Read lugbara Isaya 17 Bible Online

Isaya 17 - lugbara bible

Isaya 17

¹Afa eceza Damasikiniri. Mi ndre, asu Damasikini ’bo, asini ovu aku amboru dika ku, te eri nga ovu andru abi parile.

²’Ba ku aku Aroeria ’diyi pirini; yi nga ovu pari kabilo ngapi lapi va ’daleria ’diyini, ’ba azini ngani uri fe yi dri ku,

³Efiraimu ngani vini ovu kali okporu ’ba omba ’bapi ’diyini yi ta mbazu aleniari be ku, Damasiki ngani ovu opi nyaza beku; te ’ba acepi Suriani ’diyi nga ovu ekile anzi Israelini ma dizale, Yehova asikari ongulumuruni ’yoni.

⁴Eri nga eca ’dini o’du ’dasi diza Yakoboniri nga oyi ra, oso eri ma ruaari nga nzu ra,

⁵Te eri nga ovu ekile o’du ’ba anya lopirini anya pa sopi amvuari okuzurisirile, eri ma drini anya dri lolerile, adani eri nga ovu ekile ’bani anya vile lole e’bu Refaimuniarile.

⁶Te ti, yi nga afa ku alenia ekile anya vile ’bani kulerile, kani ekile mizeituefi acepi pati sia ’bani pati nde oyaria ’diyileku mizeituefi iri kani na arakala uru turi ma sia, su kani towi pati efi kapi turi ma arakala kalaari ma dria ’dini, Yehova Mungu Israelini ’yoni.

⁷O’du ’dasi ’ba alu alu nga lu Mungu yi ’Bapiri vu, azini mile yini nga Mungu Alatararu Israelini inzi ra;

⁸yi ngani di lu pari edeta edezu yi ma drini edele ’diyi vu ku, yi ngani vini afa yi ma drianzini edeleri inzi ku, kani wura Aseraru ’diyi, kani wura etu inzizu ’diyi indi.

⁹O’du ’dasi aku yini okporu ’diyi nga ovu ekile pari ’bani kule andruru kani oce talaa, kani oni dria uru, ’bani kule anzi Israelini ma drilia ’diyile, te eri nga ovu pari androru.

¹⁰Mi drini Mungu pata mini fepiri avilerisi, mi asi egani kata okpo minirini ku; e’yo ’disi mi sa pati ayiko fepi ’diyi, mi ere pati idiza nile ku ’diyi alenia.

¹¹O’du mini afa nde sazurisi mi to kali ageinia ci, o’bitisi mi fe ori mini ma zo fu ra; te efi kaza erini apa o’du candiru ’bani imvo wuzu turisi.

¹²Wa wo! Suru kakau yi otre ’doni ya, wupi mirini wulerile ’diyi! Suru amboru ’diyi iyikiyi zo ’doni ya, nopi ekile yi okporu rapi okposirini nolerile ’diyi!

¹³Suru ndu ndu nga ra noza be ekile yi kakauni rale okposi noza berile, te eri nga ega yi dria, azini yi nga apa ziri, nga yi dro ekile anya drileko oni amboru ma dria olini drolerile, ekile irifura engapi okposi akuluku ma driliarile.

¹⁴Ondresi, mi ndre, uri ’bani ovuzu urisi amboruri! De nga etu efuni o’bitisi ku isu de yi avi ’bo! Afa awale ’ba ama inzapi ’diyiniri eri ’di’i, awita ’ba ama afa ogupi ’diyiniri eri ’di.