Read lugbara Isaya 26 Bible Online

Isaya 26 - lugbara bible

Isaya 26

¹O’du ’dasi ’ba nga ongo ’diri ngo angu Yudani ma alia: Ama ovu aku be okporu; eri nga pata ’ba eri dri abi pi paria kali be.

²Emi zi kalitile, suru onyiru e’yo adaru ma ta mbapiri ma fi ani.

³Mi nga ’ba i ma asisile atipi mi ma ta mba ovuzu asi anzurusi ’dani, erini mi a’ilerisi.

⁴Emi ’ba a’ita Yehova ma alia ’dani, a’disiku Yah Yehova ma alia kata okporu ovupi ’daniri indio

⁵Erini ’ba adripi uru yi ma akuni ovuzu oni dria ’diyi odrole varisi. Eri ’be eri va, eri asu eri va kpere nyakua, eri ere eri kpere irifura ma alia.

⁶’Ba nga eri tu va pasi, adaru ’ba alioru ’diyi ma pa, ’ba afa kokoru ’diyi ma pani nga eri otuni.

⁷Geri ’ba kililirurini ovu e’yo kilili; mi’i ovupi kililiruri, mi adri ’ba kililiru ’diyi ma dri ceni.

⁸Adaru, Yehova la, ama te mi geri e’yo liza miniria; orindi amani lu ru mini vu avasi, e’yo nde mini fele ama dri egataruri vu indi,

⁹Ma le mi tu inisi, orindi manisi ra, ada ma nga mi nda o’biti drio drio orindi mani ovupi ma aliarisi. A’disiku e’yo liza mini ’diyi ka ovu nyakua, ’ba ovupi angu wudrikuru ma alia ’diyi, yi e’yo onyini oni ra,

¹⁰Ka asi ndriza ece ’ba azi onzi ’yepiri vu ti, eri ngani onyi oni ku; ka tro eri angu e’yo kililirunia ti, eri nga azi onzi ’ye, eri ngani diza Yehovani ndre ku.

¹¹Yehova, mi enga mi dri uru ’bo, te ti, yi ndreni ku. Te yi nga ava mini ’ba mini vuri ndre ra, drinzani nga yi bi ani. Ada, acini nga ari’ba mini ove ra.

¹²Yehova, mi nga asi anzuru azi ama dri, a’disiku mi ’ye ’yeta amani dria ama dri ’bo.

¹³Yehova Mungu amani la, mi’i a’dule ku te opi azini yi adri ndra ama drilia opiru ra, te kiri misi a’dule ama nga ru mini ma e’yo olu’i.

¹⁴Yi’i yi odra yini ’bo, yi ngani di ovu idriru ku; yi odra ’bo, te yi ngani enga ku; e’yo ’disi mi andri yi ’bo, mi ja yi dri ’bo, mi fe egata yini dria ma avi ra.

¹⁵Mi fe suru ezu ’bo, Yehova la, mi fe suru ezu ’bo; mi ’ba mi dizaru ’bo; mi ere angu ma kalati dria ma ovu walaru aga.

¹⁶Yehova, yi mu mi nda o’du yini ovuzu candisirisi, yi zi zita yini asi driasi o’du cota minini ovuzu yi ma ruaarisi.

¹⁷Ekile oku oporovuru o’du erini mva osizuri ka ’ye eca ogogo, erini ovule rua suza be, erini wule rua suza erinisirile, ama ovu ndra ’dinile mi milia, Yehova;

¹⁸ama ovu ndra oporovuru, ama ovu ndra rua suza be, te afa ndra amani osileri eri olini. Ama ’yeni pata azini nyakua ku, ’ba adripi angu wudrikurua ’diyi e’deni vini va ku.

¹⁹’Ba mini drapi ’bo ’diyi nga adri idriru, avu mani ’diyi nga enga ra. Emi enga ongo ngo, emi ovupi irifuraa ’diyi! Andrali minini ovule andrali ebikobi ma driarilerisi, azini nyakuni nga ’ba drapi ’bo ’diyi ofu amve.

²⁰Emi emu, suru mani, emi fi jo eminia, emi opi jotile emini ci; emi zi emi etu were de nga asi veza agani ku.

²¹A’disiku, mi ndre, Yehovani nga efu pari erinia panga fezu ’ba ovupi nyakua ’diyi dri e’yo onzi yinisi, nyakuni ,indi nga ari erini ece, eri ngani ’ba erini ofule ’diyi a’bu dika ku.