Read lugbara Ongo Sulemanini 6 Bible Online

Ongo Sulemanini 6 - lugbara bible

Ongo Sulemanini 6

¹Agu mini leleri mu ngoa ya, mi ndripi tu oku ma eseliari la? Agu mini leleri oja i mu ngole ya? ama ma ndru eri mi be beni fo!

²Agu mani leleri si andraleru i vile amvua, pari pati aji be arikariru ’diyi sazuria, nyaka fezu amvua ’dale azini ojo okuzu.

³Ma agu roani lelerini, agu mani leleri eri mani; eri nyaka fe kabilo erini dri ojo ma eselia.

⁴Mi ovu ndrizaru, odrua mani leleri la, kile Tirizale, mi ndrizaru Yerusalemule, uriuriru kile ’ba ombani bendera be ’diyile.

⁵Mi ma oja mi mile ma vurisi ra, yini fele ma asini kole korisiri’bi mini ovu ndri ongulumuru, lapi Gileadi ma kalaa ’diyile.

⁶Mi si ovu kabilo o’biru ibipi efupi yi rua ojiria ’diyile, yi alu alu ti ejoru, aluni yi ma eselia mvani drazu drinia rani yo.

⁷Mi o’bolo si kile patiefi pomegranateni ma egalepile bongo mini ma talaa.

⁸Oku opiru indi kali azia, azini oku ati’baru ’diyi kali aro, aliria ma kalafe yi lakokoru.

⁹Te a’balau mani, odrua alatatararu maniri ovu alu a’dule, eri i andri ma mva alu ilipiliruri, ’ba eri tipirini peleri’i. Ezoanzi ndre eri ra, omve eri drilebaru; ada, oku opiru ’diyi pi oku ati’baru ’diyi be, yi inzi eri ra.

¹⁰Eri’i e’dapi kile o’bitile, ndrizaru kile mbale, alaru etule, azini uriuriru kile ’ba ombani bendera be ’diyileri a’di’i ya?

¹¹Ma si andraleru amvu patiefiniria ’dale, tibi e’bua ’diyi ndrezu, ndrezu kani zabibu pati ’ba fu emi ’bo ya, kani pomegranate ’ba fu ra yani.

¹²De nga ma nini e’yoni ku, ma asisile ’ba ma ovuzu gari ’ba mani opiru ’diyini ma eselia.

¹³Mi atri dri, mi atri dri vile, mi Sulamu ezo la, mi atri dri, mi atri dri, ama ma ndre mi ani beni. Emi le Sulamu ezo nde ndre a’disi ya? kile mini ’ba ongo tupi Mahanaimua ’diyi ndrelerile. Emi le Sulamu ezo nde ndre a’disi ya? kile mini ’ba ongo tupi Mahanaimua ’diyi ndrelerile.