Read lugbara Isaya 53 Bible Online

Isaya 53 - lugbara bible

Isaya 53

¹A’di a’i e’yo amani olulerini ya? Dri Yehovani e’da i a’di dri ya?

²Te eri zo eri ma milia ekile pati ibirule, ekile pati ola idipi angu a’wiruarile; wura erini kani rua ndriza erini yo; te ama ka eri ndre ra, rua ndriza erini amani ani eri lezuni yo.

³’Ba ede eri ra, ’ba ga eri si; eri ’ba candi beri, ni azo ma candi ra; ngu eri onzi ekile ’ba ’bani yi ma mile zile erisi rarile, te ama egani eri afa adarule ku.

⁴Ada ada, eri ’du dra amani ’bo, a’du candi amani indi; te ama ega Mungu co eri, fe candi eri dri, inza erini.

⁵Te yi fe rua suza eri dri ezata amani ma e’yosi, fe anyo eri dri e’yo onzi amanisi; panga asi anzuru fepi amaniri ovu eri ma ruaa, ama rua ati coza erinisi.

⁶Ama dria avi gerisi kabilole ’bo; ama oja ama dria alu alu geri ama ngulupiniria; te Yehova ’ba e’yo onzi ama drianiri eri ma ruaa ’bo.

⁷Yi inza eri ra, te eri ovu e’yere, zini i ma tile ku; ekile kabilo ’bani jile lile zarurile, azini ekile kabiloni ovule ndi ’ba eri ma ’biko lipi ’diyi ma miliarile, ada, eri zini i tile ku.

⁸’Ba ’du eri inzata be azini e’yo liza be indi; azini anziazi erini ’diyi ma eselia, a’di ega kini ja eri dri angu ’ba idriru ’diyiniri ma aliasi rani ya? Yi co eri suru mani ma ezatasi.

⁹Yi oti eri ma nyadri tualu ’ba ezata ezapi ’diyini be, eri ovu ’ba afa e’iruri be drata erini ma alia, ka tro eri ’yeni ’ba eganasi aluni ku ti, ka tro yi isuni lokiri eri ma tilea ku ti.

¹⁰Te eri ovu onyiru Yehova ma milia anyo fezu eri dri; fe di candi eri dri ’bo; te mi ka nga orindi erini ’ba edetaru e’yo onzisi, eri nga ori erini ndre ra, eri nga o’du erini ere kakau; te e’yo ovupi onyiru Yehova ma miliari nga i ’ye onyiru tu eri ma dria.

¹¹Eri ma orindi ma candisi eri nga diza ndre ra, e’yo nde nga di dri fu eri ma milia ra; nita erinisi ati’bo mani onyiruri nga ’ba kakau ’ba kililiru; azini eri nga e’yo onzi yini ’du ra.

¹²E’yo ’disi ma nga esele erini awa ’ba amboru ma eselia, eri nga afa opale omba ma aliari awa ’ba okporu ’diyi be; erini i ma orindi osule va kpere dra vurisi, yini eri lale ’ba e’yo onzi ’yepi ’diyi ma eseliarisi; te eri ’du ezata ’ba kakauni, azini eri a’i Mungu okporu ’ba azi onzi ’yepi ’diyi dri indi.