Read lugbara Isaya 50 Bible Online

Isaya 50 - lugbara bible

Isaya 50

¹Yehova ’yo ’dinile: Waraga mani mi andrini drozu rari eri ngoa ya? Kani ma nya ndra a’di ma mari, mani ani emi fezu tiniri ya? Emi ndre, fe emi je e’yo onzi eminisi, dro vini emi andrini ezata eminisi.

²Ma ka ndra emu ra, ’ba ovu yo a’disi ya? Ma ka ndra ’ba omve, ’ba e’yo omvipini yo a’disi ya? Dri mani ovu curu’do alinaru, ’dini eri econi ani ’ba onzezaru ku ya? Ma ovuni okpo be ’ba arizu ku ya? Mi ndre, ma ka ega yi dria, miri nzu dria, ma oja yi raza ’diyi rokoru; e’bi yini odra yiakosi, nga di ngu ngu.

³Ma ’bu osu angu bizasi, ma koliba fe su ruania indi.

⁴Opi Yehova fe ma dri ’ba ’bani imbale ’bo ’diyi ma andre, ma ma ni geri mani ngazu ’ba andepiri ma asi omizu e’yo ’yozasi ani. Eri ma enga o’biti vusi o’biti vusi, eri ma enga e’yo erizu bilesi ekile ’ba ’bani imbale imbarile.

⁵Opi Yehova zi ma bile ’bo, ma mbuni amve ku, ma coni ma ti vile ngukualeru ku indi.

⁶Ma fe nguku mani ’ba ’ba copi ’diyi dri ra, ma fe ma ma o’bolo ’ba ’ba ma tibi nzepi ’diyi dri ra; ma a’buni ma mile drinzasi ku kani cucu wizasi ku indi.

⁷Opi Yehovani ngale ma aza kolerisi; e’yo ’disi ma jani nga dri ku; e’yo ’disi ma fe ma andreti mba tu ekile oni okporurile, azini ma ni ra ma ngani drinza isu ku;

⁸’ba ma lapi kililiruri ovu ogogo. A’dini nga awa ma beni ya? Onyiru ama ma so pa tualu. Ari’ba mani eri a’di’i ya? Eri ma emu ma vu ogogo fo!

⁹Mi ndre, Opi Yehovani nga ma aza ko ra; A’dini nga e’yo mani li ma ndezuni ya? Mi ndre, yi driani nga de ekile afa suzale; odukoduni nga yi mbeni.

¹⁰’Ba emi eselia Yehovani rupiri a’di’i ya? A’di eri ati’bo erini ma o’dukoni ya? ’Ba acipi angu iniru ma alia ovupi diza be kuri, eri ma a’i ru Yehovani, eri ma ati i Mungu ini ma ruaa.

¹¹Mi ndre, emi dria aci edupi ’diyi, acisi ombepi emi ageia ’diyi! Emi aci aci emini dipiri ma alia, acisi emini edule ti kopi ’diyi ma eselia! Emi nga afa ’diri a’i ma dri: emi nga la va candi ma alia.