Read lugbara E'yo O'beza 30 Bible Online

E'yo O'beza 30 - lugbara bible

E'yo O'beza 30

¹E’yo Aguri Yake mvini ’yole ’diyi; e’yo ecezani, Agu nde ’yo Itieli ma tia, adani Itieli pi ma tia Ukali be:

²Ada ma ondua kokoro aga ’ba azini ’diyi dria ra, Ma ovuni e’yo vaza ’ba’baruri be ku.

³Ma onini ondua ku, ma ovuni vini nita Mungu Alatararoniri be ku,

⁴A’di tu ndra uru ’bua azini esi va ranini ya? A’di oku ndra oli i ma dria ranini ya? A’di ombe ndra yi mirini i ma bongosi ranini ya? A’di ’ba nyaku ma kalati driani pa sozu okpore ’danini ya? Runi a’di’i ya? Mva erini ma ru ngoni ya? Mi ka ni ra!

⁵O’bi e’yo ’yoza Munguni dria ’bo; eri gomberele ’ba eri a’ipi ’diyi dri.

⁶Mi o’ba e’yo azini e’yo ’yoza erini ma cina ku, eri kazu egazu mi dria ku, mi kazu e’dazu inzo’baru ku.

⁷Ma mi zi e’yo iri ’diyisi; mi ma ga feko ma dri si ku de nga ma drani ku;

⁸Mi co ma esele e’yo tokori pisi e’yo inzorori be re; mi fe ma dri alio ku, kani lonyi amboru tu ku indi; mi fe ma dri nyaka capi masiri’i,

⁹ma kazu ovuzu; afa be tre mi gazu si ’yozu kini. Yehovani a’di ya? ’dinini ku; ma kazu vini ovuzu alioro tu, afa oguzu, Mungu mani ma ru cozu toko ku.

¹⁰Mi su asu ati’bo ma ruaa inzosi opi erini vu ku, eri kazu mi o’dazu ku, azini e’yo nde kazu mi ndezu ku.

¹¹Anzi ’bani azini indi, yi ma atapi o’dapi ’diyi, yi feni asi ndriza yi andripi dri ku.

¹²Anzi ’bani azini indi yi ’bapi alaru ceni yi ma ngulupi ma milia ’diyi, te de yi ojini nga yi ma ondi alaru ku.

¹³Anzi ’bani azini indi-yi enga yi ma mile uru afusi ’doni ya! Mile ongoco’bi yini enga yi uru tu ’doni ya!

¹⁴Anzi ’bani azini indi, si yini seile, sikala yini si ekile elile, ’ba alioru ocizu nyakuarisi ra, ’ba afa kokoru onyazu ’ba ma eseliarisi ra indi.

¹⁵Drudru ma ezoanzi yi iri; yi ’yo ’dani, Mi fe, mi fe. Afa ecopi trapi ku ’diyi yi na indi; adani, afa ’diyi su ’yoni vini kini, ca ’bo-’dinini ku:

¹⁶Pari ’ba drazaniri pi, opojo ondoruri pie, nyaku ozoo mvupi ti, yini cazu erini kuri pie, aci ’yopi, ca ’bokuri pie indi.

¹⁷’Ba ma mile i atini ’bapi aparakaru, i andrini edepi inzimakoruri, koreke e’buti alia ’diyi nga mileefini oga ra, roko anzi nga eri ma za oce ra,

¹⁸Afa na indi ma dri osutaru tu aga ra: adani, afa su mani e’yoni nile ku ’diyi:

¹⁹geri ajini sazu ’buari pi, geri urini acizu oni ma ruaari pie, geri oguruni acizu miri ma aliari pie, geri agupi pini zamva beri pie.

²⁰Oku ali o’bapiri adri ’ye ’dinile: eri nya ra, eri i ma ti ini ra, te eri ’yo ra, Ma ezani ku.

²¹Nyaku ya ya e’yo nasi; adani, e’yo su erini ecole a’ile ku ’diyisi:

²²ati’bo ’bale opiruri pi, ’ba ondua kokoru trapi nyakasiri pie,

²³oku ngule onzi mupi agupia ’bori pie, zamva ati’boru oku i ma driliari ma afa nyapi awurusoruri pie.

²⁴Afa su ’diyi yi nyiri nyiri nyakua, te yi onduaru tu:

²⁵yekia yi ovuni suru okporu ku, te ti, yi nyaka yini ma ta mba ayisi;

²⁶ando yi suru okpo kokoruri, te ti, yi ’ba jo yini oni ojia;

²⁷ombi ovuni opi be ku, te ti, yi fu mu dria tualu ngulu ngulu;

²⁸’ba eco olokoto ’duzu drisi, te ti, eri adri ovu opi vile jo ma alia.

²⁹Afa na aci nyonasi; adaru afa su yi aci yini nyoga be tu:

³⁰kami, anyapa dria ndepi okposi, i ojapi kalaa afa azini ma e’yosi aluni kuri pi;

³¹oce ongu be turi pie, ndriago pie, azini opi ’bani engazu ruania kuri pie.

³²Mi ka ’ye onduaakosi mi ipizu, kani mi ka e’yo onzi otu mi asia, mi bi mi ti mi drisi ci.

³³A’disiku ’ba ka lesu co ra oduni nga efuni, te ’ba ka ’ba omvule nyi arini nga efuni; ’dinile indi ’ba ka adra ’ba okposi awatani nga efuni.