Read lugbara Eklesiaste 3 Bible Online

Eklesiaste 3 - lugbara bible

Eklesiaste 3

¹Afa dria alu alu ovu ewu yini be, e’yo dria ’bu ma etiari ovu etu yini be indi;

²etu ’bani osizuri pi, etu ’bani drazuri pie I etu ’bani afa sazu nyakuari pie, etu afa sale nyakuari okuzuri pie;

³etu ’ba fuzuri pie, etu ’ba rua atizuri pie; etu afa oguzu vari pie, etu afa edrezu ururi pie;

⁴etu wuzu mindresiri pie, etu oguta oguzuri pie; etu awu wuzuri pie, etu ongo tuzuri pie;

⁵etu oni o’bezuri pie, etu oni okuzu tualuri pie; etu ’ba o’dezu avasiri pie, etu ’ba o’deza kuzu jari pie;

⁶etu afa ndazuri pie, etu afani avizuri pie; etu afa ta mbazuri pie, etu afa dazu amveri pie;

⁷etu bongo osizuri pie, etu bongo sozuri pie; etu ovuzu ciriri pie, etu e’yo ’yozuri pie;

⁸etu ’ba lezu avasiri pie, etu ’ba nguzu onziri pie; etu ombani pie, etu asi anzuruniri pie.

⁹’Ba azi ngapi okposiri ma orodri ngoni azi okporu erini ma alia ya?

¹⁰Ma ndre azi ewaru Munguni fele ’ba ma ori dri yini andezu aniri ra.

¹¹Eri ede afa dria ndrizaru ewu yinisi: eri ’ba egata ewu ’dani ’danirini ’ba ma asia indi, te ti, ’ba econi azi Munguni ’yele ’bori ma e’yo ndazu nizu engazu e’dozania kpere asizaniria ku.

¹²Ma ni ra kini afa azini yi dri onyiru agapi rani yo, lu yi ma ovu ayikosi, ma ’ye onyiru de nga yi drani ku;

¹³azini indi Mungu fe ’ba dri afa feza ’dini, yi alu alu ma nya, ma mvu, ma ovu ayikosi azi yini ma alia onyiru.

¹⁴Ma ni ra kini afa dria, ka ovu ngoni ti, Munguni ’yeleniri nga adri ’dani ’danini; ’ba econi afa azini o’ba ruania ku, ’ba econi vini afa azini onzezaru ruaniasi ku indi; Mungu ’ye ’dini kini ’ba ma ovu urisi eri ma drilia ani beni.

¹⁵Afa ovupi curu’do indiri eri afa ndra ovupi driori’i; te afa ngapi ovupiri eri afa ndra ovupi driori’i; te Munguni afa agapi ’bori nda dika.

¹⁶Azini vini indi ma ndre etu etia ’dini, e’yo onzi indi pari e’yo lizuria, azini e’yo onzi indi pari e’yo onyiruruna.

¹⁷Te ma ’yo ma asia kini Munguni nga ’ba kililiru ’diyi pi ma e’yo li, ’ba onzi ’diyi be; a’disiku ewu indi e’yo dria ma e’yosi, azini azi dria ma e’yosi indi.

¹⁸Ma ’yo ma asia, Eri ’dini ’ba ori ma e’yosi, ’dini Mungu eco yi o’bizaru ani, yi ma ndre ani kini yi ma ngulupi ovu kile anyapa asea ’diyile.

¹⁹A’disiku e’yo alu i ’yepi ’ba ma ori ma ruaari ’ye i anyapa ruaa indi; ada, afa alu eca yi ma ruaa driani: ekile alurini dralerile aziniri dra alu indi ’dinile. Ada, yi dria ovu ava ’yaza be alu, te ’ba agani anyapa aluni ku; e’yo driani ovule tokorurisi.

²⁰Dria mu pari alua, dria ebi enga irifura ma alia, dria nga eca irifuraru dika.

²¹A’di ni orindi ’bani ma e’yo kani eri tu uru, kani anyapaniri eri si va nyakuarini ya?

²²E’yo ’disi ma ndre afa azini onyiru agapini yo, pe lu ’ba ma ovu ayikosi azi erini ma alia, a’disiku ’diri esele eriniri; te a’dini nga eri omvi dika afa i ’yepi eri ma vutiari ndrezuni ya?