Read lugbara Isaya 41 Bible Online

Isaya 41 - lugbara bible

Isaya 41

¹Emi angu miri tia ’diyi la, emi adri ciri ma drilia; emi ku suru ndu ndu ma isu okpo o’diru; emi ku yi ma esi yi ogogo, emi ku yi ma nze e’yoni; onyiru ama ma osi ama ogogo ti ecizu e’yo lizu.

²A’di enga ’ba alu engapi pari etuni efuzurialeru erini omvele emuzu i ma palaa onyi ma aliarini ya? Eri suru fe ovuzu va eri ma drilia, eri fe eri ma ce ’ba opiru ’diyi dri; eri fe yi ovuzu ekile irifurale sei erini dri, ekile anyadrileko olini drolerile osu eriniri dri.

³Eri dro yi, eri aga nzo rua be ala, ada eri aga geri erini i ma pa ’bazu alenia ku ’diyisi.

⁴A’di ede e’yo ’dirini; a’di ’ye ’dinile ya? a’bianzi omvezu engazu e’doza drioriani ya? Ma Yehova, ma okori’i, ma vileri’i; ma eri’i.

⁵Angu miri tia ’diyi ndre ra, yi ovu urisi, angu nyaku ma kalatini asizuri ma tia ’diyi ovu rua yaza be; yi osi yi ogogo, yi emu ra.

⁶Yi alu alu ko ’ba yi ma jo ejelea ’diyi ma aza, yi alu alu ’yo yi ma adripi tia, Mi ma ovu urisi ku!

⁷Geri ’disi onduou bau edepiri omi onduou mele edepiri ma asi, azini ’ba mele edepi alaru opaŋasiri omi ’ba oka dipi oyisiri ma asi, ’yozu aro afa ecizu tualuri ma e’yosi ’dini kini, Eri onyiru; eri nga di eri eci musomarisi, eri ma oja i ani ku beni.

⁸Te mi, Israeli, ati’bo mani, Yakobo, mani pele ’bori, ori Iburahimu ma ma agyiniri;

⁹mi’i mani e’dule engazu nyaku ma kalatini asizuria, mani omvele engazu kala eriniari, ma ’yo ndra mi tia, Mi ovu ati’bo mani, ma pe mi ’bo, ma ’beni mi amve ’de ku;

¹⁰mi ru ku, mani ovule mi berisi, mi asi ma oti ku, mani ovule Mungu minirisi; ma nga okpo fe mi dri, ada ma nga mi aza ko, ada, ma nga mi edre uru dri ndi mani onyinirisi.

¹¹Mi ndre, ’ba engapi mi ruaa aokosi ’diyi dria nga ovu drinzasi, yi nga aba aba; ’ba omba ’bapi mi be ’diyi nga ovu toko, yi nga dri ja ra.

¹²Mi nga yi nda ra, ’ba omba ’bapi mi be ’diyi, te mi ngani yi isu ku; ’ba a’di ’dipi mi be ’diyi nga ovu toko, yi nga ovu ekile afa tokole.

¹³A’disiku ma’i, Yehova Mungu mini, ma nga mi dri ndi bi ma’i; ’yozu mi tia, Mi ru ku, ma nga mi aza ko ra.

¹⁴Mi ru ku, mi o’buni Yakobo, azini emi’i, emi ’ba Israelini ’diyi! Ma nga emi aza ko ra, Yehova ’yo ra; azini Eri’i emi Onzepiri, eri ovu Mungu Alatararu Israeliniri’i.

¹⁵Mi ndre, ma nga mi ’ba ovuzu afa anya cozu o’diru, ovupi si be cizaruriru; mi nga oni izuru ’diyi oco ra, mi nga yi ogba nyingiriki, azini mi nga oni were ’diyi oco ekile anyadrilekole.

¹⁶Mi nga yi o’bi kobisi, azini olini nga yi ’du ra, azini vini olirikoni nga yi ere ra. Te mi’i, mi nga ovu ayikosi Yehova ma alia; mi nga mi enya Mungu Alatararu Israelinirisi.

¹⁷’Ba alioru, ’ba afa kokoru ’diyi be, yi nda yi mvuza, te eri yo, andre yini ’wi yi avijosi; ma’i Yehova, ma nga e’yo omvi yi tia ma’i, ma’i Mungu Israelini, ma ngani yi ku ku.

¹⁸Ma nga yi raza ofu oni izuru dri be nditiri ’diyi ma aliasi, ma nga fe yi a’di ma ega e’bu ma alia ra; ma nga angu roko driari oja yii tizaru, ma nga angu a’wiru oja pari yi a’diniriru.

¹⁹Ma nga pati sa angu roko driari ma alia, mario pie, asarau pie, icifi malaru pie, kumara pie; ma nga masa ’ba angu roko driaria, logbo pie, olu pie dria;

²⁰’ba ma ndre ani, yi ma ni, yi ma ega e’yoni, yi ma va e’yoni tualu ani, kini dri Yehovani ’ye e’yo ’dirini, Mungu Alatararu Israeliniri ’ba erini.

²¹Mi nze e’yo mini, Yehova ’yo ra; mi ofu e’yo mini okporu ’diyi, Opi amboru Yakoboni ’yo ra.

²²Yi ma ofu e’yo nde ’diyi, yi ma olu ama tia e’yo ngapi ecapiri. Emi ece e’yo yi ’yepi drio ’diyi, yi ovu ngonile yari, ’dini ama eco yi ma e’yo egazaru ani, ama eco asiza yini vileri nizaru indi; ka ’dini ku, emi ece ama dri e’yo ngapi ecapi ndo ’diyi.

²³Emi ece e’yo ngapi ecapi etu azinisi ndo ’diyi, ama ma ni ani emi ovu ’ba adrouaru’diyi; ada, emi ma ’ye onyiru, kani emi ma ’ye onzi, ama asi ma oti ani, ama ma ndre eri tualu.

²⁴Te mi ndre, emi ovu toko, azi emini toko; ’ba emi pepiri ovu ’ba Munguni ngule onziri’i.

²⁵Ma enga ’ba azini engazu angu andraleruria, te eri eca ’bo, ma nga ’ba ma ru omvepiri enga kala etuni efuzuria; eri nga emu ’ba ’ba dri cepi ’diyi ma dria ekile odri ma driarile, ekile ’ba imvu sipirini odri itilerile.

²⁶A’di olu e’yoni engazu drio, ama ma ni anini ya? A’di olu e’yoni okokeleni ya, ’dini ama eco ’yozaru ani, Eri ’yo kililiru? Ada, ’ba e’yo olupini yo, ’ba e’yo ecepini yo, ada, ’ba e’yo mini ’yole ’diyi eripini yo.

²⁷Ma’i ma ovu ’ba okori ’yozu Zioni ma tia, Mi ndre yi, Mi ndre yi, azini ma nga ’ba e’yo bari ejipiri fe Yerusalemu dri.

²⁸Te ma ka ndre ra, isu de ’ba yo; ada, yi ma eselia ’ba e’yo amapi ecopi e’yo omvipi ma tia ma ka yi zi rari yo.

²⁹Mi ndre, ’ba ’diyi ovu toko; yi ma azi ovu afa yorile; wura siri’baru yini edele aya akapi acisirisi ’diyi ovu oli pi e’yo toko be.