Read lugbara Isaya 29 Bible Online

Isaya 29 - lugbara bible

Isaya 29

¹Arieli la! Arieli ta aku Daudini ’a’azu aleniari! Emi o’ba eli alu eli azini ma dria; omu ma eca eli vusi dika dika.

²Etu ’dasi ma nga Arielini ecandi, yi nga owu lulu gaza be, eri nga ovu ma dri ekile Arielile.

³Azini ma nga la mi ageia kurua kuru omba tezu, ma nga mi ace ombasi jo kali be okporusi, I ma nga abi edele omba ma e’yosiri si mi ageia.

⁴’Ba nga di mi eji va, mi nga e’yo ’yo engazu nyakua, o’duko mini nga enga va irifura ma eselia; 0’duko mini nga ovu ekile ’ba ojouru ori edepirinile, o’dukonini engale nyakuarile, e’yo ’yoza mini nga ovu 0’duko were engapi irifura ma aliarile.

⁵Te ari’ba mini o’biru ’diyi nga ovu irifura nyiri efi be kakaurile, ’ba uriuriru kakau ’diyi nga ovu ekile anyadrileko agapi amverile. Ada eri nga i ’ye mbele coti,

⁶Yehova asikari ongulumuruniri nga eri andri noza pisi, oyakia pie, otreza amboru pie, akuluku pie, oli okporu pie, aci amboru afa vepi mbeleri be.

⁷Azini suru o’biru dria omba ’bapi Arieli be ’diyi, ada suru dria omba ’bapi eri be, kali erini abi be okporuri be, eri inzapi ’diyi, nga di ovu orobile kani afa ndreza inisirile.

⁸Eri nga di eca ’dini, ekile orobi ka, ’ba abiri beri obi, te mi ndre, eri nyaka nya; eri oru 0’duarisi ra, te isu eri trani ku. Kani ekile orobi ka ’ba yi avijo beri obi, te mi ndre, eri yi mvu; eri oru o’duarisi ra, te mi ndre, eri aka okpokokoru azini eri le yi mvu asi driasi ’dani. Suru o’biru omba ’bapi Zioni be ’diyi dria nga ovu ’dinile.

⁹Emi te nga, emi osu e’yonisi, emi ovu ayikosi, te emi ovu mile kokoru! Yi ati, te ovuni ewa funi yini ku; yi aci parapara, te afa mvuza okporu ’beni yini ku.

¹⁰Yehovani orindi o’du kozu turi osule emi driarisi, erini mile emini, ’ba nabiru ’diyi, asele cirisi, azini erini dri emini, ’ba eceta ndrepi ’diyi, a’bule cirisi.

¹¹Te afa ndreza dria ovu emi dri ekile e’yo ovupi sizaru buku ’bani tini opile ciri ma aliarile, buku nde ’bani fele ’ba nipi buku lapiri driri, ’yozu kini, Mi la buku ’diri fo. Te eri ’yo ra, kini, Ma econi ku, erini ovule opizaru cirisi.

¹²Te ’ba nga di buku nde fe ’ba nipi buku lapi kuri dri, kini, Mi la buku ’diri fo. Te eri omvi e’yo kini, Ma nini buku lazu ku.

¹³Te Opi ’yo ra: Suru ’diri yini esile ma vu ogogo yi ma tisi, yini ma inzile yi ma tilesi, te yini yi ma asi ’bale ma vu ziririsi, azini ruta yini, yini ma ruzurini ovule azita ’bani, ’bani yi imbazuri’irisi;

¹⁴e’yo ’disi, mi ndre, ma nga mu ’yeta osutaru ’ye suru ’diri ma eselia, adani ’yeta osutaru pi tali be; azini ondua ’ba yini onduaru ’diyini nga avi ra, azini e’yo vaza ’ba yini e’yo vapi ’diyini nga ovu zizaru.

¹⁵Drileonzi yi dri, ’ba yi ma egata zipi aliru Yehova ma milia ’diyi, te ’yeta yini ovu ini ma alia, azini yi di ’yo, A’dini ama ndreni ya? A’dini ama nini ya?

¹⁶Emi afa ’i keleru ’doni ya! ’Ba nga ’ba imvu sipiri la ekile odrile; ’dini afa sileri ma ’yo ’ba eri sipiri ma e’yosi ani kini, Eri sini ma ku; kani afa edeleri ma ’yo ’ba eri edepiri ma e’yosi ani kini, Eri ovuni e’yo vaza be ku, ’dini ya?

¹⁷Aceni nga o’du were ku ya, de isu ’ba nga Lebanoni oja amvu efi kapi turiru, azini amvu efi kapi turi ’ba nga la ekile angu ocerurile-ya?

¹⁸Te o’du ’dasi ’ba bile dirinyaru be’diyi nga di e’yo ovupi sizaru buku ma aliari eri ra, azini ’ba mile kokoru ’diyi ma mileni nga angu ndre engazu angu biza pi ma alia ini be.

¹⁹’Ba afu kokoru ’diyi nga ayiko yini ’ba amboru Yehova ma alia, azini ’ba alioru ’ba ma eselia ’diyi nga ovu ayikosi Mungu Alatararu Israeliniri ma alia.

²⁰A’disiku ’ba uriuriru ’diyi oja yi tokoru ’bo, azini ’ba edematara be ’diyi ku edematara ja, azini ’ba dria e’yo onzi tepi ’diyi, oli yi va ’bo,

²¹’ba nde fe e’yo ma nde ’ba e’yo liza ma alia, azini yi emba se ’ba egapi ’ba dria kalitileari dria, azini yi oja ’ba kililiru ma e’yo kalaa afa tokosi.

²²E’yo ’disi Yehova Iburahimuni enzepiri ’yo ’dinile ori’ba Yakobonisi: Yakobo ngani ovu drinzasi curu’do ku, eri ngani i ma mile su va urisi ku.

²³Te eri ka anzi ini ndre yi ma eselia, yi azi ma drini ’yeleri, yi nga ru mani ’ba alatararu; ada, yi nga Mungu Alatararu Yakoboniri ’ba alatararu, yi nga Mungu Israelini inzi rutasi tu.

²⁴Azini ’ba ezapi orindi yini ma alia ’diyi nga e’yo va ra, azini ’ba onopi ono ’diyi nga imbata oni.