Read lugbara Isaya 24 Bible Online

Isaya 24 - lugbara bible

Isaya 24

¹Mi mire, Yehovani nga angu nyakuni ’ba pirini, eri nga eri eza ra, eri nga eri oja o’bukuru, azini eri nga ani ’ba ovupi alenia ’diyi ere amve.

²Eri nga eca ’dini, e’yoni nga i ’ye ’ba toko ma ruaa trotro trotro ’ba edeta edepiri ma ruaarile; ati’bo ma ruaa trotro trotro opi erini ma ruaarile; zamva ati’boru ma ruaa trotro trotro oku opiru erini ma ruaarile; ’ba afa jepiri ma ruaa trotro trotro ’ba afa ozipiri ma ruaarile; ’ba mari fepiri ma ruaa trotro trotro ’ba mari nyapiri ma ruaarile; ’ba mari fepi ereza beri ma ruaa trotro trotro ’ba ereza nde omvipiri ma ruaarile.

³Angu wudrikururi nga ovu toko pirini, azini ezazaru teketeke; a’disiku Yehova ’yo e’yo ’diri

⁴Nyakuni owu owu, eri onyu onyu indi, angu wudrikururi dri ci candisi, eri onyu onyu indi; ’ba ovupi uru nyakua ’diyi dri ci candisi.

⁵Nyaku ovu azavuru indi ’ba adripi alenia ’diyi ma palaa; yini e’yo azile ’diyi ezalerisi, yini azita ojalerisi, yini aziza ’daniri nyolerisi.

⁶E’yo ’disi otria nya angu nyakuari ’bo, azini e’yo nde ’ba ovupi alenia ’diyi e’yo liza ma alia ra; e’yo ’disi ’ba ovupi nyakua ’diyi ovu vezaru, ’ba ace lamiru.

⁷Patiefi ma su o’diru wu ra, pati zabibuni dri ci di candisi, ’ba dria adripi ovupi asi be ayikoru ’diyi ota candisi.

⁸Arimva ma ayiko de ira, ’ba ovupi ayiko be ’diyi ma o’yona asi ra, ayiko o’di cozaniri de i vini ra.

⁹Yi ngani ewa mvu ongo be ku; afa mvuza okporu nga dra ’ba afa nde mvupi ’diyi ma tilia dra dra.

¹⁰Aku ’bani ezaleri asu i va ’bo, ’ba opi lotile kinakina ci, ’dini ’ba aluni ma fi joa ku.

¹¹’Ba wu geria ewa ma e’yosi; ayiko dria oja i iniru; ayiko angu ndeniri avi ’bo.

¹²’Ba ku aku pirini, eza kalitile teketeke.

¹³Te eri nga i ’ye ’dinile angu wudrikururi ma alia agadua suru ndu ndu ma eselia, ekile ’bani pati mizeituni oyalerile, ekile zabibu vile ’bani kule zabibu tiza ma vutiarile.

¹⁴’Ba ’diyi nga yi ma o’duko enga uru, yi nga otre uru; yi otre uru engazu miri ma alia, inzita Yehovani ma e’yosi.

¹⁵E’yo ’disi emi ’ba Yehova dizaru angu etuni efuzuri ma alia; adani, emi ma inzi Yehova, Mungu Israeliniri ma ru, angu miri tiaria.

¹⁶Engazu pari angu ma kalatini asizuria ama eri ’bani ongo ngoria ’bo, diza fezu ’ba onyiru dri. Te ma ’yo ra, Ma oyi di ’do, ma oyi ra. E’yo isu di ma ’do! ’Ba ’yepi lokirisi ’diyi ’ye lokirisi ra, adani ’ba ’yepi lokirisi ’diyi ’ye lokirisi tu.

¹⁷Mi ’ba ovupi nyakuari la! E’yo uri fepi ’ba driri; awi pi ovu emi dria emba be.

¹⁸Eri nga di eca ’dini, kini ’ba apapi engazu uri ’diri ma otreza vuri nga e’de awi ’di ma alia; te ’ba efupi awi ma aliari ’ba nga bi emba ndesi. A’disiku derisa ’buaa ’diyi ozi yi ’bo, nyaku eti oya i ani oya oya.

¹⁹Nyaku nyo i teketeke, nyaku asi i ’bo, nyaku oya i tu.

²⁰Nyakuni nga aci parapara ’ba ewani fulerini acilerile, eri nga oya ’dile azini ’dole borokole; ezata erini nga ovu eri ma ruaa nzizaru, eri nga e’de va, azini eri ngani enga dika ku.

²¹Te eri nga eca ’dini o’du ’dasi Yehovani nga panga fe ongulumu ’bua ’diyi dri, uru ’bua, opi nyakua ’diyi dri, va nyakua.

²²Eri nga yi oku tualu, ekile ’bani ’ba obile ombaa ’diyi okule ’bile ma aliarile; ’ba nga yi opi arujoa ci, te o’du kakau ma vutia yi nga yi andri ra.

²³O’du ’dasi mbani nga ovu afa tokole, etuni nga ovu drinzasi; Yehova asikari ongulumurunirini ngale adrile opiru oni Zioni ma dria, azini Yerusalemua, azini ’ba ’wara erini ’diyi ma milia diza berisi.