Read lugbara Isaya 10 Bible Online

Isaya 10 - lugbara bible

Isaya 10

¹Drileonzi ’ba azita kililiru kuri azipi ’diyi dri, ’ba e’yo afuru sipi ’diyi dri indi,

²’ba afa kokoru ma e’yo ojazu kazu e’yo liza kililiru isuzu ku, ’ba alioru suru mania ’diyi ma e’yo ojazu lokirisi e’yo lizasi, ’dini ’ba ma bi awuzi afa yiniru ani, yi ma pa imvoanzi lonyi yiniru indi!

³Te emi nga e’yo ngoni ’ye o’du Munguni emi andrizurisi dri jaza engapi ziriri ma alia ya? Emi nga apa aza koza ndazu a’di vu ya, emi nga lonyi emini ku ngoa ya?

⁴Yi nga kiri avu va ’ba obile ati’baru ’diyi ma eselia a’dule, yi nga e’de va ’ba ’bani fule ’bo ’diyi ma eselia. Te ti, adra erini ojani nga i ku, te eri eju nga i ma dri ’dani.

⁵Mi Asuriaou la, mi’i adra mani ma kali, mi kali okporu ma aokoni ovuzu eri ma driari!

⁶Ma nga eri ti pe suru Mungu ma e’yo gapi siri vu, azini ma nga eri azi omba ’bazu suru mani ovuzu adrasi yi beri be, afa opazu, ’ba bizu ati’baru, ’ba tuzu va pasi ’bani orita geriari tulerile.

⁷Te eri’i, eri osuni ’dini ku, eri ma asi egani ’dini ku; te asi erini ma alia eri le ’ba dri ja ra, eri le suru kakau oli va.

⁸A’disiku eri ’yo ra: Opianzi mani yi ovuni dria opi amboru ku ya?

⁹Kalino ovuni Karikemisile ku ya? Hamati eri ovuni Aripadile ku ya? Samaria ovuni Damasikile ku ya?

¹⁰Ekile ma drini suru ndu ndu wura toko vile ’diyi isulerile, te wura siri’baru yini aga Yerusalemuni kani Samariani ’diyi ra,

¹¹ma ngani Yerusalemuni ’ye wura siri’baru erini be trotro ekile ndra mani Samariani ’yele wura toko erini berile ku ya?

¹²E’yo ’disi eri nga di eca ’dini, Opi ka azi erini de dria oni Zioni pi ma dria Yerusalemu be ’bo, ma nga efi ’yaza opi Asuriaari ma asi mbazaniri pi ma panga fe, mile erini dipi afusiri be.

¹³Erini ’yolerisi: Ma ’ye eri ma’i, dri mani ma okposi, ondua manisi indi, mani ovule e’yo vaza berisi; azini ma oja suru ma lokiri ’bo, ma opa yi ma lonyi ra; ma ’ba okporu, ma oze ’ba oripi opioguna dria ’diyi va ’bo

¹⁴Ma dri isu lonyi suru ndu nduni ekile ’bani aria ma jorovu isulerile; ekile ’bani alugbe okulerile ’dinile indi ma oku angu dria; te ’ba opile erini engapi, kani ti zipi, kani wupini aluni yo.

¹⁵Te ogarani nga e’yo ’yo afuru ’ba pati gapi erisiri ma ruaa ra ya? Eli si be nzangararuri nga i ’ba amboru ’ba eri osepiri ma dria ra ya? Ekile ecetasi, kali le ’ba eri ’dupiri oya ra, kani kali okporu le ’ba ovupi patiru kuri ’du uru ra ya?

¹⁶E’yo ’disi Opi, Yehova asikari ongulumuruniri nga rua oyiza ma ti pe ’ba erini nguzaru ’diyi ma eselia, azini diza erini ma votia vezani nga ti ko ra, ekile acini velerile.

¹⁷Te diza Israelini nga ovu aci ndeni, Mungu Alatararu eriniri aci dizani; te eri nga ve ra, eri nga oci erini, afa si be ocile ’dini ’diyi be, ove dria o’du alu alia.

¹⁸Te eri nga pati oceru erini ma diza nya teketeke, amvu erini efi kapi turi be, orindi pi rua be, eri nga ovu ekile ’ba azoruni oyizu kairile.

¹⁹Te pati ecepi jolokoru angu erini oceruri ma alia ’diyi nga ovu were toko, ’dini mva wereri eco ani yi ma kalafe sizaru ra,

²⁰Te eri nga ecea ’dini o’du ’dasi, ’ba jolokoru ecepi Israeli dri ’diyi, ori’ba Yakoboni apapi ’bo ’diyi be, yi ngani yi ati ’ba yi copiri ma ruaa dika ku, te yi nga yi ati ada Yehova Mungu Alatararu Israeliniri ma ruaa.

²¹Te ’ba joloko nga emvi Mungu okpo be turi vu, adaru ’ba ecepi jolokoru Yakobo dri ’diyi.

²²Te ka tro suru mini Israeliniri ovu kakau ekile cinya mirinile ti kiri ’ba ecepi jolokoru ’diyi nga emvini. Li dri aza yi dri ’bo, onyi ti alenia tre.

²³Te Opi, Yehova asikari ongulumuruniri nga dri jaza ovupi lizaruri ’ba nyaku ma eselia dria.

²⁴E’yo ’disi Opi, Yehova asikari ongulumuruniri ’yo ’dini: Emi suru mani ovupi Zionia ’diyi la, emi ma ovu urisi ’ba Asuriaa ’diyi ma e’yosi ku, ka tro yi emi co kalisi ti, azini ka kali yini enga emi ruaa ti, ekile ndra ’ba Misiria ’diyini ’yelerile.

²⁵Te ace nga o’du were toko, asi veza maniri nga i de ra, te aoko mani nga ovu yi vu yi dri jazu,

²⁶Azini Yehova asikari ongulumuruni nga enyi ’ba cozuri enga yi ruaa ekile o’du ’bani ’ba Midianini ofuzu tu oni Orebuarisirile; te kali erini nga ovu miri ma dria, azini eri nga eri enga ekile ndra Misiriarile.

²⁷Te eri nga eca ’dini o’du ’dasi, ’ba nga teri erini ’du mi gbudria, kulumbu erini engazu mi ombe ca indi, te ’ba nga kulumbu nde ma dri ja ra e’yo odunisi.

²⁸Eri eca Ayatia ra; eri aga Migironi ma aliasi, eri afazu erini ma ta mba Mikimasia;

²⁹yi tu geri oni ma eseliasi ’bo, yi la Gebaa ra; Rama oya oya, Gibea Saulo vileri apa ’bo.

³⁰Mi zamva Galimuni la, mi oyu o’duko urusi fo! Mi eri e’yo, mi Laisa la! Eyawaye, Anatoti la!

³¹Madimena apa ’bo, ’ba ovupi Gebimua ’diyi oku yi apazu.

³²Eri nga la Nobua andru o’du ’dorisi, eri oya i ma dri oni zamva Zioniarini vu, oni Yerusalemuniri’i.

³³Mi ndre, Opi, Yehova asikari ongulumuruniri nga pati ma arakala opi va, ndrezaru uriuriru; te izuru ’diyi eri nga yi oga va, uru tu ’diyi eri nga oli va.

³⁴Eri nga pati dupi jereru angu oceruria ’diyi oga va ayasi, Lebanonini nga e’de va ’ba okporu ma e’yosi.