Read lugbara Eklesiaste 1 Bible Online

Eklesiaste 1 - lugbara bible

Eklesiaste 1

¹’Ba e’yo Olupi, Daudi mvi, opi Yerusalemuari ma e’yo.

²’Ba e’yo Olupiri ’yo ra, E’yo tokoru e’yo tokoniri, e’yo tokoru e’yo tokoniri! E’yo dria yi toko.

³’Ba ovu orodri be ngoni azi okporu dria erini ngale etu etiari ma e’yosi ya?

⁴A’bianzi mu ra, a’bianzi azini ’diyi emu ra, te nyakuni adri ’dani ’danini.

⁵Etuni efu, etuni ’de indi pari erinia, eri mu pari erini efuzuria mbele mbele.

⁶Olini li, oja i vini angu urulerua, nga i oja angu andralerua indi; eri oja i ’dani acita erini ma alia, oli nde nga emvi dika acita erini kuru ’diyi vusi.

⁷Yi raza ra dria miria, te miri gani ani ku; pari yi raza ’diyini razuria, ’daa yi emvi dika.

⁸Afa dria ga tre andesi; ’ba econi e’yoni oluzaru ku; mile trani afa nezasi ku, azini bile trani e’yo erizasi ku indi.

⁹Afa ndra ovupi driori eri afa ngapi ovupi ndori’i, afa ndra ’yele ’bori eri afa yini nga ’yeleri’i; afa o’diru etu etia aluni yo.

¹⁰Afa azini ’bani ani e’yoni ’yole kini, Emi ne, afa o’diru ’do, ’diniri indi ya? Afa nde ovu ndra drio, ewu ama drilia oko alia indio ’diyi ma!

¹¹A’bianzi drio ’diyi ma tavi avi ’bo; azini a’bianzi ngapi emupi vile ’diyi ma tavini nga avi indi ’ba ngapi emupi ndo ’diyi ma eselia,

¹²Ma’i, ’Ba e’yo Olupiri, ma ovu ndra opiru Israeli ma drilia Yerusalemua.

¹³Ma fe ma asi afa dria ovupi ’yezaru ’bu ma etia ’diyi ma e’yo ndazu azini ndruzu onduasi; e’yo nde ’yeze eri azi ocokoru Munguni fele anzi ’bani dri ande-zuri.

¹⁴Ma ndre azi ndu ndu ovupi ’yezaru etu ma etia ’diyi dria ra; azini emi ndre, e’yo dria eri e’yo tokoni, si kile asi ’bazu oli bizurile.

¹⁵’Ba econi afa goligoliruri edezaru kililiru ku, azini afa ecepi ’diyi yi ma kalafe lakokoru,

¹⁶Ma ega e’yo ma ngelupini ma asia ceni, ’yozu kini, Mi ndre, ma isu mani ondua amboru tu aga ’ba dria ma drilia oko Yerusalemua ’diyi ra; ada ma asi ndre ondua pi ma e’yo nita be tu aga ra.

¹⁷Ma ’ba ndra ma asi ondua nizu, e’yo azazaruri pi nizu e’yo ondua kokorori be indio Te ma va kini e’yo ’diri indi eri asi ’bazu oli bizurile,

¹⁸A’disiku ondua amboruri ma alia ocoko amboru indi, ’ba nita erepi amboruri ere candini.