Read lugbara Isaya 51 Bible Online

Isaya 51 - lugbara bible

Isaya 51

¹Emi co bile ma vu, emi ’ba onyi ma vuti bipi ’diyi, emi ’ba Yehovani ndapi ’diyi; emi lu oni yini emi opizu ruaniari vu, emi lu ’bile yini emi omvuzu aleniari vu indi.

²Emi lu Iburahimu emi ati vu azini Sara emi osipiri vu indi; a’disiku ma omve ndra eri ra de: eri ’ba alu, ma fe asi ndriza eri dri, ma fe erini ezuzu kakau.

³A’disiku Yehova omi Zioni ma: asi ’bo; eri omi pari erini ezale ’bo ’diyi ma asi ’bo indi, te eri ’ba angu erini rokoruri ekile. Edenile, azini angu erini roko driari ekile amvu Yehovanile; ’ba nga ayiko pi isu alenia nyona be, awa’difo pie o’duko ongoni pie dria.

⁴Emi co bile ma vu, emi ’ba mani, emi fe bile ma vu, suru mani la; a’disiku azitani nga enga ma vu, azini ma nga fe e’yo liza kililiru mani ma ovu ra, diza fezu suru ndu ndu dri.

⁵Onyi mani ovu ogogo, pata mani efu ’bo indi, dri mani nga suru ndu ndu ma e’yo li ra; angu miri tia ’diyi nga ma te, yi nga asi ’ba dri mani ma dria ra.

⁶Emi enga emi mile ’bua, emi lu nyaku vutinia vari indi; ’buni ngale afile acikalerisi, nyakuni ngale dele afa suzalerisi, azini ’ba adripi alenia ’diyi nga odra ani ’dinile; te pata mani nga ovu ’dani ’dani, azini onyi mani ngani avi ku.

⁷Emi co bile ma vu, emi ’ba onyi nipi’diyi, suru ovupi azita mani be yi asia’diyi; emi ovu urisi o’data ’banisi ku, emi asi ma oti e’yo onzi yini ’yole emi ruaarisi ku indi.

⁸A’disiku oduduni nga yi mbe ekile erini afa suza mbelerile, olokoloni nga yi mbe erini kabilo ma ’biko mbelerile; te onyi mani nga adri ’dani ’dani, azini pata mani nga adri a’bianzi dria vu.

⁹Mi enga, mi enga, mi su okpo ruaa, mi dri Yehovani la; Mi enga ekile driorile, ekile ewu a’bianzi drio ’dayinisirile. Mi ovuni ’ba ndra Rahabuni capi nyirinyiriri’i ku ya? Mi soni ndra uri amboru yiari ku ya?

¹⁰Mi feni ndra miri ma nzu ra, yi amboru miri aliruriniri ma nzu ra ku ya? Mi edeni ndra geri ’ba mini onzele ’diyi dri yi aliru ma alia, yi ma zo ’aa’dasi ani ku ya?

¹¹Te ’ba Yehovani onzele ’diyi nga emvi ra, yi nga emu Zionia ongo ngozu; ayiko ’daniri nga ovu yi ma dria; yi nga ayiko isu nyona be, te candi pi nga apa ziri asi otiza be.

¹²Ma’i, ma ma ada’i, ma omi emi asi ma’i; mi a’di’i ya, mini ovuzu ani urisi ’ba ngapi drapi rari ma e’yosi, kani mvi ’bani yini ngale ojale aselerisi indi ya?

¹³Te mi dri avi Yehova mi ’Bapiri ma e’yosi, ’bu ajapi walaru nyaku ma vuti ’bapiri’i ya? Azini mi ovu urisi o’du dria ’ba ’ba inzapiri ma adrasi, erini ’yeria ’ba dri jaria ya? Te ’ba ’ba inzapiri ma adrani ngoa ya?

¹⁴Yi nga ’ba ’bani lile ati’boru angu aziniari tru mbele mbele; eri ngani dra sizu ’bilea ku, enya erini ngani i de ku.

¹⁵A’disiku ma Yehova Mungu mini, ma enga miri, ma fe yi erini mbupi mburi ma wu aniru erini Yehova asikari ongulumuruniri’i.

¹⁶Azini ma ’ba e’yo mani mi tilia ’bo, ma a’bu mi dri mani ma endrilendrisi ’bo, ma ma fe ’bu ma so pa ani, ma ma ’ba nyaku ma eti, ma ma ’yo Zioni ma tia indi, Mi ovu suru mani.

¹⁷Mi enga, mi enga, mi so pa uru, Yerusalemu la, mi’i erejea eri ma aokoni mini a’ile Yehova ma driari mvupi ’bori; mi mvu obi ’bani acizu ani parapararuri, mi mvu eri ndulu ’bo.

¹⁸Agianzi erini osile ’bo ’diyi ma eselia ’ba eri dri cepini aluni yo; azini vini agianzi erini ezole ’diyi ma eselia dria, ’ba eri ma dri bipini aluni yo.

¹⁹Afa ’diyi iri tro ’ye yi mi ruaa ’bo-- a’dini nga wu e’yo minisini ya?- dri jaza ’bani mi ezazu teketekeri, azini abiri pi sei be; ma nga mi asi omi ngoni ngoni ya?

²⁰Agianzi mini ma asi fu yi ma alia ’bo, yi o’de va geri dria ma drilia ekile ova ’bani bile emba ma aliarile; yi ga tre Yehova ma adrasi, egata Mungu minini egale yi ma driarisi.

²¹Ka’dini mi’i, mi ’ba ’bani inzaleri, mi ’ba atipi afa mvuzasi, te ewasi kuri, mi eri e’yo ’diri curu’do:

²²Opi mini Yehova, Mungu mini suru ini ma e’yo aza kopi e’yo liza ma aliari ’yo ’dini: Mi ndre, ma ’du erejea ’bani acizu ani parapararuri mi driasi ’bo; adani, erejea adra mani ma obiniri, mi ngani eri mvu dika ku;

²³te ma nga eri ’ba ’ba mi inzapi ’yopi mi orindi tia, Mi avu va, ama ma aga mi driasi ani, ’diyi ma dria; te mi ’ba mi nguku va, eri fezu ekile nyakule azini ekile gerile, ’ba agapi drinia ’diyi dri.