Read lugbara Isaya 47 Bible Online

Isaya 47 - lugbara bible

Isaya 47

¹Mi si va, mi ri irifura ma alia, mi aliria Babuloniari la; mi ri nyakua, te oguna opiniri dria ku mi Kalideya zi la! A’disiku ’ba ngani mi omve menemeneru, azini ’ba afa ba lepi’iriru dika ku.

²Mi ’du oni anya ’izuri, mi ’ba anya ’i kie, mi wu bongo mi mile a’buzuri, mi nze bongo ’bezari, mi etru bongo paari, mi aga yi raza ma alesi.

³Mi ruani nga ovu pililiru, ada, drinza mini nga e’da ra. Ma nga arioti e’yo onziniri nda ma’i, ma ngani ’ba aluni ku ku.

⁴’Ba ama Onzepiri-runi Yehova asikari ongulumuruniri’ieri Mungu Alatararu Israeliniri’i.

⁵Mi Kalideya zi la, mi ri ciri, mi da mi angu inirialeru; te ’ba ngani mi omve oku opiru suru ndu ndu, ’diyiniriru, dika ku.

⁶Aoko nya ndra ma suru mani ’dirisi tu, ma fe drinza yila mani dri; ma fe yi mi dria ani, te mi eceni yiki yi dri ku; mi ’ba kulumbu mini ’ba dezaru ma dria nzizarutu.

⁷Te mi ’yo ra, Ma nga adri oku opiru ’dani, ka’dini mi asini e’yo ’diyi ma e’yosi ku, mi egani asizanirisi ku indi.

⁸E’yo ’disi mi eri e’yo ’diri, mi ’ba ayiko ndu ndu lepi tu, mi’i ovupi egata kokoruri, ’yopi mi asia kini, Ma ci, azini ’ba azini ekile maleni yo-ri; ma ngani adri mani awuziru ku, ma ngani anzi mani ma odraza ni ku:

⁹Te afa iri ’diyi nga eca mi ruaa iritro mbele coti o’du alusi; anzi minini odrazuri azini mini mi ojazu awuziruri, candi ’diyi iritro nga eca mi ruaa tre, ka tro mi ovu ole be tu ti, azini mi ka adri ’ba ena tu ti.

¹⁰A’disiku mi ’ba a’ita mini e’yo onzi mini ma alia ’bo, mi ’yo, ’Ba aluni ndreni ma ku; te ondua miniri pi nita miniri be oja geri mini onzirini, te mi ’yo asi mini ma alia, Ma ci, ’ba azini ekile maleni yo.

¹¹E’yo ’disi e’yo onzini nga eca mi ruaa, mi ngani eri oga acifesi ku; candini nga e’de mi dria, mi ngani eco candi nde drozu ori owizasi ku; te dri jaza mini nile kuri nga mi bi coti coti.

¹²Mi so pa curu’do enaa mini ’diyi be, kani ole ’diyi be indi, mini azi ngazu alenia engazu mini ovuria eli be wereru; kani mi nga eco ani orodri isuzaru, kani mi nga aga ani ra.

¹³Mi ande e’yo amaza mini o’biru ’diyisi; mi fe curu’do yi ma nga di pa so uru mi pazu: ’ba wangi ma e’yo nipi ’diyi, ’ba ’bi’bio ondrepi ’diyi pie, ’ba mba o’du ma drileba ma e’yo ecepi ’diyi pie, dria ma so pa mi pazu e’yo ngapi ecapi mi ruaarisini.

¹⁴Mi ndre, yi nga ovu ekile ase a’wirule, i acini nga yi ve ra; yi ngaru yi pa aci dipi okporuri ma alia ku. Aci ne ngani ovu aciolu ’bani aci yuzuri kani aci ’bani rizu tiniariru ku!

¹⁵Afa mini azi ngazu alenia ’diyi nga ove mi dri ’dinile, ’ba ndra adripi afa ozipi mi be engazu o’du mini ovuzu zamvarurisi ’diyi; yi nga yi ere yi alu alu pari yinia; ’ba ngapi mi papini yo.