Read lugbara E'yo O'beza 3 Bible Online

E'yo O'beza 3 - lugbara bible

E'yo O'beza 3

¹Ma mvi la, mi dri ma avi imbata manisi ku, te asi mini ma mba azita mani ’diyi ma ta ci;

²a’disiku azita nde ’diyi nga fe o’du minini yi erezu kakau, eli mini adrizuidriru ’diyi be, nga vini drileba e’yo ’yaasiri fe mi dri indi.

³Mi fe yiki pi ma ku mi e’yo ada be ku; mi ombe yi mi ombelea, mi si yi karatasi mi asiari ma dria.

⁴Geri ’disi mi nga ondua isu, e’yo minini nga Mungu pi va ’ba be va indi.

⁵Mi a’i Yehovani mi asi driasi, mi ati mi ondua minisi ku;

⁶mi ma ni eri geri mini vusi dria, erini ngazu ani leti mini ’bazu kililiru.

⁷Mi ma ovu onduaru mi ma ngulupi ma milia ku; mi ma ru Yehovani, mi ma ona mi e’yo onzisi.

⁸E’yo ’diri nga rua mini ’ba alaru, mi fala ’bazu onyiru oso be indi.

⁹Mi inzi Yehovani afa mini ’diyisi dria’i, azini afa mini kapi oko ’diyisi dria;

¹⁰geri ’disi ero mini nga ga afa driasi tre, obi mini ’diyi vini nga ga patiefi su o’dirurisi tre, driniri razu va.

¹¹Mva mani, mi ngu cota Yehovani mi cozu imbatasiri onzi ku, mi ma ande vini egata erini; egazu mi driarisi ku indi.

¹²A’disiku Yehovani adri ega ’ba erini ile ’diyi ma dria, ekile atani egale mva ini lele turi ma driarile.

¹³’Ba ondua isupiri pi ma ayiko indi, ’ba e’yo vaza isupiri be,

¹⁴a’disiku oleza eriniri aga oleza dahabuniri ra, orodri erini aga mele onyiruri ra.

¹⁵Ondua nde ma e’yo aga nyoro ekaru ’diyiniri ra, ’ba econi afa dria ’bani ecole lele avasi ’diyi o’bizaru ondua be ku.

¹⁶Idri izururi ci eri ma dri ndiria eri ma dri ejiria lonyi pi indi inzita be.

¹⁷Geri erini ovu geri ayiko fepi ’diyi, leti erini ’diyi dria asi anzuruni.

¹⁸Ondua eri pati idriniri ’ba eri bipi ’diyi dri; ’ba dria eri ma ta mbapi ’dani ’diyi ovu ayikosi.

¹⁹Onduasi Yehova ’ba ndra nyaku eti ra; e’yo vazasi eri ’ba ndra ’bu ovuzu ’dani;

²⁰nita erinirisi eri co ndra yi aliru ma esele, ’bu iriti beri fe andrali oti va.

²¹Ma mvi la, mi mba ondua kililiruri ma ta e’yo amaza be; mi fe afa ’diyi ma avi mi, miliasi ku,

²²’dinile yi nga mi orindi ’ba idriru ani, yi nga onyi fe mi ombeleni ndrizu.

²³Mi nga di aci geri mini ma alia uri kokoru, kumu ngani mi pa si ku,

²⁴Mi ka la va, mi ngani ovu urisi ku; ada, mi nga la va, azini o’du koza mini nga alu alu.

²⁵Mi ma ru uri ecapi mbelekociciri ku, kani dri jata ’ba azi onzi ’yepi ’diyiniri ku indi eri ka nga ecea ra;

²⁶a’disiku Yehovani nga ovu asi teza miniruni, i eri nga mi pa ma ta mba, ’ba kazu eri bizu ku.

²⁷Mi ku onyi ’yeko ’ba yi sipi onyi nde a’izu ra ’diyi vu ku,mi dri ka ovu okpo be onyi nde ’yezu raria,

²⁸Mi ’yo mi agyi ma tia ku kini, Mi mu, mi emvi dika, ma nga di fe dru-de isu afa nde ovu ci mi vu ogogo.

²⁹Mi otu e’yo onzi mi agyi o’api mi ageia asi ’bapi mi driari ma ruaa ku.

³⁰Mi ga agata ’ba azini be toko ku eri ka e’yo onzi ’ye mi vu oko ku.

³¹Mi ovu ma’yalasi ’ba e’yo ’yepi eganasiri ma e’yosi ku, mi pe geri erini ’diyi ma azi aluni ku;

³²a’disiku ’ba ’yepi ambosi akari eri afa Yehovani ngule onziri’i, te eri ti eci ’ba asi kililiru ’diyi be.

³³Trita Yehovani ovu ’ba onzi ’diyi ma aku ma dria, te eri asi ndriza fe pari ’ba onyiru ’diyini adrizu aleniari ma dria.

³⁴Adaru eri ’ba edematararu ’diyi ede ede, te eri asi ndriza fe ’ba e’yere ’diyi dri.

³⁵’Ba onduaru ’diyi nga inzita isu awitaru, te idrita ’ba azazaru ’diyini eri drinzani,