Read lugbara Eklesiaste 5 Bible Online

Eklesiaste 5 - lugbara bible

Eklesiaste 5

¹Mi mba mi pa ma ta mini muria Mungu vile joa; a’disiku esizu ogogo e’yo erizuri aga mini ’ba ondua kokoru ’diyi ma edeta fezuri ra; yini nile kini yi e’yo onzi ’ye kurisi.

²Mi ’yo e’yo azini egata kokoru mi tilesi ku, mi asi ma ’ye mbele mbele e’yo azini ’yozu Mungu ma drilia ku, te Mungu eri ’bua, mi’i mi ovu nyakua; e’yo mini ’yole ’diyi ma ovu di were.

³A’disiku orobini ’ba obi azi kakau ma e’yosi, azini ’ba ondua kokoruri ma o’dukoni efu e’yo o’biru ’diyisi.

⁴Mi ka oyo so Mungu vu ci, mi te eri ofezu ku; a’disiku eri ovuni ayikosi ’ba ondua kokoru ’diyisi ku. Mi ofe afa mini oyoni soleri ra.

⁵Oyo sozu kuri onyiru aga oyo sozu te ofezu kuri ra.

⁶Mi ku mi tile ma fe mini e’yo onzi ’yezu ku, vini indi mi ma ’yo malaika ma tia kini, Ma avi avi, ’dini ku; Mungu ma ovu adrasi erini o’duko mini eriria, azi mi drini ’yeleri ezazu a’disi ya?

⁷E’yo ’diri ’ye i ’dini orobi o’biru piyi ma e’yosi, e’yo toko toko ’diyi pie, e’yo ’yole o’biru ’diyi pie indi; te mi ru Mungu.

⁸Mi ka inzata ’bani ’ba aliarioru ’diyi inzazuri ndre angu azini ma alia, ’bani e’yo liza kililiruri pi asuzu okposi e’yo adaru be, mi ma osu e’yonisi ku; a’disiku ’ba uru drile tu ’ba uruleru ’diyi agapi rari adri e’yoni ne ra; ’ba uruleru ’ba ’diyi agapiri indi.

⁹Azini indi, afa nyakuni kaleri ma orodri eri ’ba driani, ka tro opini ti, amvuni eri ma aza koni.

¹⁰’Ba dahabu lepiri ngani tra dahabusi ku; ’ba afa o’biru lepiri ngani tra afa erezasi ku indi: e’yo ’diri e’yo tokoni indi.

¹¹Afa ka ezu tre, ’ba yi nyapi ’diyi ezu alu indi; e’ini ani a’di orodri isu ya? Eri lu kiri yi one milesi a’dule.

¹²’Ba azi ngapiri ma o’du koza alu tu, ka nya were kani tu ti; te afa e’i ma lonyini oga eri dri o’du kokokoru si.

¹³E’yo onzi mani ndrele etu etia candi fepi turi eri ’di: lonyi e’ini tani mbalerini candi ejizu e’i ma ruaari,

¹⁴vutinia lonyi nde avi drile onzisi; eri ka mva ti ’bo, drinia afa aluni yo.

¹⁵Ekile erini ndra efule andri ma opojoa pililirurile, eri nga mu pililiru erini emulerile, afa azini azi erini ma orodriru erini ecole jile i ma driani yo.

¹⁶E’yo ’diri e’yo onzi candiru turi indi: eri nga mu ra trotro ekile erini emulerile; te ’ba azi ngapi oli bizuri ma orodri ngoni ya?

¹⁷O’du erini ma alia dria eri afa nya angu iniaa, eri i ecandi tu, azo pisi aoko be.

¹⁸Mi ndre, afa mani ndrele ovuzu onyiru azini i sipi ’ba driri eri ’di: ’ba ma nya, ma mvu, ma ovu ayikosi azi okporu erini ngale etu etiari ma alia dria, 0’du Munguni fele eri dri ovuzu idriru ’diyi ma alia dria; a’disiku e’yo ’diri ovu esele erini.

¹⁹Azini ’ba dria alu alu Munguni lonyi pi fele drinia afa kakau be ’diyi, eri fe eri dri okpo indi afa nde nyazu esele erini bizu azini ovuzu ayikosi azi erini ma aliaria-afa ’diri eri feta Munguni.

²⁰A’disiku eri ngani o’du erini ovuzu idrini ’divi ma e’yo ega tu ku; Munguni e’yo omvile eri ma tia ayiko eri ma asiari ma aliarisi.