Read lugbara Isaya 14 Bible Online

Isaya 14 - lugbara bible

Isaya 14

¹A’disiku Yehovani nga asi ndriza ’ba Yakobo vu, kiri eri vini nga Israelini pe dika, eri nga di yi ’ba angu yiniria ra, azini ’ba ani’buru ’diyi nga yi eci yi be, yi nga yi ebi ori’ba Yakoboni vu.

²Te suru ndu ndu ’diyi nga yi e’du eji pari yinia, azini suru Israelini nga adri yi ma dria opiru angu Yehovani ma alia yi ’bazu ati’baru, kani ezoanzi ati’baru; yi nga ’ba mira yi obipi ati’baru ’diyi obi ati’baru ra, yi nga adri opiru ’ba ndra yi inzapi ’diyi ma drilia.

³Te eri nga di eca ’dini o’du Yehovani ava liza fezu mi dri candi mini e’yo ewaru mini pie, azi okporu ’bani mi ’bale azi ngazu ati’boru ’diri pie dria ma vutiarisi,

⁴mi nga ani e’yo o’beza ’diri o’be Opi Babuloniari ma ruaa, kini, ’Ba ’ba inzapiri asi ’doni ya Aku sile melesiri de i ’doni ya!

⁵Yehova onyo ’ba azi onzi ’yepi ’diyi ma kali ’bo, ’ba ’ba dri cepi ’diyi ma kali opiniri,

⁶kali nde ’ba suruni ’diyi copi aokosi o’du dria ’dani, suru ndu ndu ma dri cepi adrasi inzata ’bani ogale kurisiri’i.

⁷Angu wudrikuru driani ava li, yi ovu di e’yere; yi e’do ani ongo ngo.

⁸Ada, pati izuru ovu ayikosi misi, pati kumarani Lebanonia ’diyi indi, kini, Engazu etu yini mi ’bezu varisi, ’ba pati gapiri engani ama ruaa dika ku.

⁹Pari ’ba drazani ele valeruri enga i dri fuzu mi be mini emuria, pari nde ’ba draza ’diyi enga mi vu mi zizu, ada ’ba ’wara nyakuni ’diyi dria; eri enga opi suruni dria oguna yini driasi ra.

¹⁰Yi dria nga e’yo omvi, ’yo mi tia, Mi oja mi ’do okpo kokoru amale ya? Mi oja mi curu’do amale ya?

¹¹’Ba eji afu mini va Pari ’ba drazaniria, o’duko o’di minini be; o’bu aja yi mi vutia, iriaga a’bu mi ci.

¹²Mi leleuni, mi e’de va engazu ’bua ’doni ya, mi o’biti ma mvi’i. Mi’i ndra suru ndu ndu ’bapi vari, li mi va nyakua ’doni ya

¹³Mi ’yo ndra mi asia, Ma nga di tu ’bua; ma nga oguna mani ’ba uru aga ’bi’bio Munguni ra; te ma nga ri oni ti ecizaniri ma dria kpere angu andraleru ma kala asizuria;

¹⁴ma nga tu uru aga angu uruleru iritiniri ra, ma nga ovu ekile Mungu Uru Turile ka.

¹⁵Te ’ba nga mi ji va Pari ’ba drazaniria, kpere ’bile vuti valeru turia.

¹⁶’Ba mi ndrepi ’diyi nga mi lu okposi, yi nga e’yo mini ega kini: ’Di ’ba ndra fepi nyaku ma ya yari’i ya? ’Ba ndra suru ndu ndu oyapiri’i ya?

¹⁷’Ba ndra angu wudrikuruni ’bapi angu didile, aku amboru erini ’diyi ogupi vari’i ya? ’Ba ndra ati’ba ini kupi yi ma mvi akua kuri’i ya?

¹⁸Opi suru ndu nduni dria yi o’du ko diza alia, yi alu alu yi ma ngulupi ma nyadria;

¹⁹te ’ba ’be mi amve engazu nyadri minia ekile pati arakala onzikanyarule, ekile ’ba ’bani fule ra ’diyi ma bongole, ’bani sole seisi, sipi va oniefi ’bile etia ’diyi vu ’diyile, ekile ’ba ma avu ’bani rule pasirile.

²⁰’Ba ngani mi eci yi be avu saza ma alia ku, mini angu mini ezale ’borisi, mini suru mini Me ’borisi. ’Ba azi onzi ’yepi ’diyi ma ori ma runi nga avi ra.

²¹Emi ede pari anzi erini olizuri, atapi yini ma ezatasi, ’dini yi ma enga angu nyazu dika ku, yi kazu gazu angu ma alia aku be tre dika ku.

²²Te ma nga enga yi ma ruaa ma’i, Yehova asikari ongulumuruniri ’yo ra ’dini, ma nga ru ’bani li va Babulonia ’ba acepi jolokoru ’diyi be, mva pi mva ma anzi be, Yehova ’yo ’dini.

²³Ma nga vini eri fe ozuku dri, eri ma ’ba pari ini ’dale, azini ma nga eri ’ba pari oritaru yi razani atizu aleniari, te ma nga eri we yofe dri jatanirisi, Yehova asikari ongulumuruniri ’yo ’dini.

²⁴Yehova asikari ongulumuruniri so oyo ’bo, ’yozu kini: Ada ada, ekile mani egale ’borile, eri nga i ’ye ’dinile, ekile mani edele ma asiarile, e’yoni nga pa so ’dini,

²⁵kini, ma nga ’ba Asuriani angu mani ma aliari nye ra, ma nga eri tu va pasi oni mani izuru ’diyi ma dria; kulumbu erini nga yi ma rua ku ra, teri erini nga ovu ’duzaru yi ma gbudriasi ra.

²⁶E’yo mani edele ma asia nyaku dria ma e’yosiri eri ’di’i; dri ejule suru dria ma driari eri’di’i.

²⁷A’disiku Yehova asikari ongulumuruni ede e’yoni i asia purunzu ’bo, a’di eco eri ogazaruni ya? Eri eju i ma dri ’bo, a’di eco eri omvizaru vileni ya? E’yo ondrile ’ba Filisitiaa ’diyi ma e’yosiri

²⁸Fe e’yo eceza ’diri eli opi Ahazini drazurisi:

²⁹Mi’i angu ’ba Filisitinini driari la! Mi ma ovu ayikosi kali mi copirini i nyole ’borisi ku, a’disiku ola urini ma alia uriohuluni nga efuni, efi kaza erini nga ovu uri aciru sapi ’buarile.

³⁰Te ’ba alioru ’diyi ma aliriaanzi nga nyaka nya, azini ’ba afa kokoru ’diyi nga yi la va candi kokoru; te ma nga ola mini fu likinisi, te yi nga ’ba mini acepi olokoru ’diyi ofu ra.

³¹Mi ga lulu, mi kalitile la Mi owu, mi aku ambori la Mi aka dria menemeneru, mi angu ’ba Filisitiniri la A’disiku acikani engale angu andraleruarisi, te ’ba aluni gbuni i ndu otiza yini ma alia ku.

³²’Ba nga di e’yo ngoni omvi ojio suruni ’diyi ma tia ya? Kini, Yehova ’ba Zioni ma ndu ’bo, azini ’ba ’bani inzale suru erini ma eselia ’diyi nga di apa alenia ra,