Read lugbara Isaya 31 Bible Online

Isaya 31 - lugbara bible

Isaya 31

¹Drileonzi ’ba esipi Misiria aza koza ndapi, yi atipi akanyasi ’diyi dri, a’ita ’bapi gari ombani ’diyi ma alia yini ovule o’birurisi, a’ita ’bapi ’ba tupi akanya dria ’diyi ma alia yini ovule okporurisi ’diyi, te yi luni Mungu Alatararu Israeliniri vu ku, yi ndani Yehovani ku!

²Te eri ovu onduaru indi, eri nga e’yo onzi eji, eri ngani e’yo erini ’yole ’diyi omvi vile ku, te eri nga enga ’ba azi onzi ’yepi ’diyi ma jo ma ruaa, azini ’ba ’yeta onzikanyaru ’yepi ’diyi ma aza koza ma ruaa indi.

³Te ’ba Misiria ’diyi yi ’bani, yi ovuni Munguni ku; akanya yini ovu rua ari be, ovuni orindini ku. Te Yehova ka nga i ma dri eju, ’ba ’ba aza kopiri pi nga aba, ’ba erini azani koleri nga e’de va, yi dria tualu nga dri ja ra.

⁴A’disiku Yehova ’yo ma tia ’dinile, Ekile kami ka one ra, azini kamimva ka one indi, afa erini bileri ma e’yosi, ’ba ka ’ba kabilo ocepi ’diyi omve o’biru omba ’bazu eri be ti, eri ngani ovu urisi o’duko yinisi ku, eri ngani i ’ba va otreza yini otrelerisi aluni ku, ekile ’dinile Yehova asikari ongulumuruniri nga esi va oni Zionini ma dria omba ’bazu, oni were erini ma dria indi.

⁵Yehova asikari ongulumuruniri nga Yerusalemu ma agei te ekile ariani salerile; eri nga eri agei te, nga eri ari, eri nga aga eri ma dria, eri nga eri ma ta mba ra.

⁶Emi anzi Israelini la, emi oja emi ’ba emini mbuzu eri ma ruaarisi amveri vu dika.

⁷A’disiku o’du? ’dasi yi dria alu alu, yi nga wura yini dahaburu azini wura yini meleru ’be amve dria, emi drini edele emi dri ezataru ’diyi.

⁸O’du ’dasi ’ba Asuriaari nga e’de sei sia, te ovuni sei ’baniri ku; seini nga eri dri jani, te ovuni sei ’baniri ku; eri nga apa seisi ra, karile erini nga ovu ati’baru musoro ’bezu.

⁹Te kata erini nga i de ra uri ma e’yosi, azini opi erini ’diyi nga ovu urisi bendera ma e’yosi, Yehova ovupi aci erini be Zionia, azini pari aci eduzuri be Yerusalemuari ’yoni.