Read lugbara E'yo O'beza 7 Bible Online

E'yo O'beza 7 - lugbara bible

E'yo O'beza 7

¹Ma mvi la, mi bi e’yo mani ’yole ’diyi, mi mba azita mani ’diyi ma ta mi vu ci;

²mi bi e’yo mani azile ’diyi, mi ovu di idriru ani, mi mba azita mani ma ta ekile mileefi minile;

³mi ombe yi drianzi mini ma ruaa, mi si yi karatasi mi asiari ma dria.

⁴Mi ’yo ondua ma tia, Mi ma amvi’i; mi ’da e’yo vaza ma ru mi amviazi’i;

⁵yi ma mba mi ma ta oku saarurisi, oku mile aciru ’ba inzupi lokirisirisi indi.

⁶A’disiku mani pa soria ma vile joa derisa vualeru, ma lu amve derisa talaasi,

⁷azini ma ndre ’ba ondua kokoru ’diyi ma eselia, ma ama karile ma eselia karilau ovupi e’yo vaza kokoruri

⁸erini agaria geria oku nde vile aperitiasi ogogo, erini firia geri mupi eri vile joarisi

⁹omuneritisi, ondreni, angu bizasi, ini be.

¹⁰Te ma ndre, oku nga efu dri fu oku nde osu i awuoule, eri ma asia lokiri ga tre.

¹¹Eri e’yo o’yo o’duko urusi afuru, eri ’ye ini lelerile, nduniri rini va i vile akua ku;

¹²etu azinisi eri geria, azinisi eri cuua, azinisi eri ’ba te geri aritiasi dria.

¹³Geri ’disi eri bi eri, eri o’de eri ombelekoa zitasi, eri ’yo mileacisi drinza kokoru tinia kini:

¹⁴Edeta asi anzuruni ovu te ma vu ci, andru ma fe afa mani oyoni soleri ’bo;

¹⁵e’yo ’disi ma efu te lezu dri fuzu mi be, mi mile gazu asi driasi; ma isu di mi ’do.

¹⁶Ma aja bongo cale wura be korikoriru ’diyi pari mani lazuri ma dria, yi bongo cale pamba Misiriarisi’diyi;

¹⁷ma ’ba afa arikariru gbolo manili ma dria ’bo, odu arikariruri pie, ojo nzoru pie, pari madalasiniruri ma o’boroko pie.

¹⁸Ama emu, ama ma tra alesi de nga etu efuni ku; ama ma ovu di ayikosi ama eselea letasi.

¹⁹A’disiku agupi mani ovuni akua ku; eri mu aci izurua;

²⁰eri ji silingi jurua alia i be indi; eri nga emvi akua mba emvesi ndo.

²¹Erini e’yo ’yole aluzaru kakaurisi,eri ewi eri ma bile; eri omi eri inzita lokiriru i ma tiliarisi.

²²Eri bi eri ma vuti coti, ekile monio ’bani jile so sorile, ekile ova embani bile ra

²³de nga ’ye soni asini kurile; ekile aria sapi mbele ese vurile; te eri nini kini eri ovu idri ini bizuri ku.

²⁴E’yo ’disi, anzi mani la, emi co di bile ma vu fo, i emi eri e’yo efupi ma tilia ’diyi e’yere.

²⁵Mi asi ma fe dri geri erinirialeru ku, mi fe mi abazu leti eriniri ma alia ku indi;

²⁶a’disiku eri o’be ’ba erini ofule ’diyi va kakau ’bo; ada, ’ba dria erini ofule kai kai ’diyi yi o’biru.

²⁷Jo eriniri ovu geri muzu Pari ’ba drazaniria, sizu va dra vile joari’i.