Read lugbara Isaya 11 Bible Online

Isaya 11 - lugbara bible

Isaya 11

¹Pati idizaru nga idi engazu pati duluti Yeseni ma alia, arakala engapi ola erini ma aliari nga efi ka ra.

²Azini Orindi Yehovaniri nga ovu eri ma dria, orindi onduani e’yo vazaniri be, orindi e’yo amazani azini okponiri be, orindi nitani azini orindi Yehova ruzuri be.

³Te ayiko erini nga ovu ruta Yehovani ma alia. Eri ngani ’ba ma e’yo li ekile erini ndrele i ma milesirile ku, eri ngani vini ega ’ba ma dria erini e’yoni erile i ma bilesirile ku;

⁴te eri nga ’ba alioru ma e’yo li onyisi, eri nga ega ’ba dria e’yo kililirusi ’ba ovupi e’yere angua ’diyi ma aza kozu; eri nga angu co kali i ma tiliarisi, eri nga ’ba azi onzi ’yepi ’diyi ofu ava i ma tiliarisi.

⁵Eri nga baka onyiniri anzu i agadua, eri nga i ma opile a’di gobi asi adanisi.

⁶’Balau pi nga adri pari alua kabilomva be, o’du pi nga la va pari alua ndrimva be, kojamva pi kamimva pie tualu kojamva nguzari be, azini mva wereni nga yi dri oceni.

⁷Ti pi nga iribi nya nguru onziri be; anzi yini nga la va tualu; kamini nga ase nya moniole.

⁸Mva nga ba ndrupiri nga avi ’boroa ma ’bile tia avi avi, azini mva wereri nga i ma dri su galaba ma ’bilia.

⁹Yi ngani rua suza fe ku, yi ngani vini ’ba fu oni mani alatararuri ma alia dria ku; a’disiku nyakuni nga ga tre nita Yehovanisi ekile yi mirini miri ma dri a’bulerile.

¹⁰Eri nga eca ’dini o’du ’dasi, Yese ma ola ’bani engale uru ben-derale suru ndu ndu driri, suru ndu ndu ’diyi nga eri nda ra; te pari erini adrizuri nga ovu dizaru.

¹¹Te eri nga eca ’dini o’du ’dasi, Opini nga i dri enga pale iririsi suru erini acepi jolokoruri onzezu, engazu Asuriaa, kani Misiria, kani Patirosia, kani Kusia, kani Elamua, kani Sinaria, kani Hamatia, kani angu miri tia indi.

¹²Eri nga di bendera ’ba uru suru ndu ndu dri, eri nga ’ba Israelini ’bani drole amve ’diyi oku tualu, eri nga ’ba Yudani ovupi erezaru ’diyi oku engazu nyaku ma kalati su ’diyi ma alia.

¹³Efiraimuni nga a’ya ku ja, azini ’ba yi nga ’ba Yudani inzapi ’diyi oli va; Efiraimu ngani a’ya ’ba Yuda be ku, te Yuda ngani candi fe Efiraimu dri ku indi.

¹⁴Te yi nga nzu mbeleru mbu ’ba Filisitiaa ’diyi ma ombetia kala etuni ’dezuria, azini yi iri tro tualu nga anzi kala etuni efuzuria ’diyi ma afa opa ra. Yi nga yi ma dri eju Edomu pi ma ruaa Moabu be, te Amonianzi nga yi ma e’yo erira.

¹⁵Yehovani nga di miri Misirini ma esele efupi amve andraleruri dri ja teketeke ra; eri nga i ma dri oya Yi Ara ma dria uru oli aciru inisi, eri nga eri co ra, eri nga eri ma esele awa tindi aziri, eri nga fe ’ba ma zo pasi angu a’wiru ma dria.

¹⁶Te gboko amboru nga ovu indi ’ba erini acepi jolokoru ’diyi dri, engazu Asuriaa, ekile ndra ovupi Israeli dri ewu yini efuzu angu Misiriarisirile.