agyiru.

²⁵’Ba orindi liru beri adri fe awatani engazu ’ba eselia, te ’ba i asi ’bapi Yehova ma driari nga a’buni.

²⁶’Ba i ma asi ’bapi i ma ngulupi ma driari ovu ondua kokoru; te ’ba nga ’ba acipi, onduasiri ari ra.

²⁷’Ba afa fepi ’ba alioru driri ngani ovu afa kokoru ku, te ’ba eri ma mile supi vari nga o’data a’i kakau.

²⁸’Ba onzi ’diyini engaria ’ba adri yi ozi ra, te yini dri jaria, ’ba onyiru ’diyi adri eni karakarau.