Read lugbara Isaya 3 Bible Online

Isaya 3 - lugbara bible

Isaya 3

¹Te mi ndre, Opi, Yehova asikari ongulumuruni, Enze Yerusalemu pi ma aliasi Yuda be aza koza yini lote be, adani eri nze aza koza enyaniri pi aza koza yi mvuzaniri be dria;

²’ba okporu, ’ba omba ’dipiri pie, ’ba e’yo ipiri pie, nabi pie, ’ba andri ndripiri pie, ’ba ’wara pie,

³asikari ’ba kali towi dri cepiri pie, ’ba ’bani inzileri pie, ’ba e’yo amapiri pie, onduou pie, ’ba uri etalipi onduasiri pie dria.

⁴Te ma nga anzi fe ovuzu opi yiniru, azini odekua nga yi dri ce opiru.

⁵Te ’ba nga yi inza ceni ceni, yi alu alu nga ovu inzazaru yi agyi dri, yi alu alu ’ba yi ma jo ejeleari dri; mvani nga ’ye afuru ’ba ’wara vu, ’ba inzita kokori nga ’ye afuru ’ba inzita beri vu ’dini.

⁶’Ba alu ka adripi ini bi i ati vile joa, kini: Mi ovu bongo be; mi ce di ama dri fo, aku andruru ’diri ma ovu di mi dria ani;

⁷o’du ’dasi eri nga di eri ma o’duko enga kini: Ma leni ovu ’ba ’ba atipiriru ku; ma vile joa enya yo, bongoi vini yo; emi ngani ma ’ba opiru ’ba ma drilia ku.

⁸A’disiku kumu si Yerusalemuni ra, te Yuda e’de va ’bo; yini omba ’bale Yehova be e’yo ’yoza yini pisi ’yeta yini berisi, eri ma mile dizani nini engazu aokoru.

⁹E’yo yini ’ba opezu operi eri e’yo eti nze yi ma ruaa; te yi e’da e’yo onzi yini ekile Sodomale, yi zini eri ku candi orindi yini dri! Yini yi ma ngulupi ’yele onzirisi.

¹⁰Mi ma ’yo ’ba kililiru ’diyi ma e’yosi, kini eri nga ovu onyiru eri dri, yini ngale ’yeta yini ma efi nyalerisi.

¹¹Candi ’ba azi onzi ’yepiri dri! Eri nga ovu onzi eri dri, ’bani ngale dri erini ma ’yeta ma panga fele eri dririsi.

¹²Te ’ba mani yi ’dini-anzi inza yi ra, azini oku ce yi dri. Suru mani la! ’Ba emi dri cepi ’diyi fe emi aba aba, yi geri emini acizu alenia ’diyi ma dri ja.

¹³Yehovani pa so ’ba esuzu, eri pa so suru ndu ndu ma e’yo lizu.

¹⁴Yehovani nga fi e’yo lizu ’ba ’wara suru erini ma dri cepi ’diyi be, opi were yini be indi: ’Ba amvu pati zabibuni nyapi ’diyi bani emi’i, afa emini pale ’ba alioru ’diyi driri ovu jo eminia.

¹⁵Emini ’ba mani omizu ’diniri ma efi ngoni ya? Emi ’ba alioru ma andreti ’i a’disi ya? Opi ’yo ra, Yehova asikari ongulumuruni.

¹⁶Azini vini Yehova ’yo ra, Ezoanzi Zionia ’diyi yini ovule afusirisi yini acile ombele o’bezasi, azini mile acisirisi, yini acile afusirisi, yini aiyoro cole yi ma pasirisi;

¹⁷e’yo ’disi Opini nga ezoanzi Zionia ’diyi ma drini oti oti anzosi, azini Yehovani nga yi ma rua ma esele zizaruri ’ba pililiru.

¹⁸O’du ’dasi Opini nga emve yini ma afu nze ra, bongo drini ’bani cale cari pie, onyiafa wura mbaniri be ’diyi pie;

¹⁹nzia bia ’diyi pie, mele dria ’diyi pie, bongo ombelea, ’diyi pie;

²⁰nyoro dria ’diyi pie, anziriku paa ’diyi pie, opilemvu pie, lu’bu odu arikariruni pie, siri’ba pie;

²¹anziriku drimvani pie, nzia omvua ’diyi pie;

²²afa suza omua ’diyi pie, koti pie, bongo ’bele budria ’diyi pie, jurua pie;

²³mandara were ’diyi pie, bongo mile be nyingirikia ’diyi pie, bongo dri ombezu ’diyi pie, bongo andreti a’buzu ’diyi pie dria.

²⁴Te eri nga eca ’dini, afa aji be arikariruri ma paria afa mazani nga ovuni; opilemvu paria yi nga baka a’di’i; dri’bi edele onyiru ’diyi ma paria, ’ba dri nga ovu tuaru; bongo suza ma paria ’ba nga koliba su’i; nyibileko nga di ovu rua ndriza ma pariani.

²⁵’Ba mini nga o’de seisi, ’ba mini okpo be ’diyi nga o’de omba ma alia.

²⁶Kalitile erini nga wu, yi nga lulu: ga indi; eri nga ovu kuzaru pirini, eri nga ri va nyakua ra.