Read lugbara Isaya 21 Bible Online

Isaya 21 - lugbara bible

Isaya 21

¹E’yo eceza angu roko miri tiarinini. Ekile oliriko engapi angu Uruleruriarini angu lile okposirile, ’dinile indi eri nga emu engazu roko didia, engazu angu uri fepiri ma alia.

²Ece afa ndreza ewaru ma dri ’bo; ’ba ’yepi lokirisiri ’ye lokirisi, ’ba afa opapiri eri afa opa ra. Mi tu uru, Elamu la! Mi ace aku kuru, Media la! ma fe otaza yini ma de i dria ra,

³E’yo ’disi ma opileni su su; rua suza bi ma tu ekile rua suza oku mva osipirinile; ma rua su tu ’dini ma econi ani e’yo azini erizaru ku, ma asi oti tu, ma econi ani afa azini ndrezaru ku indi.

⁴Ma asi ombu ombu, ma ovu taisi urisi; angu bipi gumaguma ndra mani leleri oja i ma dri rua yazaru.

⁵Yi ede mesa, yi ’ba ’ba azini angu tezu, yi nya, yi mvu ra. Emi enga, emi ’ba ’ba dri cepi ’diyi, emi efi gombere ma rua odusi!

⁶A’disiku Opi ’yo ma tia ’dinile: Mi mu, mi ’ba ’ba angu te, eri ma ece afa erini ndreleri,

⁷Eri ka ’ba ongulumuru ndre, ’ba tupi akanya dria emupi iri iri ’diyi pi, akanya esele were ongulumuru pie, ngamia ongulumuru be, eri ma co bile okposi, e’yo erizu asi driasi.

⁸Azini ’ba afa ndrepiri oyu kini: Opi la! Ma pa so ’dani etusi jo izuru mani angu tezuri ma dria, ma te azi mani ma alia ini be rra.

⁹Te mi ndre, ’ba ongulumuru emu ra, ’ba tupi akanya dria ’diyi emu iriiri Eri nga di e’yo omvi ’yo kini, Babuloni e’de va ’bo, eri e’de va ’bo; Mungu erini inzoru ’bani edele wurasi ’diyi onyo yi va nyakua dria.

¹⁰Mi’i, anya mani coleri, azini anya akuma mani ma driari la! E’yo mani erile Yehova asikari ongulumuruni, Mungu Israelini vuri, ma e’da emini ’bo. E’yo ondrile Duma ma e’yosiri

¹¹E’yo eceza Dumaniri, ’Ba zi ma engazu Seiria, Mi ’ba angu tepiri, e’yo inini ngoni ya? Mi ’ba angu tepiri, e’yo inini ngoni ya?

¹²’Ba angu tepiri ’yo ra: Anguni ’ye ati ati, inini ace nga indio Emi ka le e’yo zi, emi zi; emi oja emi, emi emu. E’yo ondrile Arabu ma e’yosiri

¹³E’yo eceza angu Arabuni ma driari. Emi ’ba Dedania acipi tualu ’diyi, emi nga la angu oceru Arabuaria.

¹⁴’Ba eji yi ’ba ovupi yi avijo beri dri, ’ba adripi Temaa ’diyi fu dri ’ba apapi ’bo ’diyi be enya yini be.

¹⁵A’disiku yi apa sei ma urisi, sei ’bani enzelerisi, osu ’bani nzolerisi, e’yo ewaru ombanisi indi.

¹⁶A’disiku Opi ’yo ma tia ’dinile kini, De nga eli deni i ku, ekile ’bani ’ba azi ngapi oyasiri ma eli lalerile, diza Kedarini dria nga asi ra;

¹⁷te ’ba osu be acepi jolokoru, ’ba okporu anzi Kedarini ’diyi, nga ovu lamiru; a’disiku Yehova Mungu Israeliniri ’yo ’dini ’bo.