Read lugbara E'yo O'beza 29 Bible Online

E'yo O'beza 29 - lugbara bible

E'yo O'beza 29

¹’Ba ’bani egazu drinia pale kakau ti, ombenini mbazu ’daniri nga i nye mbelekocici, aro eri atizuni yo.

²’Ba onyiru ’diyi ka ezu kakau, ’ba dria ovu ayikosi; te ’ba oazi ’diyini opi nyaria, ’ba yi adri ota yi asia ota ora,

³’Ba ondua lepiri fe i atini ovu ayikosi; te ’ba agyi ’bapi oku saaru ’diyi beri adri lonyi eza eza.

⁴Opini fe anguni pa so e’yo lizasi, te ’ba afa ’ba ti razu ’diyi a’ipiri eri ini fe angu eza’i.

⁵’Ba ’ba i ma jo ejeliari inzipi lokirisiri eri emba ’be eri ma pa bizu.

⁶’Ba onziri ma ezata ezaleri alia awi indi, te ’ba onyiruri eri ini ongo ngo ayikosi’i.

⁷’Ba onyiruri ni ’ba alioru ’diyi ma e’yo ma eti ra; te ’ba onziri ovuni e’yo vaza ’diniri be ku.

⁸’Ba edematararu ’diyi adri aku ti du acisi, te ’ba onduaru ’diyi adri fe aokoni ambi ra.

⁹’Ba onduarurini agata garia ’ba ondua kokoruri be, aoko nya ’ba ondua kokoruri, azini eri ogu ogu, ovuzu e’yo ’yaasini yo.

¹⁰’Ba geri ndapi ari adazu ’diyi yi ’ba e’yo kokoruri ngu onzi, yi nda ’ba kililiruri ma idri dri jazu.

¹¹’Ba ondua kokoruri adri aoko ini ofu dria, te ’ba onduaruri adri ga ini ofuko si, eri i do e’yere.

¹²Opini bile coria e’yo inzoru eriria, ati’ba erini ’diyi dria nga ovu onzi,

¹³’Ba alioruri adri dri fu ’ba eri inzapiri be; te Yehovani adri yi mile ziiritro ra.

¹⁴Opi alio ma e’yo lipi e’yo adasiri ma ogunani nga pa so okporu i ’dani,

¹⁵Kali pi cota imbatasiri be yi ondua feni, te mva adile kule yaari nga drinza fe i andri dri.

¹⁶’Ba azi onzi ’yepi ’diyi ka ezu kakau, ezata ezu kakau indi; te ’ba onyiri ’diyi aga yi ndre yini e’deria va.

¹⁷Mi ma imba mva mini, eri nga ani fe mini ovuzu e’yo ’yaasi; ada, eri nga ayiko fe mi asia.

¹⁸E’yo ndreza nabini ka ovu yo, ’ba yi adri yi agei teza ceniri ku la, te ’ba azita ma ta mbapiri eri drilebaru.

¹⁹’Ba econi ati’bo imbazaru e’yo ’yozasi ku, a’disiku ka tro va ra ti, ngani asi ’ba drinia ku.

²⁰Mi ndre ’ba e’yo ’yopi mbele mbeleri ra ya? ’Ba eco asi ’bazu ’ba ondua kokoruri ma dria aga agu ’diri ma driari ra.

²¹’Ba ka ati’bo ini ku drimgboru engazu gbu mvaasi, vilerisi eri nga ofu eri ma: karimvaru,

²²’Ba aoko beri fe agata gazani engani; ’ba adra beri ma ezata tu.

²³Mu ’bani nga eri ’ba ele, te ’ba asi afu kokoruri nga inzita isu ra,

²⁴’Ba ti ecipi oguou beri eri ngu ’di i ngulupi onzi; eri eri tritani ra, te oluni e’yoni ku,

²⁵’Bani ’ba zuri fe gbagba ’bani, te ’ba i ma asi ’bapi Yehova ma driari nga i pa ra,

²⁶’Ba kakau yi adri asi ndriza nda opi ovu, te e’yo ’bani lizu kililiruri enga Yehova vu.

²⁷’Ba onyiru ’diyi yi ngu ’ba e’yo onzi ’yepiri onzi, te ’ba onziri ngu vini ’ba acipi i kililiruri onzi.