Read lugbara Isaya 43 Bible Online

Isaya 43 - lugbara bible

Isaya 43

¹Te ’di, Yakobo la! Yehova mi ’bapiri ’yo ’dini, Israeli la! Mungu mi edepiri’i kini: Mi ru ku, ma onze mi ’bo; ma omve mi rusi ’bo, mi mani,

²Mi ka nga aga yi ma aliasi ma nga ovu mi be; mi ka zo yi raza ma alesi yi ngani mi dri a’bu ku; mi ka aci aci ma alesi mi ngani ve ku, aci ngani ti ko mi ruaa ku indi.

³A’disiku ma Yehova Mungu mini, Mungu Alatararu Israeliniri mi Papiri’i. Ma fe angu Misirini mi onzezu, ma fe Etiopia pi Seba be mi arioti ofezu.

⁴Mini ovule afa aje ambosirile ma milia, inzizarurisi, azini mani mi lelerisi, e’yo ’disi ma nga ’ba azini fe mi arioti ofezu, suru ndu ndu ma nga fe idri mini ma e’yosi.

⁵Mi ru ku, ma ovu mi be ci; ma nga ori mini oku engazu kala etuni efuzuria, ma nga mi oku kala etuni ’dezuria indi;

⁶ma nga ’yo kala andraleruri ma tia, Mi ofe, azini kala uruleruri ma tia, Mi ga ofekokoru si ku; mi eji agianzi mani engazu angu ziria, mi eji ezoanzi mani engazu angu kalatini asiria,

⁷yi dria alu alu ’bani omvele ma rusi, mani ’bale diza mani ma e’yosi ’diyi; ma ede yi ma wura ma’i, ada, ma si yi ma’i.

⁸Mi ofu ’ba afa ndrepi ku de yi mile be ’diyi, ’ba e’yo eripi ku de yi bile be ’diyi!

⁹’Ba jururu dria ma oku yi ruale, ’ suru ndu ndu ma oku yi. A’di’i yi eselia eco e’yo ’diri oluzaru, azini e’yo ovupi ’yezaru drio ’diyi ecezaruni ya? Yi ma eji ’ba yi ma e’yo eti nzepi ’diyi, yi ma nde e’yo liza ani, yi ma eri ra, yi ma a’i ani kini, Eri e’yo adaru.

¹⁰Emi’i, emi ovu ’ba e’yo mani ma eti nzepi ’diyi, Yehova ’yo ra, ati’bo mani mani peleri pie, ’dini emi ma ni, emi ma a’i ma ra, emi ma va ani ra kini, ma eri’i. Mungu azini ’bani ndra i ma drilia okoni ku, Mungu azini ngani ovu ma vutia ku.

¹¹Ma’i, ma Yehova’i, ’ba ’ba papiri azini yo, pe lu ma’i.

¹²Ma olu e’yo ra, ma pa ’ba ra, ma ece e’yo ra, te adrou juruni ovuni ndra emi eselia ku; e’yo ’disi emi’i, emi ovu ’ba e’yo mani ma eti nzepi ’diyi, Yehova ’yo ra, azini ma’i, ma Mungu’i.

¹³Awa’dini, engazu gbudrio mani etu ’bazurisi ma ’do; ’ba azini ecopi ’ba papi ma driani yo; ma ka afa ’ye ra, a’di eco eri ogazaruni ya?

¹⁴Yehova mi Onzepiri, Mungu Alatararu Israeliniri ’yo’dinile: E’yo eminisi ma pe ’ba ti Babulonia azini ma nga fe yi dria ma si va ekile ’ba apapi apa ’diyile, adani ’ba Kalideyani, oguru yini yi enyazu ani ’diyi ma alia.

¹⁵Ma Yehova’i, Mungu mini Alatararu, Israelini ’Bapi, Opi ambo eminiri’i.

¹⁶Yehova ’yo ’dini, geri edepi miria, leri edepi yi okporu ma aliari,

¹⁷gari ombaniri ofupi amve akanya pie, asikari o’biru pie, ’ba okporu ’diyi beri; yi la va tualu, yi ngani enga ku, aci yini dra ’bo, inyu yi ekile tala bakale ’bo:

¹⁸Emi ma ega afa oku ’diyi ma e’yo ku, emi ma asi afa drio ’diyi ma e’yosi ku.

¹⁹Mi ndre, ma nga afa o’diru ’ye; eri nga idi o’diru curu’do, emi ngani eri ni ku ya? Ma nga di geri ga angu roko driari ma alia, ma nga yi raza ofu angu didi ma alia indi.

²⁰Anyapa asea ’diyi nga ma inzi ra, obalako pi aria okondoru ’diyi be; mani yi fele angu didi ma alia, mani yi raza fele angu roko driarisi, ’dini yi mvuza fezu suru mani, mani peleri dri ani,

²¹yi suru mani edele maniruri yi ma e’da inzita mani ani.

²²Te ti, Yakobo la, mi omveni ma ru ku; te mi ande masi ’bo, Israeli la!

²³Mi ejini anyapa nyiri vezu edetaru ma dri ku, mi inzini ma vini edeta edeza minisi ku. Ma inzani mi azi edeta fezurisi ku, ma feni mi andezu afa aji be arikariruri vezu ku.

²⁴Mi ejini eka jele sentesiri ma dri ku, mi feni ma ma tra edeta mini ma ososi ku. Te mi inza ma ezata minisi, mi fe ma ande e’yo onzi minisi.

²⁵Ma’i, ma ini ezata mini ’diyi ma ngulupi ma e’yosi ma’i, ma ngani di e’yo onzi mini ma e’yo ega dika ku.

²⁶Mi fe ma ma ega e’yo, ama nze e’yo emi pie; mi nze e’yo mini, e’yo ma nde mi ku ani.

²⁷A’bi mini okori eza ndra ra, te vini ’ba e’yo ma efi nzepi mi dri ’diyi eza ma ra.

²⁸E’yo ’disi ma nga opi pari alatararu ma dri cepi ’diyi eza ra, ma nga Yakobo ma ru fe ovuzu atriaru, ma nga Israeli ’ba ovuzu a’daru indio