Read lugbara Isaya 45 Bible Online

Isaya 45 - lugbara bible

Isaya 45

¹Yehova ’yo ’dinile Kuro ’ba erini odu osule driniari ma tia; eri ’ba mani eri ma dri ndiri bile, mani ani suru ’bazu va eri ma drilia azini opi ma opile ayuzu kolokoloru, jotile zizu eri ma drilia ’dini ’ba ngani kalitile opi ku-ri’i, kini:

²Ma nga mu mi drilia angu otukoturu ’bazu senderu, ma nga kalitile molaru ’diyi onyo nyingiriki, ma nga ringili ayaru ’diyi li mgbiri,

³ma nga lonyi angu iniruni fe mini, azini lonyi zizaru pari nile kurini indi, mi ma ni ani kini ma Yehova’i, mi omvepi rusiri, ma Mungu Israeliniri’i.

⁴Yakobo ati’bo mani ma e’yosi, azini Israeli mani peleri ma e’yosi indi, ma omve mi rusi ’bo, ma fe mini ru azini o’diru, mi ka tro ma ni nga ku ti.

⁵Ma Yehova’i, andini yo, Mungu azini yo, kiri ma’i; ma nga mi opile a’di ra, mi ka tro ma ni nga ku ti,

⁶’ba ma ni ani, engazu woko etuni efuzuria azini woko etuni ’dezuria indi, kini, Mungu azini yo pe lu ma’i; ma Yehova’i, te ’ba andini yo.

⁷Ma diza ’ba ma’i, ma angu bizaru ’ba ma’i, ma asi anzuru ede, ma ’eyo onzi ede indi, ma Yehova, afa ’dini ’diyi ’yepi driari’i. Yehova ’ba ’bu nyaku beni

⁸Emi ’bu la, emi fe onyi engapi ’buari ma oti va, ’bu iriti beri ma osu onyi ozoole; nyaku ma zi i tile, ma ofu pata ani, eri ma fe onyi ma enga tualu; Ma’i Yehova, ma ’ba eri ma’i.

⁹Awayo! E’yoni nga ’ba agata gapi Mungu eri ’Bapiri beri ma vu isu, ajiko ajiko nyakua ’diyi ma eselia! Odrini nga ’yo ’ba sipiri dri, Mi a’di si ya? kani azi mini nga ’yo, Drini: yo, ’dinini ya?

¹⁰Awayo! E’yoni nga ’ba ’yopi ata ria, Mi a’di ti ya?-ri ma vu isu, kani oku ma tia, Afa supi mi ruaa mva osiriari a’dini ya?

¹¹Yehova, Mungu Alatararu Israeliniri, azini Mungu eri ’Bapiri ’yo ’dini: Emi ma zi ma tia e’yo ngapi ecapi’diyisi, emi azi ma agianzi mani ma e’yosi, azi ma drini ’yeleri ma e’yosi indio

¹²Ma ’ba nyaku ’bo, ma ’ba ’ba drinia; ma’i, adani dri mani aja ’buni, ma azi ongulumu ovupi alenia ’diyi pie dria.

¹³Ma fe eri enga onyi ma alia, ma nga geri erini dria ’ba kilili; eri nga aku amboru mani si ra, azini eri nga ’ba mani ’bani bile ati’baru jile angu azinia ’diyi otru ra, te ajesi kani orodrisi ku, Yehova asikari ongulumuruni ’yo ra.

¹⁴Yehova’yo’dini: Azi Misirini, afa oziza Etiopiani pie nga aga kpere mi vu, ’ba Sabeani zopi izuru ’diyi be, yi nga mu mi votia, yi nga aga mi vu o’izaru anzirikusi, yi nga yi eco va mi drilia. Yi nga matu ’ba mi vu kini: Mungu ovu mi alia -da, andini yo, Mungu azini yo.

¹⁵Adaru, mi ovu Mungu mi zipiri, Mungu Israelini, ’ba Papiri la!

¹⁶Yi nga ovu drinzasi, ada yi nga aba aba, yi dria, ’ba wura onzi papi ’diyi dria nga dri ja tualu.

¹⁷Te Yehovani nga Israelini pa pata ’dani ’danirisi; emi ngani ovu drinzasi ku, kani asi otizasi ku ’dani ’dani.

¹⁸A’disiku Yehova ’bu ’bapiri ’yo ’dini, (eri Mungu) nyaku ’bapiri, edepiri indi (eri fe eri ma so pa ra; eri ’ba eri ovuzu toko ko, eri ede eri ’ba ma adri alenia ani): Ma ma Yehova’i, Mungu azini yo.

¹⁹Ma ’yoni ndra e’yo oyokolosi, kani pari angu iniruari ma alia ku; ma ’yoni ndra ori Yakoboni ma tia ku kini, Emi ma nda ma ti. Ma Yehova’i, ma e’yo onyini ’yo’i, ma e’yo kililiru ’diyi olu’i. Adrou inzie inzi Babulonia ’diyi o’bizu Yehova be

²⁰Emi oku emi, emi emu, emi esi emi ogogo tualu, emi apapi ’bo ’ba jururu ma eselia ’diyi! ’Ba pati wura onzi ’diyi ’dupi ’diyi, ’ba e’yo zipi adrou ecopi yi opapi kuri tia ’diyi, yi ma nita yo.

²¹Emi olu, emi ofu e’yoni amve; ada, yi ma ega e’yoni tualu! A’di ece e’yo ’diri engazu o’du driorisini ya? A’di olu e’yoni drioni ya? Ma Yehova, ma eceni erini ma’i ku ya? Azini Mungu azini yo, kiri ma’i a’dule, Mungu e’yo lipi kililiruri, Mungu ’ba papiri indi; andini yo pe kiri ma’i a’dule.

²²Emi angu wudrikuru ma kala dria, emi lu ma vu, emi pa di emi ani! Mani ovule Mungu’irisi, andini yo pe kiri ma’i a’dule.

²³Ma so oyo ma ngulupisi ’bo, e’yoni efu ma tilia onyi ma alia ’bo, ma ngani eri oja vile ku, kini: Kumuti dria nga yi osi va ma drilia, andre dria nga oyo so ma rusi,

²⁴’Ba azini nga ’yo ma tia kini, Onyi pi okpo be ovu kiri Yehova ma alia a’dule; ’ba nga eca eri vu ada, azini ’ba ndra ovupi adrasi eri be ’diyi nga ovu drinzasi.

²⁵Yehova ma alia ’ba nga ori Israelini dria la kililiru, azini yi nga ovu diza be.