Read lugbara Eklesiaste 11 Bible Online

Eklesiaste 11 - lugbara bible

Eklesiaste 11

¹Mi ’be mikate mini yi mirini ma dria, mini ngale eri isule dika o’du kakau ma vutiarisi.

²Mi awa eseleni ’ba aziri dri kani ’ba aro dri, mini e’yo onzi ngapi ovupi nyakuari nile kurisi.

³Iriti ka ga tre ozoosi yi nga yi osu nyaku dria; azini pati ka ’de kala uruleru kani kala andralaru, pari patini ’dezuria eri nga la ’daa.

⁴’Ba oli ndrepiri ngani ori ri ku; ’ba iriti ma e’yo egapiri ngani anya lo ku.

⁵Mini oli ma geri nile kurile, mini geri falani zozu oku okporovururi ma okpojo ma aliari nile kurile indi, ’dinile mi nini Mungu afa dria ’yepiri ma azi ku.

⁶Mi ri ori mini o’bitisi, ondresi mi nze mi dri ku; a’disiku mi nini ku afa ngori nga i ’ye drilebasi, kani ’diri, kani ’dari, kani yi iritro nga ’ye onyiru yani.

⁷Ada, diza eri aluzaru, mileni etu ndrezuri ovu ayikoru tu.

⁸Ada, ’ba ka ovu idriru eli kakau, eri ma ovu ayikosi eli ndesi dria; te eri ma ega o’du inini ’diyi, yini ngale ovule kakaurisi, E’yo dria emupiri eri e’yo tokoni.

⁹Karilau, mi ma ovu di ayikosi eli mini karilaunirisi, mi fe mi asi ma fe mi dri ayiko ewu miru ovuzu karilaururisi; mi aci geri mi asini leleri ma alia, azini mi mileni ndrelerile. Te mi ma ni e’yo ’diyisi dria Munguni nga mi eji e’yo liza ma alia ra.

¹⁰E’yo ’disi mi ofu candi mi asiari amve, mi nze e’yo onzi mi ruaasi; te ewu karilauniri pi yi toko, ewu ’ba ruani ovuzu okporu turi be.