Read lugbara Eklesiaste 10 Bible Online

Eklesiaste 10 - lugbara bible

Eklesiaste 10

¹Onyukonyu odrapi alenia ’diyi fe ’ba afa arikariru edepiri ma oduni ovuzu aji nguza be onzi; ’dinile onduaako wereri nzi tu aga ondua pi inzita be ra,

²’Ba onduaru ma asi ovu eri ma dri ndiria, te ’ba ondua kokoru ma asi ovu eri ma dri ejiria.

³Ada, ’ba ondua kokoru ka aci geria, e’yo vaza avi erini ra, eri ’yo ’ba dria ma tia kini eri ’ba ondua kokoruni.

⁴Opi ma asi ka enga mi aokoru, mi ku pari ku; ovuzu e’yereri ezata ambo ambo ’diyi ra.

⁵E’yo onzi mani ndrele etu etiari indi, ekile ezata engapi opi vurile:

⁶yi ’ba onduaako inzitaru tu, te ’ba afa e’iru ri pari eleria.

⁷Ma ndre ati’ba yini riria akanya dria, azini ’ba opianziru ’diyini aciria nyakua pasi ati’bale.

⁸’Ba ’bile gapiri nga e’de aleniani; urini nga ’ba kali aku ageiari onyopiri ga ra.

⁹’Ba oni gapiri nga azo isu oni ndesi; ’ba eja osipiri eri ’di drileonzi ma sia.

¹⁰Aya ma si ka du ra, ka sini ji ku, eri ma ’ye okposi aga ra; te ondua ovu orodriru dri cezasi.

¹¹Uri ka ’ba ga de nga yi obeni eri ku, ’ba uri obepiri ma orodri yo.

¹²E’yo efupi ’ba onduaru ma tilia ’diyi yi asi ndriza be, te ’ba ondua kokoruri ma tileni nga eri ma ngulupi ki’i.

¹³E’yo efupi eri ma tiliari ma e’dozani onduaakoni, te oluta erini ma asiza eri e’yo azazaru candi fepiri’i.

¹⁴’Ba ondua kokoru o’ba e’yo ’yoza kakau, te ’ba nini e’yo ngapi i ’yepiri ku, a’di eco e’yo ngapi ovupi eri ma vutiari oluzaru eri ma tiani ya?

¹⁵’Ba ondua kokoru ’diyi ma azi ngaza fe yi dria alu aluni andezu, te yi nini geri amboruari ku.

¹⁶Eyawaye, angu la! opi mini ovu mvani, azini ’ba ’wara mini ’diyi ka nyaka nya o’bitisi!

¹⁷Awa’difo, angu la! opi mini ka ovu opi ma mva, ’ba ’wara mini ka nyaka nya etu ’yekeria rua okpo ndazu, te atizu ewasi ku!

¹⁸Ovusi jo dri asu ira, adiko azini asuzu dria kurisi fe jo drini ra ra,

¹⁹’Ba yi omu ede oguta ma e’yosi, patiefi ma suni fe idrini ovuzu ayikosi; silingini nga afa dria ma e’yo omvi ra.

²⁰Mi tri opi ku, kani asisile minisi ku indi, mi tri ’ba afa e’iru jo mini lazuli ma alia ku; a’disiku aria ’buari nga o’duko mini idri, afa opile beri nga e’yoni olu ra.