Read lugbara Isaya 13 Bible Online

Isaya 13 - lugbara bible

Isaya 13

¹E’yo eceza Babulonini, Isaya Amozi mvini ndreleri.

²Emi enga bendera uru oni: izuru pati kokoru ma dria, emi enga emi o’duko yi vu; emi oya emi dri, yi ma fi ’ba ’wara ma kalitilia.

³Ma azi e’yo ’ba mani opele ndu ’diyi ma tia ’bo, ada ma omve ’ba mani okporu ’diyi adra mani ma e’yosi ’bo, ’ba mani yi ’bapi uru afusi ’diyi.

⁴Iyikiyi ’ba ongulumuruni o’yole oni eseliari, ekile suru amborunirile! Ada, otrena suru ’ba juru ndu ndu yi okupi tualu ’diyini oueleri! Yehova asikari ongulumuruni eri asikari ongulumuru oku omba ’dizu.

⁵Yi enga angu reria, engazu ’bu ma kala ziri turia, adani Yehova afa erini omba ’bazu aoko erinisi ’diyi be, yi ma ja angu ma dri dria ani.

⁶Emi ga lulu, o’du Yehovanirini ovule ogogorisi; eri nga emu ekile dri jaza engapi Mungu Okpoe’ini vurile!

⁷E’yo ’disi ’ba ma drini dria nga ovu okpokokoru, asi ’banini dria nga aka menemeneru,

⁸yi ma asini nga oti urisi tu. Rua suzani nga yi bi candi be; yi nga ovu rua suza be ekile oku mvaazoni e’dule osiriarile. Yi nga osu mile okazasi yi ma eselia ceni ceni; te yi ma andretini nga ovu ekile aci ma dizale.

⁹Emi ndre, o’du Yehovani eri emu emu, eri yiki kokoru, aoko pi adra aciru be, eri nga angu eza teketeke, nga eri ku andruru, eri nga ’ba azi onzi be ’diyi dri ja alenia indi.

¹⁰’Bi’bio ’bua ’diyi, ’bi’bio yi okupi tualu ’diyi be yi ngani di ku; etuni nga bi iniru erini efuria, te mba ngani mve ku.

¹¹Te ma nga panga fe angu wudrikuru dri e’yo onzi yinisi, azini ’ba azi onzi ’yepi ’diyi dri indi e’yo onzi yinisi; ma nga fe asi afuru ’ba afuru ’diyini ma de ira, ma nga ’ba uri mipi ’ba ma asia ’diyi ma asi afururi nze va.

¹²Ma nga ’ba alu ’ba ovuzu aje be ambo aga aje mele onyi beriniri ra, adani ’ba nga ovu aje be amboru aga aje mele alaru Ofiriariniri ra.

¹³E’yo ’disi ma nga fe ’bu ma ya ya, ma nga nyaku oya engazu pari erini ma aliasi, adra Yehova asikari ongulumurunisi, o’du erini adra aciru ’bazurisi.

¹⁴Eri nga eca ’dini, yi dria alu alu nga yi oja suru yiniri vu, yi nga apa yi alu alu angu yinia, ekile ova ’bani drole drorile, ekile kabilo ’bani ocele ku ’diyile.

¹⁵’Ba dria alu alu ’bani isuleri, ’ba nga yi so ajusi lekeke, ’ba dria alu alu ’bani bileri nga e’de sei sia ra.

¹⁶’Ba nga di odekua yini ogba kaikai yi ma milia; ’ba nga vini yi ma jo eza, afa opazu, ’ba nga vini oku yini obi okposi,

¹⁷Mi ndre, ma nga ’ba Mediaa ’diyi enga omba ’bazu yi be, ’ba nde ’diyi ngani asi dahabu ma e’yosi ku, te yi ngani ovu ayikosi melesi ku indi.

¹⁸Osu yini nga karile onyo nyingiriki; yi ngani vini ovu yikisi efi kaza opojoni kalerisi ku; mile yini ngani anzi nyiri ku ku.

¹⁹Te Babuloni, suru ndu ndu ma diza, afa ndrizaru ’ba Kalideaa ’diyini afu ’bazu ani turi, nga ovu ekile Sodoma pile Gomora be, o’du Munguni yi oguzurisirile.

²⁰’Ba ngani di ovu alenia dika ku, ’ba ngani vini adri alenia engazu a’bianzi vu cazu a’bianzi azini ’diyi vu dika ku; ’ba Arabuni ngani yi ma hema aso ’dale ku, ’ba kabilo ocepi ’diyi ngani fe yi ma kabilo ma la ’dale ku.

²¹Te nguru ’a’api angu ’ba kokorua ’diyi nga la aleniani, yini nga ga tre anyapa wupi wurisi; te aria okondoru ’diyi nga ovu ’daleni, ndri asea ’diyi pi nga pa tu ’daleni.

²²Obauni nga wu yini amboru ’diyi ma alia, obalakoni nga wu jo ndrizaru yini ’diyi ma alia; te ewu erini eca ogogo, o’du erini ngani ovu izuru ku.