Read lugbara Isaya 48 Bible Online

Isaya 48 - lugbara bible

Isaya 48

¹Emi eri e’yo ’diri, emi ori’ba Yakoboni, ’bani omvele ru Israelinisi, efupi yi Yudaniriari la! Emi so oyo ru Yehovanisi, emi Mungu Israelini ma e’yo olu, te emi ’yeni e’yo adarusi ku, ’yeni vini onyisi ku.

²A’disiku yi ’da yi ma ru kini yi ’ba aku alatararuria ’diyi’i, yi ati yi Mungu Israelini ma ruaa; runi Yehova asikari ongulumuruniri’i.

³Ma olu e’yo oko ’diyi engazu drio ’bo, ada, yi efu ma tilia, ma ece yi ’bo; ma ’ye yi mbelekocici, yi ’ye yi ’dinile.

⁴Te ma ni mi asi mba tu, mi ombele te ekile onde isu ayarurile, mi andreti ekile molale,

⁵e’yo ’disi ma olu mi tia engazu drio ’bu, de nga ’yeni yi ku ma ece e’yo nde mi dri, mi kazu ’yozu ku, Wura onzi mani ’ye afa ’diyini, wura mani pale patisiri, wura edele ayasiri be, yi azi e’yo ’dini.

⁶Mi eri eri ’bo; mi lu afa ’diyi dria; azini emi’i, emi ngani e’yoniri olu ku ya? Ma ece mi dri e’yo o’diru engazu o’du’disi, ada, ma ece afa zizaru mini nile nga ku ’diyi.

⁷Yi ovu ’bazaru cucuru’do, yi ovuni drio ku; te kpere andru mi erini nga e’yo ’diyi ku, mi kazu ’yozu ku, Mi ndre, ma ni e’yo ’diyi drio,

⁸Ada, mi erini nga ku; ada, mi nini nga ku; ada, engazu drio mi bile zini nga yi ku. A’disiku ma ni ra kini mi adri ’ba dri ici tu, azini ’ba omve mi ’ba mbupi amveriru engazu mi andri ma opoa.

⁹Te ru mani ma e’yosi, ma nga fe aoko mani ma te, inzita mani ma e’yosi ma ngani mi ’ye ku, ma ngani ani mi idri eli agaa ku.

¹⁰Mi ndre, ma o’bi mi, ma ’ba mi alaru ’bo, te ekile dahabule ku; ma o’bi mi aci inzataniri ma alia ’bo.

¹¹Ma nga ’ye ’dinile ma ngulupi ma e’yosi, ada ma ngulupi ma e’yosi. Te eza ma ru ’doni ya? Te ma ngani diza mani fe ’ba azini dri ku.

¹²Emi co bile ma vu, Yakobo la, azini Israeli mani omveleri la! Ma okori’i, ma vileri’i, ma ’do’i.

¹³Ada, ma dri ’ba ndra nyaku ma votini, ma dri ndiri aja ndra ’buni; ma ka yi omve, yi so pa tualu.

¹⁴Emi oku emi, emi dria, emi eri e’yoni! Yi ma eselia a’di ece e’yo ’diyi ’bonini ya? Yehova le eri ra; eri nga e’yo eri asini leleri ’ye Babuloni ma ruaa, dri erini nga ovu ’ba Kalideyaa ’diyi ma dria.

¹⁵Ma’i, ma ma ngulupi ’yo e’yo ’bo, ada, ma omve eri ra, ma eji eri ra, eri nga ani i ma geri ’ba drilebaru.

¹⁶Emi esi ma vu ogogo, emi eri e’yo ’diri! engazu anguni e’doria ma oluni e’yo oyokolosi ku, engazu o’du erini ovuzu indirisi isu de ma ci. Azini curu’do Opi Yehova pe ma ti Orindi erini be.

¹⁷Yehova mi Onzepiri ’yo ’dini, Mungu Alatararu Israeliniri: Ma Yehova Mungu mini, ma imba mi e’yo ovupi mi dri orodrirurisi, ma ce mi dri geri mani lele mi ma ad aleniarisi indio

¹⁸Mi ka ndra azita mani eri ra, ’yeke Te’do asi anzuru mini ovu ekile yi razale, onyi mini ovu ekile yi mirini mbupi mburile ’bo;

¹⁹te’do ori mini ovu ekile cinyale ’bo, efi ’yaza rua minini ovu kakau ekile okparafile; te’do eri ma ru avini ma miliasi ku, ’ba jani ru nderi ma dri ma miliasi ku.

²⁰Emi fu Babuloniasi, emi apa ’ba Kalideyaa ’diyi ma drilia, emi ece e’yo ’diri o’duko ongo ngozanisi, emi olu e’yoni, emi eku e’yo ’diri kpere angu tini asiria; emi ’yo, Yehova onze ati’bo ini Yakoboni ’bo!

²¹Eri ka ndra yi ma dri ce geri angu roko driari ma aliasi, yi avijo funi ndra yi ku; eri fe yi ma era yi dri engazu kata ruaa; eri asi kata ra, yi efu ani okposi ra.

²²Yehova ’yo ’dini: Asi anzuru ’ba azi onzi ’yepi ’diyi dri yo.