Read lugbara Isaya 52 Bible Online

Isaya 52 - lugbara bible

Isaya 52

¹Mi enga, mi enga, mi su okpo mini mi ruaa, Zioni la; Yerusalemu aku alatararu la, mi su bongo mini ndrizaru ’diyi! A’disiku engazu curu’do, ’ba agele liza kokoru ’ba ondiru ’diyi be ngani fi mi alia dika ku.

²Mi oya irifura mi ruaari, mi enga; mi ri va, Yerusalemu la; mi tru anziriku mi ombeliari, mi Zioni zi ’bani bile ati’boruri la!

³A’disiku Yehova ’yo ’dini: ’Ba fe ndra emi je toko, azini yi vini nga emi onze silingi kokoru.

⁴A’disiku Opi Yehova ’yo ’dini: Suru mani is ndra okorisi Misiria, yi ma ’a’a ’dale ani, te ’ba Asuriani inza yi toko e’yo ikokoru.

⁵Te di, Yehova ’yo ra, ima ’ye ’doa a’duni, yini suru mani jile ’dale tokorurisi ya? ’Ba adripi yi drilia opiru ’diyi owu tu, Yehova ’yo ra, azini ’ba o’da ma ru ’dani o’du dria.

⁶E’yo ’disi suru mani yi nga ru mani ni ra; e’yo ’disi yi nga ni o’du ’dasi kini, ’ba e’yo ’yopiri eri ma’i; mi ndre, ma ’do’i.

⁷’Ba e’yo bari ejipi, asi anzuru olupi, e’yo bari e’yo onyiruni ejipi, e’yo patani ekupiri ma pa ndri tu ’doni ya! ’Yopi Zioni ma tia, Mungu miniri adri opiruni-ri.

⁸’Ba angu emini ma agei tepi ’diyi ma o’duko! Yi enga yi ma o’duko uru, yi ongo ngo tualu; a’disiku yi nga yi ndre milesi milesi Yehova ka nga emvi Zionia ’boria.

⁹Emi e’do ayikoni, emi ngo tualu, emi pari andruru Yerusalemuni ’diyi; Yehovani suru ini ma asi omile ’borisi, erini Yerusalemuni onzele ’borisi indi.

¹⁰Yehova fe dri ini alatararu ma e’da i ’ba jururu dria ma milia; azini angu ma kalati asizu ’diyi dria nga Mungu amani ma pata ndre ra.

¹¹Emi emu, emi emu, emi evu ’dole, emi elo afa ala kokoru ma rua ku; emi efu eri ma aliarisi, emi ma ovu di alaru, emi ’ba afazu Yehovani ’dupi ’diyi.

¹²Te emi ngani efu mbele mbele ku, emi ngani efu apazu apa apa ku, a’disiku Yehovani nga mu emi driliani, azini Mungu Israeliniri nga ovu emi vutiani.

¹³Mi ndre, ati’bo mani nga ’ye onduasi, yi nga eri inzi, yi nga eri ’ba uru, eri nga ovu uru tu.

¹⁴Ekile ’ba kakau yini osule misi osurile- ’ba eza mile erini aga ’ba azinini ra, ’ba eza wura erini aga anzi ’bani ma wura ra-

¹⁵’dinile eri nga osuta fe suru kakau dri; opi yi nga yi ma tile bi ci e’yo erinisi; a’disiku yi nga afa ’bani e’yoni olule yi dri nga kuri ndre ra, azini yi nga e’yo yini erile nga kuri va ra indio.