Read lugbara Isaya 33 Bible Online

Isaya 33 - lugbara bible

Isaya 33

¹Candi mi dri, mi ’ba ’ba azini ma afa ezapi omba ma aliari, te ’ba ezani mi ma afa omba ma alia ku; mi ’ye mini ’ba vu lokirisi ra te ’ba ’yeni yini mi lokirisi ku! Mi ka de ’ba azini ma afa ezazu ’bo yi vini nga afa mini eza indi; azini mi ka de ’ba ’yezu lokirisi ’bo, yi nga mi ’ye lokirisi ra.

²Yehova, mi ovu ama vu asi ndrizasi fo; drio ama te mi ra. Mi ma ovu wu okporu amani o’biti vusi, pata amani indi o’du candini ma alia.

³Otreza ’ba ongulumuru engapi ombasi ’diyinisi suru ndu ndu apa ra, mini mi engaria uru suru amboru ’diyi ere yi ra;

⁴’ba nga afa emini ’bani opale omba ma aliari oku o’doani afa okulerile; ’ba nga ombu drinia ombini ombulerile.

⁵Yehova ’ba i uru tu, erini adrile ururisi; eri fe Zioni ga tre e’yo liza kililiruri pisi onyi be;

⁶azini o’du mini ma alia e’yo driani nga pa so oyakokoru, pata be, ondua pie, nita be tre tre; rota Yehovani ovu lonyi erini.

⁷Mi ndre, ’ba yini ombaru ’diyi, yi owu amve; ojio lepi asi anzuru ma e’yo edepi ’diyi owu okposi.

⁸Gboko amboru ’diyiovu ezazaru, ’ba acipi geriari yi curu’do yo. Eri asu aziza ’bo, eri ngu aku amboru ’diyi onzi, eri asini e’yo ’banisi ku.

⁹Anguni owu owu, eri oyi oyi candisi; Lebanoni ovu drinzasi, eri onyu onyu; Saroni ovu ekile angu roko driarile; Basani pi oya yi bini luzu va, Karimeli be ra.

¹⁰Te di ma nga enga curu’do, Yehova ’yo ra, ma nga ma enga curu’do; curu’do ma nga ma ’ba uru tu.

¹¹Emi nga anyadrileko ti emi alia, emi nga anyapati osi; ava emini ’yaleri ovu aci ngapi emi vepi kairi,

¹²Suru ndu ndu nga ovu vezaru ofuta emverule, ekile oci ’bani gale va ’bani vele acisirile.

¹³Emi ovupi re ’diyi, emi eri e’yo mani ’yeleri; azini emi’i ovupi ogogo ’diyi, emi ma a’i ma ovu okpo be ada.

¹⁴’Ba azi onzi ’yepi Zionia ’diyi ovu urisi; rua yaza bi ’ba Mungu inzipi ku’diyi: A’dini ama eselia nga eco adri aci vepi veri be tualuni ya? A’dini ama eselia nga eco adri aci afa vepi ’daniri beni ya?

¹⁵’Ba acipi onyiru, e’yo ’yopi kililiruri nga adrini; ’ba orodri ’ba ’ba inzapi ’diyini isuleri ngupi onzi, i ma dri oyapi yi kazu afa ti razuri a’izu kuri, eri’i i ma bile asepi ci eri kazu e’yo arini erizu ku, i ma mile bipi ci eri kazu e’yo onzi luzu ani kuri’i.

¹⁶Eri’i nga adri pari ururia ani; angu erini i ta mbazuri nga ovu pari okporu kataniri; ’ba yi nga enya fe erini ra, yi mvuza erini ngani i de ku.

¹⁷Mi mileni nga opini ndre rua ndriza erini ma alia; mi mileni nga angu ovupi walaru turindre ra.

¹⁸Asi mini nga e’yo uriniri iyiki: ’Ba musoro lapi, nzizani o’bipiri ngoa ya? ’Ba jo izuru ’diyi ma kalafe lapiri ngoa ya?

¹⁹Mi ngani suru asi be ombaruri ndre ku, suru e’yo ewaru mini ecole vale kuri ’yopiri, mi ngani suru ti osutaru mini ecole vale kuri ’yopiri ndre ku.

²⁰Mi ndre Zioni, aku okuza amani inzita berini! Mi mileni nga Yerusalemuni ndre, ovuzu pari ’bani ovuzu alenia asi anzuru beriru, hema ’bani ngale ’bale pari azinia kuri, ’bani ngale aloni nzele ku, eri ma bakani ngale i cele kuri.

²¹Te pari ’da ma alia Yehovani nga ovu ama be dizasi, pari yi raza walaruni ovuzu alenia yi raza were ’diyi beria,o’bo ’bani pele patisiri acini pari nde ma alia ku, oguru onyiru agani vini ’dasi ku.

²²Yehovani ovule ’ba e’yo amani lipiri’irisi, Yehovani azita fele ama dririsi, Yehovani ovule opi amanirisi; eri nga una pa ra.

²³’Ba ayu oguru mini ma baka ’bo; yi econi pati bendera ’izuri ma eti osi okporu kirikiri ku, yi econi bendera ajazaru ku. O’du ’dasi ’ba awa lonyi amboru yini bile omba ma aliari; ’ba pa acozaru ’diyi bi lonyi ndeni.

²⁴’Ba ovupi angu nde ma aliari ngani ’yo, Ma azoru, ’dini ku; ’ba adripi angu nde ma alia ’diyi, e’yo onzi yini nga ovu wuzaru.