Read lugbara Isaya 2 Bible Online

Isaya 2 - lugbara bible

Isaya 2

¹E’yo Isaya Amosi mvini ndrele e’yo Yuda pini Yerusalemu berisiri.

²Eri nga eca o’du vilerisi ’dini, oni jo Yehova vileriniri ’ba nga ede amboru oni azini ma dria uru, eri nga ovu uru oni azini agazu; azini suru dria nga ra eri vu.

³’Ba kakau nga mu ’yo ’dini: Emi emu, ama ma tu uru oni Yehovani dria, Mungu Yakoboniri ma joa; eri nga ama imba geri erini nizu, ama nga ad leti erini ma alia. A’disiku azitani nga efu Zioni ma alia, e’yo Yehovani nga efu Yerusalemua indi.

⁴Eri nga e’yo li suru ndu ndu ma eselia, eri nga e’yo ama ’ba karakarau dri; yi nga sei yini di e’buru, aju yini yi nga oja nguleru; suru alu ngani sei enga a’di ’dizu suru azini be dika ku, yi ngani vini omba ma e’yo oni dika ku.

⁵Emi’i, jo Yakoboni, emi emu, ama ma ad diza Yehovani ma alia.

⁶Mini suru mini kulerisi, ori’ba Yakoboni, yini gale tre adriza woko etuni efuzuriarisi, yini andri ndrile ekile ’ba Filistia ’diyilerisi, azini yini ti ecile anzi ’ba juruni berisi.

⁷Angu yini ga tre dahabu pisi mele be, te lonyi yini ovu kakau asikokoru; angu yini ga tre vini akanyasi, te gari ombani yini ’diyi ovu kakau asikokoru.

⁸Angu yini vini ga tre wura toko inzile inzi ’diyisi; yi inzi wura yini edele yi ma ngulupi ma drisi ’diyi’i, yi ma drianzini edele ’diyi.

⁹’Ba tokoni ’diyi ’ba yi ele, ’ba amboru ’diyi oja yi ’ba werele vae’yo ’disi mi ma wu ezata yini ku!

¹⁰Mi fi oni eselia, mi zi mi irifura ma alia uri Yehovanisi, azini diza okpo ambo erinirini ma drilia indi.

¹¹Yi nga ’ba afu be ’diyi ma mile so va, azini yi nga fe asi afuru ’bani ma avu va; te Yehovani nga ovu a’dule uru inzita be o’du ’dasini.

¹²O’du Yehova asikari ongulumuruniri nga ovu afa dria ovupi afuru kani asi afusi ’diyi, kani afa dria ’bani ’bale uru ’diyi ma dria, nga yi omvi dria va;

¹³o’du nde nga eca mario pati izuru Lebanonia ’diyi ma dria dria, ovupi uru, ’bani engale uru ’diyi; azini kumara pati okporu Basania ’diyi ma dria indi;

¹⁴azini oni izuru ma dria dria, oni ovupi uru ’diyi ma dria dria;

¹⁵jo izuru dria ma dria, abi tole kaliru ’diyi ma dria dria dria;

¹⁶oguru Tarisisini ’diyi ma dria, wura yini ndrizaru ’diyi ma dria dria.

¹⁷Yi nga fe afu ’bani avu va, azini asi afuru ’bani yi nga ’ba va; te Yehovani nga ovu a’dule uru inzita be o’du ’dasini.

¹⁸Te wura toko inzile inzi ’diyi nga avi teketeke ra.

¹⁹Yehova ka enga nyaku oyazu okposi, ’ba yi nga ofi oni ma ojia azini ’bile nyakua ’diyia yi ozizu uri Yehovanisi, diza okpo ambo erinirini ma drilia indi.

²⁰O’du ’dasi ’ba yi nga wura yini dahaburu o’be amve wura meleru yini ’diyi be, ’bani edele yi dri inzizaru ’diyi, yi nga afa ’diyi o’be oyu pi vu ’bi’bia be,

²¹fizu oni ojia, kani oni yi esipi osi ’diyi ma talaa, uri Yehovanisi, diza okpo ambo erinirini ma drilia indi, eri ka enga nyaku oyazu okposi.

²²Emi ku ’ba ovupi ava erini be eri ma omvuleari fo! a’disiku ’ba nga onyi erini isu e’yo ngoni ma alia ya?