Read lugbara Isaya 30 Bible Online

Isaya 30 - lugbara bible

Isaya 30

¹Drileonzi anzi ombupi amve ’diyi dri, Yehova ’yo ra, egata ndrupi, te ma vu ku ’diyi; yi a’bu yi, afa ti a’buzurisi, te afa nde engani orindi mani vu ku, yi ma ere ezata ezata ma dria ani;

²’ba nde yi ad sizu va Misiria, te yi zini nga e’yoni ma tia ku, yi le yi ’ba okporu okpo Faraunisi, yi ovu a’itasi endrilendri Misirinisi ’doni ya!

³E’yo ’disi okpo Faraunirini nga i oja emini drinzaru, azini a’ita endrilendri Misirini ma aliari nga ovu emi dri dri jataru.

⁴Te opi erini ovu Zoania, azini ojio erini ca Hanesia,

⁵yi dria nga ovu drinzasi suru ecopi yi aza kopi ku, aza koza ejipi orodri be ku, te drinza azini o’data ejipiri’i ma e’yosi.

⁶E’yo eceza anyapa angu uruleruria ’diyiniri. Angu candi pini rua suza beri ma eselesi, pari kamiandriruni engazu kamiago be, ’boroa pi uri aciru sapi sa sa arialararuri beri, yi ji lonyi yini akanya kariceru ’diyi ma ngukua, azini afa yini aje amboru be ’diyi indi ngamia ma oru dria oye, suru ngapi yi aza kopi kuri vu.

⁷A’disiku Misiri koni ’ba alua ma aza ’dinini ku, e’yo ’disi ma ’da eri ma ru Rahabu ripi asimarukururi’i.

⁸Te mi mu, mi si e’yo ’diri yi ma milia oni ruaa, mi si eri buku ma alia, ’dini eri ma adri kpere etu ngapi ecapi ndoria ’dani ’dani.

⁹A’disiku yi suru edematararuri, anzi inzo lipi ’diyi, anzi lepi azita Yehovani eripi ku ’diyi;

¹⁰yi ’yo ’ba eceta ndrepi ’diyi ma tia, Emi ndre ku; azini ’ba nabiru ma tia, Emi olu e’yo kililiru ama tia ku; emi ’yo ama tia e’yo aluzaru ’diyi’i, emi olu e’yo lokiriru ’diyi’i,

¹¹emi da emi geriasi, emi oja emi kalaa, emi fe Mungu Alatararu Israeliniri ma ovu ama milia dika ku.

¹²E’yo ’disi Mungu Alatararu Israeliniri ’yo ’dinile, Emini e’yo ’diri onzole onzorisi, emini ovule a’itasi inzata emini ’ba inzazuri pi ma alia asi mbaza be, emini pa sole ci e’yo ’diyi ma alia indirisi;

¹³e’yo ’disi e’yo onzi ’diri nga ovu emi dri ekile abi ’yepi i asupi varile, i bipi amve abi izuru ma alia, nyozanini ngazu ecazu mbele nikokorurile;

¹⁴azini eri nga eri ofu ekile ’bani imvu ’ba imvu sipirini sileri ofule nyingiriki yiki korurile, ’ba econi ani imvu ajikua isuzaru eselenia dri fupi aci e’duzu atilikua, kani yi ekozu ’bile ’bani gale yi ta mbazuria ku.

¹⁵A’disiku Opi Yehova, Mungu Alatararu Israeliniri ’yo ’dinile, Emini emvizurisi, emini ava lizurisi, emi nga emi pa ra; emini ovuzu e’yere asi teza berisi, emi nga ovu okpo be. Te emi leni ku,

¹⁶te emi ’yo ra, Yo Ama nga di apa akanya dria; e’yo ’disi emi nga apa ada; azini emi ’yo kini, Ama nga tu akanya ongu be ’diyi ma dria; e’yo ’disi ’ba emi dropi ’diyi nga ovu ongu be.

¹⁷’Ba alifu alu nga apa, isu ’ba alu a’dule ega yi ma dria, ’ba towi ka ega emi dria emi nga apa ra, de nga ’ba kuni emi ekile pati sule oni ma driarile ku, ekile bendera i’dile oni were ma driarile.

¹⁸Te e’yo ’disi Yehovani nga te, eri ma ovu asi ndriza be emi vu ani; te e’yo ’disi eri nga i ’ba uru, eri ma ovu yikisi emi vu ani. Yehovani ovule Mungu e’yo liza kililirunirisi; ’ba dria eri tepi ’diyi yi ovu drileba be.

¹⁹A’disiku suruni nga adri Zioni ma alia Yerusalemua; mi ngani owu mindresi dika ku. Mini wuria o’dukosi eri nga ovu mi vu asi ndrizasi ada; eri ka wuta nde eri ra, eri nga e’yoni omvi mi tia ra.

²⁰Ka tro Opini enya e’yo ewaruniri pi fe mi dri yi mvuza inzataniri be ti, ’ba mi imbapi ’diyi ngani ovu zizaru dika ku, te mi mileni nga ’ba mi imbapi ’diyi ndre ra.

²¹Mini ’yeria mi oj aria kani dri ndia, kani dri ejia, mi bileni nga o’duko eri mi vutia, ’yozu kini, Geri eri ’do’i, mi aci alenia.

²²Azini mi di nga dahabu ’bani o’bale wura ’bani inzile inzi ’diyi ma ruaari eza, mele ’bani o’bale wura edele aya akapi aka acisi ’diyi ma driari be. Mi nga yi ’be amve afa ondirule; mi nga ’yo tinia, Mi da mi ’dale

²³Te eri nga ozoo fe ori mini dri, mi nga ori ri nyakua ani, eri nga vini nyaka fe afa nyakuni ka’diyisi, eri nga ka tu anzuzaru. O’du ’dasi ti mini nga iribi nya nyamuko walaru ma alia;

²⁴ti monioru ’diyi azini akanya kariceru e’bu sepi ’diyi be indi, nga nyaka a’i be aluzaruri nya ra, mileni ndrile peu pisi koi beri’i.

²⁵Te oni izuro ma dria dria, azini oni were ma dria dria, yi raza amboru nga ovu indi yi were ’diyi be, o’du ’bani ’ba ofuzu turisi, o’du jo izuro ombanirini e’dezu varisi.

²⁶Azini vini, diza mbaniri nga ovu diza etunile, diza etuniri nga di okpo be paleko aziri, ekile diza o’du azirinile, o’du Yehovani i ma suru ma bele ombezu, azini ceta azoru yi ma ruaari atizurisi.

²⁷Mi ndre, ru Yehovani emu engazu ziri, vepi adra erini acirusiri, azini acika nyipi iniciciruri be; tile erini ga tre asi vezasi, andre erini ovu ekile aci vepi okposirile;

²⁸ava eri ma tiliari ovu ekile yi raza tipi tre cazu kpere ’ba ombele vusirile; eri ma oya ’ba juruni keikei e’yo dri jazanirisi, azini baka akanya ma dri cezu, fepi yi ma aba abari, nga ovu ’ba suru ndu ndu ma tilia.

²⁹Emi nga di ovu ongo be ekile ini ’bani omu alatararu nyazuri ma aliarile; emi nga ovu emi asia ayikosi indi, ekile o’du ’bani muzu efizu ejeleko be oni Yehovani ma alia, Kata Israeliniri vurisirile.

³⁰Azini Yehovani nga fe ’ba ma eri ma o’duko dizaruri, azini eri nga i ma dri erini dile vari ece ’ba dri, asi veza i ma adraniri be, aci diza aci vepi okposirini pi wuta noza amboruniri pie, oliriko pie, ozoo ’dipi si be ’diyi pie.

³¹A’disiku o’duko Yehovanisi ’ba Asuriaa ’diyi nga yi onyo nyingiriki, eri ka co kalisi.

³²Azini cota kali dri jatani Yehovani ngale ’bale eri ma ruaari, nga ovu arimva pisi o’di be; te eri nga omba ’ba yi be omba rua yazaniri ma alia.

³³A’disiku ’ba ede Tofeti drio; ede eri opi dri, ede eri aliru walaru indi, otrozaniri ovu aciru eja be tu; ava Yehovani ekile oni rapi menemeneru acisirileri fe eri ma ko ti ani.