Read lugbara E'yo O'beza 4 Bible Online

E'yo O'beza 4 - lugbara bible

E'yo O'beza 4

¹Anzi mani, emi eri imbata atani feleri, emi co bile emi ma ni e’yo vazu beni;

²mani imbata onyiru fele emi dririsi: emi ku azita mani ku.

³A’disiku ma ovu ndra mva e’yereru ata mani dri, ma ovu mva alu ma andrini lele turi.

⁴Te ma ati imba ndra ma ra, eri ’yo ma tia, Asi mini ma mba e’yo mani ’yoleri ma ta; mi ma ’ye mani azilerile, mi nga di ovu idriru.

⁵Mi nda ondua, mi nda e’yo vaza, mi dri ma avi e’yo efupi ma tilia ’diyisi ku, mi oja mi kalaa yi kuzu ku. Mi ku eri ku, te eri nga mi ta

⁶mba; mi le eri avasi, te eri nga mi agei te.

⁷Ondua agani, mi ma nda ondua’i; adaru, afa dria mini ndale ’diyisi mi ma nda e’yo vaza’i.

⁸Mi inzi eri inzi, eri nga mi idri drile; eri nga mi ’ba inzitaru, mi ka mi ebi eri be.

⁹Eri nga onyiafa ndrizaruri ’ba mi dria; eri nga oku ndrizaruri su mi dria indi.

¹⁰Mi eri, mva mani, mi a’i e’yo mani ’yole ’diyi, eli mini adrizu idriru ’diyi nga ovu ani kakau beni.

¹¹Ma imba mi geri onduanirisi ’bo; ma ce mi dri e’yo kililiruri ma geria ra.

¹²Mi ka aci ra, ’ba ngani mi pa ombe ku; mi ka nzu ra, afa azini ngani mi pa si ku.

¹³Mi bi imbata ci, mi fe eri ma mu ra ’dini ku; mi mba eri ma ta, erini ovule idri miniri’irisi.

¹⁴Mi fi acizu ’ba onzi ’diyi ma gerisi ku, mi aci ’ba e’yo onzi ’yepi ’diyi ma letia ku.

¹⁵Mi ona mi, mi aga leti nderisi ku; mi oja mi kalaasi, mi aga drile,

¹⁶A’disiku yi koni o’du ku, de nga yi ’yeni e’yo onzi ku; o’du koza yi ma milia yo, de nga yi feni aguni e’dezu ku.

¹⁷A’disiku yi enya azi onziniri nya, yi vini patiefi su egananiri mvu’i.

¹⁸Te ’ba kililiru ’diyi ma geri ovu ekile diza dipi di dirile, eri di ’dani drile drile, cazu anguni ovuria etururia.

¹⁹Te ’ba onzi ’diyi ma geri ovu angu bizale; yi nini a’di afa si yi ma pani yari ku.

²⁰Mva mani, mi eri e’yo mani ’yole ’diyi e’yere; mi co bile e’yo mani oluleri vu.

²¹Mi fe yi ma avi mi miliasi ku; mi mba yi ma ta mi asi ma alia.

²²E’yo nde ’diyini ovule idrini ’ba yi isupi ’diyi dri, azini rua ala yi ma rua dria dririsi.

²³Mi mba mi asi ma ta mi asi driasi; e’yo idrinirini efule aleniarisi.

²⁴Mi ku ti e’yo ’yopi ambosi akari ja, mi ku tile e’yo lokiriru ’yopiri mi vurisi ziri,

²⁵Mi fe mi mile ma lu drile, mi ku mi mile ongoro’bi ma fe ti mi drilialeru kilili.

²⁶Mi ega pari mini mi pa ’bazuri ma e’yo e’yere, geri mini ’diyi dria nga adri ani kililiru.

²⁷Mi oja mi dri ndia kani dri ejia ku; mi enze mi pa e’yo onzi aliarisi ra.