Read lugbara Eklesiaste 12 Bible Online

Eklesiaste 12 - lugbara bible

Eklesiaste 12

¹Mi ega Mungu mi ’Bapiri o’du mini ovuzu karilaururisi, de nga o’du onzi ecani ku, de nga eli nde mini ngale ’yole kini, Ma ovu ayikosi yisi ku, ’diyi ecani ku;

²de nga etu pi bini iniciciru diza pie, mba pie, ’bi’bio pie ku, de nga iriti emvini ozoo ma vutia ku;

³o’du nde ’dasi ’ba jo agei tepi ’diyi ma ruani nga ya ya, ’ba okporu ’diyi nga avu va, ’ba anya ’ipi ’diyi nga yi de ra yini ovule lamirurisi, ’ba angu lupi derisasi ’diyi nga bi iniciciru indi,

⁴jotile yi nga ovu ecizaru ci geri tia; awu anya ’izuri ka nga ovu were, ’ba ka nga enga aria ma awusi ra, ka nga ezoanzi ongo ngopi ’diyi ji dria va;

⁵ada, yi nga ovu urisi afa izururi ma e’yosi, azini e’yo uriuriru ’diyi nga ovu geria ci, ofunzeni nga fu zo ra, ombini nga ovu teriru, avani nga oti ra; a’disiku ’ba mu jo ini ’daniria, azini ’ba lulu gapi ’diyi yi geria ci;

⁶de nga ayuni anziriku dahabururi ku, de nga awala meleruri nyoni i ku, de nga imvu drani yi a’di ma tia ku, de nga afa trale omberuri nyoni i ’bile yi ta mbazuria ku,

⁷de nga irifura mvini nyakua kile erini ovule ndra okorile ku, de nga orindi mvini Mungu eri fepiri vu ku.

⁸E’yo toko e’yo tokoniri, ’Ba e’yo Olupiri ’yo ra; kini, e’yo dria eri e’yo tokoni.

⁹Azini indi ’Ba e’yo Olupirini ovule onduarurisi, eri imba ’ba onita onizu ’dani; ada eri ega e’yoni i asia, eri ndru e’yo o’beza yi otizu kililiru.

¹⁰’Ba e’yo Olupiri o’bi e’yo ayiko fepi ’diyi ndazu, ovupi sizaru kililiru, e’yo adaru ’diyi.

¹¹’Ba onduaru ma e’yo ovu ekile kali akararu ’diyile, e’yo ’ba kabilo ocepi alurini fele, ’ba okuza ma dri cepi ’diyini ecarale ’diyi yi ekile ala odile kirikiri ’diyile.

¹²Azini drinia, mva mani la, mi a’i imbata fo Azi buku kakau sizuri ma asiza yo; e’yo kakau onizu fe ’ba ruani andezu.

¹³E’yo asiza eri ’di’i; e’yo dria ovu erizaru ’bo Mi ru Mungu, mi mba azita erini ’diyi ma ta; e’yo ’diri eri azi ’bani dria.

¹⁴A’disiku Munguni nga azi dria ji e’yo liza ma alia, e’yo zizaruri be dria, kani eri onyiru, kani onzi.