Read lugbara E'yo O'beza 5 Bible Online

E'yo O'beza 5 - lugbara bible

E'yo O'beza 5

¹Ma mvi la, mi eri ondua mani e’yere, mi co bile e’yo vaza mani vu;

²mi ma mba e’yo amaza ma ta ani, tile mini ma mba nita ma ta ’dani ani.

³A’disiku oku mile aciruri ma tilia e’yoni ti anyuosole, ti eriniri inikini aga odu ra;

⁴te vilerisi eri ovu okangali enyata okarurile, sini ovu cizaru sei si irileirilerile.

⁵Pa erini si va dra vu; pa ’baza erini ebi yi Pari ’ba drazaniri ma geri be ci;

⁶eri asini geri idriniri ma e’yosi ku; geri erini mu ’dile ’dole, te eri nini e’yoni ku.

⁷E’yo ’disi emi eri e’yo mani, emi anzi mani, emi ku e’yo mani ’yole ma tisi ’diyi ku fo.

⁸Mi fe geri mini acizuri ma ovu oku nde be ziri ziri, mi si eri ma jotilea ogogo ku;

⁹mi kazu mi ru kuza onyiruri fezu ’ba azini dri ku, mi kazu eli mini ’diyi fezu ’ba yiki kokoru ’diyi dri ku;

¹⁰ani’ba kazu trazu lonyi minisi ku, azi mini okporu ’diyi kazu ovuzu ’ba jururu vile joa ku;

¹¹mi kazu izu otazu ewu mini vilerisi, mi rua za berini ngazu dri jazu raria ku,

¹²’yozu kini, Eyawaye! Ma ngu ndra imbata ’doni, ma asi ede ndra vini e’yo ’bani egazu ma driari ’doni!

¹³Ma erini vini ndra ’ba ma imbapi ’diyi ma ti ku, ma coni vini ma bile ’ba imbata fepi ma dri ’diyi vu ku.

¹⁴Ace were ma ’ye ndra fi e’yo onzi dria ma alia, okuza ’bani yi okuzu tualuri ma eselia ra.

¹⁵Mi mvu yi ’bile miniri ma alia, vini yi adiza yi a’di miniri ma alia.

¹⁶Yi a’di mini ma ra amve ya? Eri ma ra yi razale geria ya?

¹⁷Mi fe yi ma ovu mi ma ngulupi dri a’dule; yi ma ovu ’ba jururu ’diyi dri mi be tualu ku.

¹⁸Yi a’di miniri ma ovu drilebaru, ayiko ma fu mi oku mini bile de mi karilaururisi;

¹⁹eri ekile nyai ndrizaruri pile ova ndrizaruri be. Eri ma alesi ayiko ma fu mi o’du dria, leta eriniri ma ava ma va mi etuzu.

²⁰Ma mvi la, oku mile aci beri ma avani mi va a’disi ya? Mi mi la oku saaruri ma agatia a’disi ya?

²¹A’disiku geri aguni ovu Yehova ma milia, eri ega geri erini ma e’yo dria e’yere.

²²E’yo onzi ’ba onzini ’yele ’diyi nga eri bi ra, eri nga ovu ombezaru ezata iniri ma bakasi.

²³Eri nga dra imbataakosi, aza erini turisi eri nga aba ra.