Read lugbara Isaya 25 Bible Online

Isaya 25 - lugbara bible

Isaya 25

¹Yehova, mi ovu Mungu mani; ma nga mi ’ba uru inzitasi, ma nga mi ru inzi ra; mini e’yo osutaru ’diyi ’yelerisi, adani mini egata drio ’diyi egale asi adaru pisi e’yo inzo kokoru berisi.

²Mini aku ojale andruru, aku ’bani agei tele okposiri ojale ezazaru ’borisi; mini jo ndrizaru ’ba jururu ’diyini ojale eri ma ovu akuru dika kurisi, ’ba ngani eri si dika ku.

³E’yo ’disi suru okporu nga diza fe mi dri; suru uri fepi ’diyi ma akuni nga mi ru ra.

⁴Mini ovule pari okporu ’ba alioru dririsi, kali okporu ’ba afa kokoruri dri etu erini ovuzu candisirisi, kali ’bani yi ma ta mbazu ozoo ’dipi oliriko berisi, endri vini etuka ma e’yosi; o’du ’ba uri fepi ’diyini angu lizu ekile ozoo ’dipi oli berini jo abi colerilerisi.

⁵Ekile etu driza angu a’wiru ma aliarile, mi nga ’ba jururu ’diyi ma o’yona asu; ekile iriti ma endrini etu driza a’bulerile, mi nga ’ba uri fepi ’diyi ma ongo asu ’dinile.

⁶Oni ’diri ma dria Yehova asikari ongulumuruniri nga omu afa osorurini ’ba suru dria dri, eri omu patiefi su onyiru anyakani nga ovuzu alenia cirini, eri omu afa osoru gapi falaoso be ’diyini, patiefi su anyaka be ’bani ’bale alaru turi be.

⁷Azini oni ’diri ma dria, eri nga afa opiza ma mile ovupi suru dria ma driari dri ja ra, eri nga bongo ajale suru dria ma driari nze ra.

⁸Eri ki drata iriti ’bo, te Opi Yehovani nga mindre ini ’ba dria ma milia, eri nga vini suru erini ma o’data nze engazu angu wudrikuru dria ma alia; Yehova ’yo e’yo’dirini.

⁹Te ’ba yi nga e’yo ’diri ’yo o’du ’dasi, Mi ndre, ’di Mungu amani; ama ’ba ndra eri te drio, te eri nga ama pa ra. ’Di Yehova’i; ama ’ba ndra eri te drio; ama nga di ovu ayiko be, ovuzu nyonasi pata eriniri ma alia.

¹⁰A’disiku Yehova ma drini nga ava li oni ’diri ma dria, azini ’ba nga Moabuni otu va pasi pari erini ma alia, ekile tini ase vole ’bori otule va tiwara oritaruri ma aliarile.

¹¹Eri nga vini i ma dri aja alenia agadua ekile ’ba yi sapirini i ma dri ajale yi sazurile; te eri nga eri ma afu ku va, lokiri erini ’yele drisi ’diyi be.

¹²Eri asu kali okporu ’ba ombani ’diyini ovupi abi ma dria ururi va, eri ere eri va, eri asu eri va nyakua, adaru ere eri irifura ma alia.