Read lugbara Isaya 37 Bible Online

Isaya 37 - lugbara bible

Isaya 37

¹Eri eca ’dini, opi Hezekia ka e’yo nderi eri ra, eri asi bongo ini ra, su koliba i ruaa, mu fi Yehova ma joa.

²Eri pe Eliakimu, ’ba ’ba opi ma loa ’diyi ma driliari pi ma ti nabi Isaya Amozi mvi vu, Sebina ’ba waraga sipiri pie, ’ba ’wara ’ba edeta edepi ’diyi ma eselia ’diyi pie, su dria koliba yi ruaa.

³Yi nga ani ’yo eri tia, Hezekia ’yo ’dinile kini, O’du andruri eri o’du ocokoni, eri o’du egazu ’ba driarini, azini o’du drinzani; a’disiku etu anzi osizuri eca ’bo, te okpo yi osizuri yo.

⁴Kani Yehova Mungu miniri nga e’yo Rabisake, opi erini opi Asuriaarini tini epele Mungu idriru o’dazurini ’yole ’diyi eri ra, kani eri nga e’yo okporu omvi e’yo nde Yehova Mungu minirini erile ’diyi ma e’yosi; e’yo ’disi mi zi Mungu ’ba joloko acepi ’diyi ma e’yosi.

⁵E’yo ’disi opi Hezekia ma ati’ba eca Isaya vu ra.

⁶Isaya nga di ’yo yi tia kini, Emi ma ’yo opi emini tia, Yehova ’yo ’dini kini, Mi ru ku e’yo mini erile ’diyisi, e’yo nde ati’ba opi Asuriaarini ’diyini ma o’dazu ’diyisi.

⁷Mi ndre, ma nga orindi ’ba eri ma alia, eri nga di e’yo kuza azini eri ra, eri nga mvi ani angu inia; te ma nga fe eri ma dra sei sia, angu i ma ngulupini ma alia.

⁸E’yo ’disi Rabisake mvi di ra, isu opi Asuriaari erini omba ’baria Libina be; te eri eri ndra kini eri ku Lakisini ’bo.

⁹Azini eri eri e’yo kuza e’yo Tirihaka opi Etiopiaarinisi kini, Eri efu omba ’bazu mi be. Te eri ka e’yo ’diri eri ra, eri pe ojio ma ti Hezekia vu, kini,

¹⁰Emi ma ’yo ’dini Hezekia opi Yudaari ma tia kini, Mi fe Mungu mini a’ileri ma ici mi ku, kini, ’Ba ngani Yerusalemuni fe opi Asuriaari ma dria ku.

¹¹Mi ndre, mi eri ’bo e’yo opi Asuriaa ’diyini ’yele angu dria dri, yi ezazu teketekeri. Te yi nga lu mi pa’i ya?

¹²Adrou suru ndu nduni, ma a’bipini yi dri jale, yi Gozani pi, Harani pie, Rezefu pie, anzi Edeni ovupi ndra Telasaria ’diyi pie ’diyi, yi opa yi ndra ra ya?

¹³Opi Hamatiniri pi, opi Aripadiniri pie, opi aku Sefarivaimuari pie, opi Henaniri pie, opi Ivaniri pie dria yi ngoa ya?

¹⁴Hezekia nga di waraga a’i ’ba ojioru ’diyi ma dria, nga eri la ra; te Hezekia nga di tu fi Yehova vile joa, nga waraga nde aja Yehova milia ra.

¹⁵Te Hezekia nga zita zi Yehova ma tia, kini,

¹⁶Yehova asikari ongulumuruni, Mungu Israelini, ripi ’Kerubi ma driari, mi ovu Mungu, adaru mi’i a’dukule, suru nyakuni dria ’diyi ma driliari’i; mi ’ba ndra ’bu pi nyaku be.

¹⁷Mi co mi bile, Yehova la, mi eri; mi zi mi mile, Yehova, mi lu; mi eri e’yo Senakeribuni ’yole ’diyi dria, erini tini epele Mungu idriruri o’dazu ’diyi fo!

¹⁸Adaru, Yehova, opi Asuriaa ’diyi eza suru dria angu yini be ’bo,

¹⁹yi o’be adrou yini acia ’bo; a’disiku yi ovuni Munguni ku, te kiri afa ’ba drini edele patisi azini onisi ’diyi; e’yo ’disi yi ja yi dri ’bo.

²⁰E’yo ’disi Yehova Mungu amaniri la, mi ari ama eri ma dria fo, ’dini suru nyakuni dria ma ni ani mi ovu Yehova’i, mi’i a’dule.

²¹Etu ’dasi Isaya Amozi mvi nga ’ba ti pe Hezekia vu, ’yozu kini, Yehova Mungu Israeliniri ’yo ’dini kini: Mini e’yo zile ma tia Senakeribu opi Asuriaari ma e’yosi,

²²e’yo Yehovani ’yole eri ma driari eri ’di’i: Zioni zi i ecipi agupi be nga kuri eri ’ba mi aparakaru, eri onzo mi ogutasi; Yerusalemu zi oya i ma dri misi.

²³Mi fe drinza a’di vu, mi o’da a’di’i ya? Mi enga mi o’duko uru, mi ’ba mile mini uru afusi a’di vu ya? Mungu alatararu Israeliniri vu!

²⁴Ati’ba mini ’diyi ma tisi mi o’da Yehovani ’bo, mi ’yo vini indi, Ma tu gari mani ombani o’biru ’diyi be kpere oni ma dri mbili ’diyia, Lebanoni ma angu esele agaduari alia; ma nga pati marioru erini izuru agapi ’diyi ga va, azini pati erini masaru ’diyi indi; ma nga tu pari erini re turia, ma nga fi amvu erini efi kapi tori ma pati kakau ma eselea ra.

²⁵Ma ga ’bile yini, ma mvu yini ra, ma nga yi ara Misirini dria ’diyi anga ma pa agelesi.

²⁶Mi erini e’yo mani asisile mani ’bazu drio e’yo nderi ’yezuri ku ya? Engazu ndra drio ma otu ma asia e’yo mani ngale ’yele curu’dori, ’dini mi nga aku amboru okporu abi be kaliru ’diyi oja andruru.

²⁷E’yo ’disi ’ba alenia ’diyi ovu okpo be were, yi ovu urisi asi otiza be, yi ovu ekile ase asearile, ekile ibiko ibirile, ekile ase engapi jo driarile, ekile anya ’wipi bibirurile.

²⁸Te ma ni rita mini rizu vari pi efuza mini efuzu amveri pie, fiza mini pie, adra okporu mini ’bale ma vuri pie.

²⁹Mini adra okporu ’bale ma vurisi, afu mini ma e’yoni ecale ma biliarisi, e’yo ’disi ma nga iwu mani so mi omvulea, ma nga aya mani ’ba mi tilia, ma nga mi oja vile geri mini efuzu emuzuriasi.

³⁰’Di nga ovu ecetaru mi dri: eli ’dorisi emi nga nyaka zopi i ma drisi ceniri nya’i, eli irisi emi nga anya angangaru engapi ori ndraka ’darisiri nya’i; te eli narisi emi ma ri ori, emi lo anya, emi sa amvu zabibuni, emi nya efini indi.

³¹Te ’ba jolokoru acepi yi papi suru Yudani ma eselia ’diyi, yi nga ola yini so va dika, yi nga vini efi ’ya uru indi.

³²Te ’ba acepi ’diyi nga fu Yerusalemuasi, ’ba apapi ’diyi nga fu Zioniasi. Asi aciru Yehovani nga e’yo ’di ’yeni.

³³E’yo ’disi Yehova ’yo ’dini opi Asuriaari ma e’yosi, kini: Eri ngani di efi aku ’diria ku, eri ngani vini ’ye gbi ’dia ku, ngani vini eca aku ’dori ma drilia gombere ombani be ku, ngani nyaku oku apiferu ageinia ombasi ku.

³⁴Geri erini emuzuri, geri ndesi eri nga mvi ra, te eri ngani efi aku ’doria ku, Yehova ’yo ra.

³⁵Te ma nga a’di ’di aku ’diri pazu, ma ngulupi ma e’yosi azini ati’bo mani Daudi ma e’yosi indi.

³⁶Te malaika Yehovani nga di efu, eri fu ’ba alifu turu alu kali aro drini towi, pari ’ba Asuriaa ’diyini hema asozuri ma eselia; te ’ba ka enga o’bitisi, mi ne, ’ba nde ’diyi dria ovu avuru.

³⁷Te Senakeribu opi Asuriaari nga di enga dri kozu, mvizu ovuzu Ninevea.

³⁸Te eri nga eca ’dini, erini inziria adrou ini Nisiroki ma joa, anzi ini Adrameleki pi Sarezeri be yi nga eri ’di seisi,te yi apa angu Araratia, Te Ezarihadoni mvi erini nga di opi nya eri ma pariani.