Read lugbara Isaya 49 Bible Online

Isaya 49 - lugbara bible

Isaya 49

¹Emi angu miri tia ’diyi, emi eri e’yo mani, emi suru ndu ndu ovupi ziri’diyi, emi co bile. Yehova omve ma engazu ma andri ma opoa, eri olu ru mani ma e’yo engazu mani efuria ma andri ma aliarisi.

²Eri ’ba ma tile ekile sei cizarurile, eri zi ma i dri ma endria; eri ’ba ma ’ye ejufe ’bani ofale ’borile, eri mba ma ta endere ini ma alia ci.

³Eri ’yo ma tia, Mi ovu ati’bo mani, mi Israeli, mani ngazu diza isuzu mi e’yosiri.

⁴Te ma ’yo ra, Ma nga azi oye, ma fe okpo mani eza toko orodri kokoru; te e’yo liza kililiru maniri ovu Yehova be ada, ma andemanga ovu Mungu mani be.

⁵Te Yehova ’yo curu’do ra, eri’i ma ’bapi engazu ma andri ma opoa, ’dini ma ma ovu ati’bo eriniru, ngazu Yakoboni jizu i vu dika, azini Israelini okuzu i vu aniri, isu de ma ovu inzita be Yehova ma milia, azini Mungu mani ovu curu’do okpo maniru-

⁶ada, eri ’yo: Mini ovuzu ati’bo mani, mi ma enga suru Yakoboni ’diyi, azini mi ma omvi ’ba tani mbale jolokoru Israelini ’diyi yi paria dika aniri ovu azi were tu aga ra; ma nga mi fe ovuzu diza ’ba jururu dri indi, mi ma ovu ani pata maniru kpere angu ma kalatini asizuria.

⁷Yehova ’yo ’dini, Israelini Onzepiri, azini Mungu erini Alatararuri, ’ba ’bani ’bale aparakaru, ’ba suruni ngule onziri, ’ba opiru ’diyi ma ati’bo ma tia: Opi yi nga e’yo ’diri ndre, yi nga enga ra; opianzi ’diyi nga ndre, yi nga di inzi ani; Yehova ovupi adaruri ma e’y’osi, Mungu Alatararu Israelini mi pepi ’bori ma e’yosi. Zionini omvizu i paria

⁸Yehova ’yo ’dini: Ma omvi e’yo mi tia etu ’yekeria ’bo, ma ko mi aza o’du patanirisi ’bo; ma nga mi ta mba ra, ma nga mi fe suru dri azizaru, mi ma edre angu uru, mi ma fe yi ma a’i angu awuafaru ’bani kule ’bo ’diyi dika;

⁹’yozu ’ba o’ile ’diyi ma tia, Emi fu amve, ’ba ovupi ini ma alia ’diyi ma tia, Emi ece emi. Yi nga nyaka nya geri ma alia, oni izuru dri nditiri ’diyi ma dria yi nga iribi isu ra;

¹⁰yi ngani ovu abirisi kani yi avijosi ku, angu driza ngani yi fu etu be ku, a’disiku ’ba yiki ’bapi yi vuri nga yi dri ce ani, ada, eri nga yi dri ce geri yi egapi egari ma tiarisi.

¹¹Ma nga vini oni mani izuru ’diyi oja dria gerire, gboko mani nga ovu uru tu.

¹²Mi ndre, ’ba ’diyi nga emu engazu ziri, azini mi ndre, ’ba ’diyi engazu andraleru, azini kala etuni ’derialeru, azini ’ba ’diyi vini engazu angu Sinimua.

¹³Mi ongo ongo, ’bu la; azini nyaku, mi ovu ayiko be; emi oni izuru, emi e’do ongo ngozu! Yehovani ’ba erini ma asi omile ’borisi, erini ngale vini yiki ’bale ’ba erini, ’bani inzale ’diyi vurisi.

¹⁴Te Zioni ’yo ra, Yehova ku ma ’bo, Opi ma dri avi e’yo manisi ’bo.

¹⁵Oku eco mva ini ba ndrupiri ma e’yo avizaru ra ya, eri ma ovu ani yiki kokoru mva efupi i ma opoari vu beni ya? Ada, yi dri eco avizaru, te ti, ma dri ngani avi e’yo minisi ku.

¹⁶Mi mire, ma si mi ma dri agelea; kali mini abiru ’diyi ovu ma milia ’dani.

¹⁷Anzi mini ’ye mbele mbele, ’ba mi dri japi ’diyi, ’ba mi ezapi ’diyi be, yi nga efu mi aliarisi ra.

¹⁸Mi enga mi mile uru mi ageia, mi ndre; ’ba ’diyi dria oku yi tualu, emu Te mani ovule idri berile, Yehova ’yo ra, mi nga yi su mi ruaa yi dria alu alu, ekile mini onyiafa sulerile, mi nga mi osu yisi ekile amuruani i osulerile.

¹⁹A’disiku pari mini andruru ezazaru’diyi, angu mini ’bani ezaleri beadaru, mi nga ovu iziŋaru tu ’ba adripi alenia ’diyi dri, te ’ba ndra mi kipi ’diyi nga ovu ziri.

²⁰Anzi ndra mini ovuzu candisi yi ma e’yosi ’diyi nga ’yo etu azinisi mi bilia: Angu ’doari ovu ma dri werearu tu aga ra; mi ku mani pari azini ma ma ri ani.

²¹Etu ’dasi mi nga ’yo mi asia: A’di oti anzi ’diyi manini ya? Isu de anzi mani avi ’bo, ku ma pirini anzi kokoru, dro ma angu azinia, acizu kelekele cozu ’dile azini ’dole, te a’di ezo anzi ’diyini ya? Mi ndre, ku ndra ma pirini; te ’ba ’diyi ovu ndra ngoa ya?

²²Opi Yehova ’yo ’dinile: Mi ndre, ma nga ma dri enga ’ba jururu dri, ma nga bendera mani ’ba uru suru ndu ndu dri; yi nga di agianzi mini eji yi ma agatia ani, azini mi ezopi yi nga o’du yi ombetia.

²³Opi yi nga ovu ata mini endriaru ’diyi, opi oku yi nga ovu mini endriaru ba fezu. Yi nga avu va mi drilia, yi ma mile ’bazu nyakua, yi nga ani irifura mi paari mbe’i. Mi nga di ni ani ma Yehova’i; ’ba ma tepi ’diyi ngani ovu drinzasi ku.

²⁴Yi nga afa opale ombaari pa ’ba okporu ma dria ra ya, kani yi nga ati’ba ’ba uriurirurini ’diyi ari ra ya?

²⁵Te Yehova ’yo ’dinile: Ka tro ’ba okporu ’diyi ma ati’ba ti, yi o’du yi ra, yi nga ’ba uriuriru ’diyi ma afa pale omba ma aliari ari ra, a’disiku ma nga awa ’ba awapi mi beri be ra, ma nga vini anzi mini opa ra.

²⁶Te ma nga fe ’ba mi inzapi ’diyi ma nya yi ma ngulupi ma za, yi nga ati yi ma ngulupi ma arisi, ekile patiefi ma su aluzarusirile te ’ba rua ari be ’diyi dria nga ni kini ma Yehova, ma pa mi ma’i ma onze mi ma’i, ma Mungu Okporu Yakoboniri’i.