Read lugbara E'yo O'beza 31 Bible Online

E'yo O'beza 31 - lugbara bible

E'yo O'beza 31

¹E’yo opi Lemuelini ’yole ’diyi; e’yo eceza eri ma andrini eri imbazuri:

²Ma mvi, ngoni ya? E’yo ngoni ya, mva ma ma opojoniri? Te e’yo ngoni ya, mi mva oyo soza mani ’diyiniri?

³Mi ma fe okpo mini okuyi dri ku, kani adriza mini afa adripi opi dri japiri dri ku indi.

⁴Lemueli la, sini opi yi ku, ada, patiefi su mvuzuri sini opi yi ku; opianzi ma ’yo, Ewa ngoa? ’diniri ku yi kazu mvuzu ku, yi dri kazu

⁵ani azita ma e’yo avizu ku, yi kazu ’ba inzale ’diyi ma azi ma e’yo ezazu e’yo lizasi ku.

⁶Mi fe mini afa mvuza okporuri ’ba ’yepi dri japiri dri, mi fe patiefi su ’ba asi otipi tu ’diyi dri;

⁷mi fe eri ma mvu, alio erini ma e’yo ma avi eri dri ani, eri ma ega candi ini dika beni.

⁸Mi zi mi tile ’ba e’yo ’yopi ku ’diyi ma aza kozu, ’ba dria adile kule a’dule ’diyi ma e’yosi indi.

⁹Mi zi mi tile, mi li e’yo kililiru, mi li e’yo ’ba alioru ’diyi pini kilili ’ba afa kokoru ’diyi be. Oku adieyaruri inzizu

¹⁰A’di eco oku onyiruri isuzaruni ya? E’yo erini aga nyoro ekaru ajeambosi ’diyi drianiri ra.

¹¹Agupi oku nderini a’i eri ma e’yo asi driasi, eri ngani ece afa onyiru ’bani isulerisi ku.

¹²Eri agupi ini ’ye onyiru, ’yeni eri onzi ku, ewu ini ovuzu idrirurisi dria.

¹³Eri kabilo ma ’biko nda pamba be, eri azi nga i ma drisi ceni.

¹⁴Eri si ekile oguru afa ejipi ’diyile; eri nyaka ini eji engazu ziri.

¹⁵Eri enga de nga angu atini ku, eri nyaka awa ’ba i vile akua ’diyi dri, azini eri azi awa ezoanzi ini dri indi.

¹⁶Eri adri amvu azini ma e’yo ega, jezu indi; azi eri ma dripamvunirisi eri isi zabibu amvua.

¹⁷Eri a’di okpo i ma opilia opilemvuru, eri fe i ma wuni ovuzu okporu.

¹⁸Eri ndre afa oziza ini ovu orodriru. Eri ma tala inyuni i inisi ku.

¹⁹Eri ’ba i dri afa kabilo ’biko pizuri ma ruaa, dri ini bi pati kabilo ’biko trazu ruaniari ci.

²⁰Eri aja i dri ’ba alioru dri, ada, eri eju i dri ’ba afa kokoru ’diyi vu.

²¹Eci ovuni urisi si emverusi, egazu egbeni nga ’ba i vile akua ’diyi fu, ’dinini ku, a’disiku ’ba dria i vile akua ’diyini bongo ekaru sule yi ma ruaarisi,

²²Eri ca i dri birisi lokondresi; eri su i ruaa bongo cale pamba alarusiri pi okalakokalaruri be.

²³Agupi erini kalitilea ’ba e’dazani, erini riria ’ba ’wara suruni ’diyi ma eselia,

²⁴Eri bongo ede pamba alarusi, fezu yi ozizu; eri opilemvu erini pile ’diyi fe ’ba adripi afa ozipiri dri.

²⁵Okpo pi inzita be yi eri ma bongoru, eri ogu ayikosi e’yo ngapi ecapi ndorisi.

²⁶Eci zi i tile e’yo ’yozu onduasi, eri ma andre dria imbata yikiniri ci.

²⁷Eri ndre ’ba i vile akua ’diyi ma geri onyiru, eri nyani enya ovuniri ku.

²⁸Anzi erini enga awa’difosi eri ma ru inzizu; agupi erini enga indi, te eri inzi eri ra, kini:

²⁹Ezoanzi kakau ’ye onyiru tu, te mi aga yi dria ra.

³⁰E’daza onyiruri alia lokiri ci, rua ndriza eri toko, te oku Yehovani rupiri, yi nga eri inzi’i.

³¹Mi fe eri ma isu azi ini ’yele i drisiri ma orodri, ’yeta erini ’yele ’diyi ma ovu inzitaru eri dri kalitilea.