Read lugbara Isaya 5 Bible Online

Isaya 5 - lugbara bible

Isaya 5

¹Mi fe ma ngo ’ba mani leleri dri ongo ’ba mani leleri ma e’yosi, amvu zabibuni eriniri ma e’yosi indi: ’Ba mani leleri ovu amvu zabibuni be oni efi kapi turia.

²Eri ’ya ra, oku oniefi alenia, omvu yi dria amve ra, sa zabibu alenia esele onyiru turi’i; eri si jo izuru eri ma alia agadua, ga alenia pari ’bani zabibu ma efi su nzizuri; azini eri ndru eri ma ka efi zabibu onyiruri, te eri ka zabibu aseari ma efi’i.

³Te di, emi ’ba adripi Yerusalemua’diyi, emi ’ba Yudani ’diyi be, ma zi emi tia, emi ma li e’yo ama eselia amvu mani zabibuni be.

⁴Ma eco di ndra a’di afa ’yezaru amvu mani ma aza kozu mani ’yele nga kuri ya? Ma ka ndru eri ma ka zabibu efi onyiruri, eri ka zabibu efi aseari a’disi ya?

⁵Te di, ma nga e’yo mani ngale ’yele zabibu mani driri ece emi dri. Ma nga kali tole ageiniari nze ra, ’ba nga eri nya saaru; ma nga kali erini onyo ra, ’ba nga eri tu va pasi.

⁶Ma nga fe ’ba ma eza eri ra; ’ba ngani pati zabibuni ma rua ede ku, ngani etini ofu ku, te oci pi yi nga enga alenia ndrandra be; ma nga vini e’yoni azi iriti ma ria yi ma su ozoo drinia ku.

⁷A’disiku amvu zabibuni Yehova asikari ongulumurunirini ovu ori’ba Israelini, ’ba Yudani ’diyi ovu pati erini leleri’i; te eri ndru e’yo liza kililiru, te mi ne, inzamatarani; eri ndru onyi, te mi ne, wutani!

⁸Drileonzi ’ba jo ecipi jo azini be ’diyi dri, ’ba amvu o’bapi amvu azini ma tia ’diyi, de nga pari aceni ku, de nga emi adrini a’dule angu ndea ku.

⁹Yehova asikari ongulumuruni ’yo ma bilia: Adada, jo karakarau amboru azini ndrizaru’diyi nga ovu ezazaru, ’ba ngani ovu alenia ’de ku.

¹⁰A’disiku amvu zabibuni, zozani kali o’bezaniri turu alu drini kali su, walaniri turu alu kali suri nga efi ka tijo alu, azini oriefi ero alua piri, eri nga efi ka abaka alu.

¹¹Drileonzi ’ba engapi o’biti drio drio, yi ma mvu afa mvuza okporu ani beni ’diyi dri; tepi kpere inisi de nga yi atini ewasi ku ’diyi dri!

¹²’Ba ’diyi yi ’ba o’di pi yi ma omu alia guka pie, arimva pie, ega pie, ewa pie; te yi egani azi Yehovani ’diyi ku, yi droni yi ma asisile ’yeta eri ma drini ’yele ’diyi ma dria ku.

¹³E’yo ’disi ’ba mani mu ati’baru nitaakosi ’bo; abiri ofu ’ba yini ovupi inzita be ’diyi to, ’ba ongulumuru yini yi ovu a’wire yi avijosi.

¹⁴E’yo ’disi Pari ’ba drazaniri ovu li be amboru aga ra, eri ’ba tile walaru ’bani ecole o’bile kurile, te diza yini, ’ba ongulumuru yini pie si va alenia, afu yini pie, ’ba ovupi ayikosi yi ma eseliari be.

¹⁵’Ba tokoni ’diyi ’ba yi ele, ’ba amboru ’diyi oja yi ’ba werele va, te ’ba afuru ’diyi ma mile ovu drinza be.

¹⁶Te Yehova asikari ongulumuruni ovu uru e’yo liza kililiru ma alia, azini Mungu, Alatararuri’i, ovu alaru onyi alia.

¹⁷Etu ’dasi kabiloanzi nga di iribi nya ekile nyamuko yiniarile, te ’ba acipi ’diyi nga pari ’ba a’buza ’diyini kule andruru ’diyi nya’i.

¹⁸Drileonzi ’ba azi onzi sepi baka e’yo inzorunisi ’diyi dri, ’ba e’yo onzi sepi yi vu ekile baka gari sezurisirile ’diyi,

¹⁹’yopi kini: Eri ma ’ye mbele, eri ma nga azi erini mbele ama ma ndre azi nde ani; egata Mungu Alatararu Israelinirini ma esi ogogo eri ma eca ra, ama ma ni eri ani

²⁰Drileonzi ’ba e’yo onzi ma ru ’dapi onyi’i, azini onyi ma ru ’dapi onzi’i ’diyi dri; ’ba ini ’bapi diza paria, diza ini paria ’diyi; ’ba afa drazaru ’bapi afa aluzaru ma paria, azini afa aluzaru afa drazaru ma paria ’diyi

²¹Drileonzi ’ba ovupi onduaru yi ma ngulupi ma milia, ’ba egata onyiru be yi ma ngulupi ma milia ’diyi dri!

²²Drileonzi ’ba ovupi okporu ewa mvuza ma alia, azini okporu afa mvuza okporu osapi ’diyi dri;

²³’ba ’diyi yini ’ba ma e’yo liria yi fe e’yo ma nde ’ba azi onzi be ’diyi ku, e’yo afa feza ti razanirisi, yi nze ’ba onyiru ’diyi ma onyi ra!

²⁴E’yo ’disi ekile aci ma dizani ase voza velerile, ekile ase a’wiruni asule va ad ma aliarile, ekile ’dinile ola yini nga i oja afa mazarule, fu yini nga enga irifurale; yini azita Yehova asikari ongulumurunirini galerisi, yini e’yo Mungu Alatararu Israelinirini ’bale aparakarurisi.

²⁵E’yo ’disi aoko Yehovani ve suru erini ma ruaa, eri eju i ma dri yi vu, eri co yi ’bo, azini ci oya ra, avu yini ovu ekile okurunya geri ma aliarile. Te ti, aoko erini ojani nga i ku, te eri eju nga i ma dri ’dani.

²⁶Te eri nga bendera ombani enga suru ndu ndu dri engazu ziri, eri nga yi omve ceresi engazu angu ma kalatini asizuria; te mi ndre, yi nga enzu ongusi mbele!

²⁷’Ba andepiri kani ’ba acipi parapararu andesiri yi ma eselia aluni yo, ’ba o’du kopi kani o’du kopi kaukauri aluni yo, yi ngani opilemvu yi ma opiliari ayu ku, yi ngani baka enyiriko yi ma paarini tru ku indi;

²⁸’ba nde ’diyi ma ’ye si ovu ndrindriru, yi nzo osu yini dria ’bo, akanya yini ma paonyofi ovu ekile oni kongolokorurile, yi ma gari pa ovu olirikole.

²⁹Yi nga wu kamile, yi nga wu kamianzini wulerile; adani yi nga wu ra, nga za bi ra, yi nga eri pa ra, azini ’ba ngapi aripini yo.

³⁰Te yi nga wu yi ma ruaa o’du ’darisi ekile mirini wulerile. Te ’ba ka lu angu nde vu, mi ne, ini pi candi be; te diza oja i bizaru iriti erini ’diyi ma alia.