Read lugbara Isaya 28 Bible Online

Isaya 28 - lugbara bible

Isaya 28

¹Drileonzi ’ba Efiraimuni ewa mvupi ’diyi ma oku afuniri dri, drileonzi rua ndriza erini ma fu onyupi onyuri ba, ovupi ’ba patiefi ma suni fule ’diyi ma e’bu si drile efi kapi turiari!

²Mi ndre, Opi ovu ’ba erini okporu turi be; eri nga ’ba ’be va nyakua i ma drisi, ekile ozoo ’dipi si berile, ekile oliriko amboru afa ezapirile, ekile ozoo ’dipi okporu yi etataru tipi turi berile.

³’Ba nga oku afuni ’ba Efiraimuni ewa mvupi ’diyiniri tu va pasi;

⁴azini rua ndriza erini ma fu onyupionyu ovupi e’bu si drile efi kapi turi ma driari nga ovu ekile elio ozina kapi oko de nga eli ecani kurile: agu eri ndrepiri ka ndre ra, eri mbera de nga afa nde ovu nga eri ma dria ’dani ku.

⁵O’du ’dasi Yehova asikari ongulumuruniri nga ovu oku dizani, azini ekilaza ndrizaru suru erini ma joloko acepi ’diyi dri;

⁶eri nga ovu vini orindi e’yo liza kililiruriniru ’ba ripi e’yo lipiri dri, azini okpo, ’ba ari’ba ojapi vile ombasi kalitilea ’diyi dri indi.

⁷Te ’ba ’diyi indi, yi aba patiefi ma susi ’bo yi ku geri ndiri afa mvuza okporu ma e’yosi ra; ’ba edeta edepiri pi eza afa mvuza okporusi nabi be, patiefi ma su oki di yi ra, yi ku geri ndiri afa mvuza okporu ma e’yosi; yi aba ani afa ndreza ma alia, yi vini aci parapara e’yo liza ma alia indi.

⁸A’disiku mesa dria ga tre gbeta pisi ondi onzikanyaru be, ’dini pari alaru aluni yo.

⁹Eri nga onita imba a’di dri ya? Eri nga fe a’di ma va oluta ndeni ya? ’Ba basu kupi o’diru, ’bani nzele ba tia ’diyi ya?

¹⁰A’disiku eri imbata were imbata were ma dria, imbata were imbata were ma dria, ayi alu ayi azini ma dria, ayi alu ayi azini ma dria, ’doa were, ’dale were, ’dinile.

¹¹Yo, te eri nga e’yo ’yo suru ’diri ma tia ’ba ti ’bani nile kuri ’yopi ’diyisi, ’ba ti andini ’yopi ’diyisi;

¹²eri ’yo yi tia ’bo kini, Ava liza eri ’di emi fe ava liza ’ba andepi ’bo ’diyi dri; asi engaza o’diruri eri ’di’i; te ti, yi leni e’yoni eri ku.

¹³E’yo ’disi e’yo Yehovani nga ovu yi dri ’dinile: imbata were imbata were ma dria, imbata were imbata were ma dria, ayi alu ayi azini dria, ayi alu ayi azini dria, ’doa were, ’dale were; yi ma mu e’de juluru ani, ma onyo yi ra, ’ba ma mba yi ra, ma obi yi ani beni.

¹⁴E’yo ’disi emi ma eri e’yo Yehovani, emi ’ba onzomara be’diyi, emi ’ba suru ’di ovupi Yerusalemuari ma dri cepi ’diyi!

¹⁵Emini ’yole, Ama eci ti drata be ’bo, ama ede e’yoni pari ’ba drapi ’bo ’diyiniri be indi; cota egapi treri ka aga angu ma eselia ti eri ngani eca ama vu ogogo ku; amani ama ta mbale inzo liza ma alia, amani ama zile e’yo inzoru ma etia ’borisi-risi

¹⁶e’yo ’disi Opi Yehova ’yo ’dinile, Mi ndre, Zionia ma oni ’ba jo etiru, oni ’bani o’bile ’bori, oni jo kalaa aje amborusi, yini ’bale jo eti okporuri: ’Ba a’ipiri ngani ’ye ngiringirisi ku.

¹⁷Te ma nga e’yo liza kililiru ’ba ovuzu bakale, azini ma nga onyi ’ba baka jo o’bizuriru; te ozoo si beri nga pari ’bani yi ta mbazu inzosiri wu amve, azini yini nga ti tre, nga pari ’bani yi ozizuri ma dri ase ci.

¹⁸Te aziza emini azile drata beri nga i oja okpo kokoru, azini aziza emini azile pari dratani beri ngani pa so ku; cota egapi treri ka aga angu ma eselia eri nga emi tu pasi va.

¹⁹Pale dria alu alu erini agazu angu ma aliasi, eri nga emi obi ra; a’disiku eri nga aga o’biti vusi o’biti vusi, etusi azini inisi indi; te e’yo kuza nderi vazuri nga kiri uri fe’i.

²⁰A’disiku gbolo ovu alinaru tu, ’ba econi ani i ejuzu drinia ku, azini batania ovu izinaru tu, ’dini ’ba econi ani ’bezaru dria dria ku.

²¹A’disiku Yehovani nga enga ekile oni Perazimuarile, eri nga ovu aokosi ekile e’bu Gibeonini ma aliarile; eri ma nga azi erini ani-azi erini osutaruri’i eri ma ’ye ’yeta erini ani-’yeta erini osutaruri’i

²²E’yo ’disi emi ma onzo e’yo ku, baka emini ma ti kazu i fizu kirikiri ku; a’disiku ma eri e’yo engazu Opi Yehova asikari ongulumuruni ma tia ra kini eri li dri jaza angu dria ma dria ’bo.

²³Emi fe bile, emi eri ma o’duko; emi co bile, emi eri oluta mani.

²⁴’Ba amvu ’yapi ori rizuri eri amvu ’ya ’dani ya? Eri o’duti amvi alaru ’dani ’dani ya?

²⁵Eri ka amvu nde co alaru ’bo, eri rini burusu ori alenia ku ya? Eri rini olujo, eri sani nganu ayisi ayisi, eri fani anya pari erini peleria, eri ’bani ondu kala eriniria ku ya?

²⁶A’disiku Mungu erini adri e’yoni ece eri dri kilili, eri eri imba indi.

²⁷A’disiku ’ba coni burusu afa si cizaru berisi ku, azini yi ojini gari ma pa olujo ma driasi ku; te ’ba adri burusu co kalisi, azini olujo kali weresi indi.

²⁸’Ba adri anya ’i yini eri coria ra ya? Yi ngani eri co ’dani ku; ka tro gari pa yini pi akanya yini be ere anya nde ti, yi ’ini eri geri ’disi ku.

²⁹E’yo ’diri enga vini Yehova asikari ongulumuruniri vu indi; eri osutaru dri cezasi, onyiru tu onduasi.