Read lugbara Isaya 32 Bible Online

Isaya 32 - lugbara bible

Isaya 32

¹Emi ndre, opini nga angu nya opiru onyi ma alia, azini opianzini nga ’ba dri ce e’yo liza kililiruri ma alia.

²Azini ’ba alu nga ovu ekile pari ’bani yi zizu oli ma e’yosi, ekile pari ’bani yi dozu ci oliriko ma e’yosirile, ekile yi raza pari a’wiru ma alia, ekile oni izuru ma endri angu ewaru ’bani andezu aniri ma aliarile.

³Azini ’ba afa ndrepi ’diyi ma mile ngani asa ku, azini ’ba e’yo eripi ’diyi ma bileni nga eri ra.

⁴’Ba afa ’yepi mbele mbeleri ma asini nga nita ma e’yo va ra, azini ’ba e’yo ’yopi ti ombezasi ’diyi ma tileni nga ovu ngonde e’yo ’yozu kililiru.

⁵Yi ngani vini ’ba tokoni ma ru ’da ’ba onyiru turi’i dika ku, yi ngani vini ’ba asi onzi beri omve ’ba mile be uru afa fepi turi’i ku.

⁶A’disiku ’ba tokoni nga e’yo toko ’yo’i, azini asi erini nga e’yo onzi ega: e’yo saaru ’yezu, azini imbata inzoru ’yozu Yehova ruaa, ’dini eri ma fe ’ba abiri beri ma orindi ma ovu ani, eri ma fe afa mvuza ’ba yi avijo berini ma de i ani.

⁷Afa ’ba azi onzi berini azi ngazu ’diyi yi onzi; eri ega egata onzikanyaru ’ba e’yereri ma dri jazu e’yo inzoru’diyisi, ada, ka tro eri o’du ’ba alio ndeni e’yo kilili ’yozurisi ti.

⁸Te ’ba onyiru mile be ururi, eri afa onyiru ega’i, eri nga adri afa onyiru ’diyi ma alia’dani.

⁹Emi enga, emi oku ovuouru o’api toko ’diyi, emi eri o’duko mani; emi ezoanzi e’yo egapi ku ’diyi, emi co emi bile oluta mani vu fo.

¹⁰A’disiku eli alu drinia o’du azini be ka aga ’bo, ’ba nga candi fe emi dri, emi oku e’yo egapi ku ’diyi; zabibuni ngale kale kurisi, azini indi o’du efi kaza nde tizurini ngale ecale kurisi.

¹¹Emi ma ma oya, emi oku ovuouru o’api toko ’diyi la, emi asi ma oti, emi e’yo egapi ku’diyi; emi otru bongo emini, emi ku emi pililiru, emi su koliba emi opilia’i.

¹²Yi nga yi ma agati di candisi amvu onyiru tu ’diyi ma e’yosi, zabibu efi kapi turisi indi.

¹³Suru mani ma angua oci piyi nga enga afa si be ocile ’dini ’diyi be; adaru, jo ayikoru ovupi aku amboru gapi ayiko be treria ’diyi dria ma dria.

¹⁴A’disiku ’ba nga jo amboru opiniri ku andruru ra, aku amboru ’ba be treri nga ovu toko; oni izuru jo izuru ’bani angu luzu aniri be ’ba nga yi ku ovuzu guleru anyapa asea ’diyi dri ’dani, ayiko akanya asea ’diyi dri, pari kabilo pini iribi nyazuriru;

¹⁵de nga osuni Orindi engapi ’buari ama dria ku, azini angu roko driari ojani i amvu efi ’yapi turiru ku, azini de nga ’ba lani amvu efi ’yapi turi ekile angu ocerurile ku.

¹⁶O’du ’dasi e’yo liza kililiruri nga adri angu roko driaria, azini onyini nga te amvu efi ’yapi turi ma alia.

¹⁷Azi onyiniri nga ovu asi anzururi’i, azini efi kaza onyini ’yale ’ba ma aliari nga ovu asi e’yere pi ’dani ’dani asi teza be.

¹⁸Azini suru manini nga adri jo asi anzuruni ma alia, jo la ’bani ojale ku ’diyi ma alia, pari ava lizani asi anzuru beria.

¹⁹Te ozooni nga ’di si be, o’du angu oceruni yi bizu varisi, azini aku amboruni nga i asu va teketeke ra.

²⁰Emi’i, emi ori ripi yi dria ma kalaa ’diyi, emi drilebaru, emi’i ’ba ti pi ofupi amve akanya be ’diyi.