Read lugbara Isaya 35 Bible Online

Isaya 35 - lugbara bible

Isaya 35

¹Angu didi pi nga ovu ayikosi angu asokoruri be, angu roko driari nga ovu ayikosi, eri nga fu zo ojole;

²eri nga fu zo tu, eri nga ovu ayikosi ayiko pisi ongo ngoza be. Ba nga diza Lebanonini fe drinia, afa onyiru tu Karimeli pini Saroni be. Yi nga diza Yehovani ndre, afa onyiru tu Mungu amanirini.

³Emi ’ba ’ba dri okpo kokoru ’diyi ma dri okporu, emi fe okpo ’ba kumuti be okpo kokoru ’diyi dri.

⁴Emi ’yo ’ba asi be rururu ’diyi ma tia, Emi ovu di okporu, emi ru ku; Emi ndre, Mungu eminiri nga emu arioti ofe avu ofeza Munguni lilerisi. Eri nga emu emi pa ra.

⁵Etu ’dasi ’ba mile odraza ’diyi ma mile yi nga yi ozi mgboru, ’ba bile dirinyaru ’diyi ma bile yi nga yi ozi mgboru;

⁶etu ’dasi ’ba pa acozaru ’diyi uga ombu nyajole, ’ba ti be ndindiruri ma andreni nga ongo ngo. A’disiku yini nga ega angu didia, yi raza yi nga ega angu roko driaria indi;

⁷cinya dripi aciruri nga i oja pari yini tizuriro, angu a’wiruni nga i oja pari yi a’diniriro indi; pari obalakoni ovuzu yini lazu aleniari nga ovu aseru, omi pi ase izuru be.

⁸Te gboko amboru nga ovu ’dale, eri geri ’bani ngale runi ’dale Geri alataniri; ’ba ondiru ’diyi ngani aga aleniasi ku, te eri nga ovu ’ba ’dayi dri; ’ba acipi geria ’diyi, ka tro ovu ondua kokoru ti, ngani aba alenia ku.

⁹Kami ngani ovu ’dale ku, nguru azini ngani tu alenia ku; ’ba ngani yi isu ’dale ku, te ’ba onzele ’bo ’diyi nga aci aleniani.

¹⁰Te ’ba Yehovani onzele ’diyi nga emvi ra, nga emu Zionia ongo ngoza be, ayiko ’dani ’daniri nga ovu yi ma dria; yi nga ayiko isu nyona be, te candi pi otaza be nga apa ziri.