Read lugbara Isaya 19 Bible Online

Isaya 19 - lugbara bible

Isaya 19

¹Afa eceza Misiriniri. Mi ndre, Yehova tu iriti acipi mbeleruri ma dria, eri emu Misiria emu emu; wura siri’baru Misirini ’diyi nga yi oya eri ma milia, ’ba Misiria ’diyi ma asini nga aka menemeneru yi ma alia indi.

²Te ma nga ’ba Misiria ’diyi enga ’ba Misiria azi ’diyi ma ruaa, yi nga di omba ’ba yi alu alu yi adripi be, yi alu alu yi agyi be, aku nga omba ’ba aku azini be, suru alu suru azini be;

³orindi Misirini nga i de agadua eri ma alia, ma nga vini e’yo amaza yini eza ra; yi nga di e’yo ondri wura siri’baru ’diyi pi vu, ’ba ojouru ’diyi pie, ’ba orindi owipi ’diyi pie, ’ba oleuru ’diyi pie dria;

⁴azini ma nga ’ba Misiria ’diyi ku opi yiki kokoruri ma dria; opi adraruri nga yi ma dri ceni, Opi, Yehova asikari ongulumuruni ’yoni.

⁵Te yi mirini nga nzu ra, yi razani nga di ovu ezazaru, eri nga ’wi ra;

⁶yi raza ’diyi nga ngu onzi, yi nyiri nyiri Misiria ’diyi nga yi omvi were, nga nzu dria ra, omi pi nga onyu ase yi tiari be.

⁷Angu nyamukoru yi miri Nilini ma kalaa, ovupi Nili ma tiari, ori dria fale Nili ma tia ’diyi be, yi nga yi ’wi dria, yi nga ere ra, ngani di ovu dika ku.

⁸’Ba e’bi okupi ’diyi nga awu wu, ’ba dria iwi e’bi pezuri ’bepi Nili alia ’diyi; yi nga ovu candisi, ’ba emba ’bepi miria ’diyi.

⁹Azini indi ’ba azi ngapi palaba pile baka efirurisi ’diyi nga ovu asi otiza be tu, ’ba bongo capi pamba emverusi ’diyi be.

¹⁰Pati idiaferu Misirini nga yi onyo nyingiriki, te ’ba dria azi ngapi oyasi ’diyi nga ovu candisi yi ma asia.

¹¹’Ba ’ba dri cepi Zoania ’diyi aza eketeke ra; ’ba e’yo amapi onduasi tu Farau dri ’diyi ma egata ovu ondua kokoru. Emi ’yo Farau tia kini, Ma ’ba onduaru ma mva, ma opi drio ’diyi ma mva, ’dini ngoni ngoni ya?

¹²Ka’dinile ’ba mini ondua be ’diyi yi bani ngoa ya? Te yi ma ece e’yoni mi tia curu’do, yi ma ni egata Yehova asikari ongulumurunirini egale Misiri ma e’yosiri ani.

¹³’Ba ’ba dri cepi Zoania ’eliyi aza ra, ’ba ici ’ba ’ba dri cepi Nofua ’diyi ra; ’ba ovupi oni amboruriru suru erini ma eselia ’diyi fe angu Misirini avi geri adari ra.

¹⁴Yehova osa orindi asi mbazaniri eri ma alia ’bo; yi fe Misiri ma avi geri adari azi erini dria ma alia, ekile ’ba atipi ewasirini acile parapara ogbe erini ma aliarile.

¹⁵Azi azini drini, kani sobini, kani itu bini, kani omini ecole ’yele Misiri driri ngani ovu ku.

¹⁶O’du ’dasi ’ba Misiria ’diyi nga yi oja okule, yi ma ruani nga ya urisi oyata Yehova asikari ongulumuruni ma drini oyale yi ma driarisi.

¹⁷Azini angu Yudani nga ovu Misiri dri uriru; ’ba dria ’bani e’yoni olule tinia ’diyi nga ovu urisi, e’yo edeza Yehova asikari ongulumuruni rini egale ’yele eri ma ruaarisi.

¹⁸O’du ’dasi aku ambo towi nga ovu indi angu Misiria, yi’i Kanani ti ’yopi, oyo sopi Yehova asikari ongulumuruni dri ’diyi. Yi ma eselia ’ba nga aku alu ma ru ’da, Aku dri jazaniri’i.

¹⁹O’du ’dasi ’ba nga pari edeta edezuri ’ba Yehova dri angu Misirini ma eselia agadua, yi nga pati i’di nyakua angu nde ma lokiria Yehova dri indi

²⁰Eri nga ovu di ecetaru, e’yo Yehova asikari ongulumuruni ma e’yo eti nzezu angu Misiria; te yi nga wu Yehova vu ’ba ’ba inzapi ’diyi ma e’yosi, azini eri nga ’ba ’ba papiri, ’ba ’ba agei tepiri, ma ti pe ani, eri nga di yi ari ra.

²¹Yehovani nga di ovu nizaru Misiria; ’ba Misiria ’diyi nga Yehovani ni o’du ’dasi ani, ada yi nga eri inzi edeta edezasi, afa feza be, azini yi nga oyo so Yehova dri, yi nga ’ye yini oyoni solerile indi.

²²Yehovani nga vini Misiri co fa, cozu azini atizu, yi nga di mvi Yehova vu, eri nga zita yini a’i ra, nga ani yi ma rua ati ra.

²³O’du ’dasi ’ba nga geri amboru ofa gbokoru engazu Misiria cazu angu Asuriaa, ’ba Asuriaa ’diyi nga emu Misiria, ’ba Misiria ’diyi nga ca Asuriaa indi, azini ’ba Misiria ’diyi nga Mungu inzi tualu ’ba Asuriaa ’diyi be.

²⁴O’du ’dasi Israeli pi nga ovu Misiri pie, Asuria pie, suru nariru, asi ndriza fezu nyaku ma eselia,

²⁵Yehova asikari ongulumuronirini asi ndriza fele yi dri ’borisi, ’yozu kini, Asi ndriza Misiri dri, yi suru mani, azini Asuria dri, yi dri mani ma azi, azini Israeli dri indi, yi yila mani.