Read lugbara Isaya 42 Bible Online

Isaya 42 - lugbara bible

Isaya 42

¹Mi ndre, ati’bo mani, mani edrele uru, mani pele, ayiko fepi ma orindi driri; ma ’ba Orindi mani eri ma dria ra, eri nga e’yo liza kililiru ofu ’ba Jururu ’diyi dri.

²Eri ngani oyu uru ku, eri ngani otre uru ku indi, I kani ngani fe ’ba ma eri i o’duko geria ku indi;

³eri ngani omi ogbazaruri nyo kanyi ku, eri ngani vini baka nyipi acika beri inyu ku; eri nga e’yo liza kililiruri ofu e’yo adaru ma alia.

⁴Asini ngani mvi doro ku, eri ngani ande ku indi de nga eri ’bani e’yo liza kililiruri nyakua ku; angu miri tia ’diyi nga di azita erini te ra.

⁵Mungu Yehova ’yo ’dini, eri ’bu ’bapi ajapi amveri, eri’i angu nyakuari erepi walaru, afa efupi alenia ’diyi pie driari, eri’i ava fepi ’ba ovupi nyaku nde ma dria ’diyi dri, azini orindi fepi ’ba acipi alenia ’diyi driri:

⁶Ma’i Yehova, ma omve mi onyi ma alia, ma nga mi dri bi, ma nga mil ta mba; ma nga mi fe azizale suru nde dri ma nga mi fe ovuzu ’ba Jururu, ’diyi dri dizaru,

⁷mi ma zi mile angu ndrepi ku ’diyi ani, mi ma tru ’ba aruru engazu ’bile gale arujoruria, azini ’ba ripi angu inicicirua ’diyi engazu arujoa amve.

⁸Ma’i, ma Yehova’i, ’di ru mani; ma ngani diza mani fe ’ba azini dri ku, ma ngani inzita mani fe wura onzi pale pa ’diyi dri ku indi.

⁹Mi ndre, e’yo andrari, yi eca ’bo, azini ma di e’yo o’diru ece; de nga yi efuni ku, ma olu e’yoni emi tia ra.

¹⁰Emi ngo Yehova dri ongo o’diru, emi inzi eri ongosi engazu angu ma kalatini asizuria! Emi sipi va miri tia ’diyi, afa aleniari pie dria, angu miri tia ’diyi, ’ba adripi alenia ’diyi be indi.

¹¹Angu roko driari, azini aku amboru eri ma alia ’diyi ma enga yi ma o’duko, aku Kedarini ovuzu alenia ’diyi; ’ba ovupi angu Selaa ’diyi ma ngo ongo, yi ma otre engazu oni dria uru.

¹²Yi ma fe diza Yehova dri, yi ma olu inzita erini ma e’yo angu miri tia ’diyi ma alia.

¹³Yehovani nga fu amve ekile ’ba okporule, eri nga fe a’ya ma enga ekile ’ba omba ’bapirile; eri nga oyu uru, ada, eri nga otre okposi, eri nga ’ye okposi ari’ba erini ma ruaa.

¹⁴Ma do ma ciri o’du izu, ma ri oye, ma bi ma ti ci; te curu’do ma nga wu ekile oku mvaazoni e’dulerini wulerile, ma nga wu, ri’doni nga ma si okporu indi.

¹⁵Ma nga oniizuru pi eza oni were ’diyi be ra, ma nga fe ase yini ma ’wi dria; ma nga yi raza fe ovuzu angu yi lipi yi aliariru, ma nga fe yi ara yi olipi oli ’diyi ma nzu ra.

¹⁶Azini ma nga ’ba mile koko ’diyi eji geri yini nile kuriasi, leti yini nile ku ’diyi ma alia ma nga yi dri ceo Ma nga ini oja dizaru yi ma milia, azini pari goligoliru ’diyi ma nga edre kililiru. Ma nga afa ’diyi ’ye ra, ma ngani yi ku ku.

¹⁷’Ba ovupi a’itasi wura onzi pale pa ’diyi vu ’diyi, ’ba ’yopi wura onzi edele aya rapi acisi ’diyi ma tia, Emi ovu adrou amani, ’dini ’diyi nga yi oja vile, yi nga ovu drinzasi tu.

¹⁸Emi eri e’yo, emi ’ba bile dirinyaru; emi lu, emi ’ba mile koko ’diyi, emi ma ndre ani!

¹⁹A’di ovu mile kokoruni ya, pe lu ati’boni mani’i ku ya? A’di ovu bile dirinyaru ekile ojio mani tini pelerileni ya? A’di ovu mile kokoru ekile ’ba ovupi ma be asi anzurusirileni ya? A’di ovu mile kokoru ekile Yehova vile ati’borileni ya?

²⁰Mi afa kakau lu, te mi ndreni yi ku; bile erini zi yi ra, te erini ku.

²¹Te Yehova ma asi le azita ’bazu dizaru, azini inzita fezu eri dri onyi erini ma e’yosi.

²²Te suru ’diri, yi suru ’bani yi ma afa ogule yi ma afa ezale teketekeri, yi o’de awi ma alia yi alu alu, yi zi yi arujoa; ’ba ’ba yi afa ’bani opale omba ma aliarile, te ’ba aripini yo, ’ba ’ba yi afa pazale, te ’ba ’yopi, Mi ofe vile-ni yo.

²³A’dini emi eselia nga bile co e’yo ’diri vuni ya? A’dini nga i bile co, i ma eri engazu curu’do eli ngapi ecapiri ma e’yosini ya?

²⁴A’di fe Yakoboni ovu afa pale omba ma aliarileni ya? A’di fe Israeli ’ba oguouru ’diyi drini ya? Yehova fenini ku ya? Eri’i amani e’yo onzi ’yele vunia, yini lele acile eri ma geria ku, yini eri ma azita erile kuri’i.

²⁵E’yo ’disi eri osu adra erini aciru eri ma dria okpo ombaniri be; eri fe aci ma ve eri ma rua ageia, te eri nini ku; ve eri ra, te eri asini e’yonisi ku.