Read lugbara Eklesiaste 9 Bible Online

Eklesiaste 9 - lugbara bible

Eklesiaste 9

¹Te ma ’ba e’yo ’diyi dria ma asia, ada eri ma e’yo ndazu dria; kini ’ba kililiru ’diyi pi, ’ba onduaru ’diyi pie, ’yeta yini be, ovu Mungu ma dria; ka ovu leta kani ngutani ti, ’ba nini ku; afa dria ovu yi ma drilia.

²E’yo dria eca ’ba dria vu trotro: e’yo aluri nga i ’ye ’ba kililiruri pi ma ruaa ’ba e’yo onzi ’yepiri pie; ’ba onyiruri pie, ’ba alatararuri pie, ’ba alatara kokorori pie dria; ’ba edeta edepiri pi ma ruaa, ’ba edeta edepi kuri pie dria trotro. ’Ba e’yo onzi ’yepiri ovu ani trotro ’ba onyirurile; ’ba oyo sopi ’ba oyo soza rupirile trotro.

³E’yo ’diri e’yo onzini e’yo dria ovupi ’yezaru etu etia ’diyi ma alia, kini, e’yo alu eca ’ba dria vu; azini indi ’ba ma ori ma asi ga tre e’yo onzisi, azini e’yo azazaru ovu yi ma asia de yi idriru, te vutinia yi mu ’ba odraza ’diyi vu.

⁴Te ’ba ovupi ecizaru ’ba dria idriru ’diyi beri ovu asi ’baza be, a’disiku oce idriruri eri onyiru aga kami drapi ’bori ra.

⁵Te ’ba idriru ’diyi ni ra yi nga dra ra, te ’ba drapi ’bo ’diyi nini afa azini aluni ku, ovuni vini orodri be dika ku; yi ma tavini avile ’ba dri ’borisi.

⁶Leta yini pi ja dri curu’do nguta yini pie, ma’yala yini pie ’bo; yi ovuni vini afa esele be dika e’yo azini dria ovupi ’yezaru etu etiari ma alia ’dani ku.

⁷Mi mu di, mi nya di enya mini ayikosi, mi mvu patiefi ma su mini asi ayikorusi; Munguni azi mini a’ile ’borisi.

⁸Mi fe bongo mini ma ovu emveru ’dani, mi dri ma ovu odu efiza kokoru ku,

⁹Mi ma ovu ayikosi oku mini leleri be idri mini tokoruri ma o’du alia dria, o’du nde toko erini fele mi dri etu etia ’diyi; e ’yo ’diri eri esele mini idri mini ma alia, azini azi okporu mini ngale etu etiari ma alia indi.

¹⁰Afa dria mi drini isule ’yezaruri, mi ’ye eri okpo minisi; a’disiku azi pi, egata pie, nita pie, ondua pie, ovuni dria ’bile drani mini muzu vuniari ma alia ku.

¹¹Te ma oja ma, ma ndre etu etia kini, agaza avita aliari ovuni ’ba ongu be ’diyi dri ku, agata ombasiri ovuni vini ’ba okpo be ’diyi dri ku, kani enya ’ba onduaru ’diyi dri, kani lonyi ’ba e’yo vapi ’diyi dri, kani asi ndriza onduou dri, eri dria ’dini yo; te ewu pi drileonzi be isu yi dria.

¹²Te ’ba aluni nini ewu ini ku. Ekile e’bi bile emba onziri ma aliarile, ekile aria bile kuruso ma alia ’diyile indi, obi ’ba ma ori ewu onirisi, erini e’dele yi dria rugburisi.

¹³Ma ndre ondua etu etia ’dinile, e’da i ma milia e’yo amboru.

¹⁴Aku wereri indi, ’ba vini alenia ’diyi were; opi amboru nga emu a’di ’dizu eri be, nga eri ace kuru, nga nyaku odro eri ma ageia kaliru.

¹⁵Isu de aku nde ma alia ’ba alu onduaru indi, eri ’ba alioni, eri pa aku nde ondua inisi ra. Te ti, ’ba aluni egani ’ba alioru nde ’dari ma e’yo ku.

¹⁶Ma nga di ’yo ra, Ondua aga okpo ra; te ti, yi onzo ’ba alioru ma ondua ra, yi erini vini eri ma e’yo ku.

¹⁷E’yo ’ba onduaruni ’yole e’yereri ovu erizaru aga ’ba dri cepi ’ba ondua kokoru ’diyi ma eseliari ma otreza ra.

¹⁸Onduari onyiru aga afa ombani ’diyi ra, te ’ba alu e’yo onzi ’yepiri e’yo onyiru ma dri ja kakau.